សំរាមជាច្រើនប្រភេទ រួមមាន ថង់ប្លាស្ទិក កំប៉ុងជ័រ ប្រអប់ដាក់បាយប្រភេទស្នោ និងកាកសំណល់ស្អុយរលួយ ជាដើម មានសភាពកកណែនលើផ្ទៃទឹកនៅក្នុងប្រឡាយស្ទឹងមានជ័យ ដែលមានចម្ងាយប្រមាណ៧០០ម៉ែត្រ ខាងត្បូងស្ពានអាកាសស្ទឹងមានជ័យ។ អ្នកភូមិនិយាយថា សំរាមដែលនៅលាយឡំជាមួយទឹកលូពណ៌ខ្មៅដែលហូរតាមប្រឡាយ មានរយៈពេលប្រមាណ៨ខែមកហើយនេះ បានជះក្លិនស្អុយខ្លាំង នាំឱ្យអ្នករស់នៅក្បែរនោះ មានអាការឈឺក្បាល និងកើតមានសត្វមូសច្រើន។
នៅតំបន់នោះមានសំរាមនៅជាគំនរៗ និងមានប្លាស្ទិកហើររាយប៉ាយពាសពេញតាមដងប្រឡាយ ចាប់ពីចំណុចក្រោមស្ពានអាកាសស្ទឹងមានជ័យ រហូតដល់កន្លែងដែលមានកកស្ទះសំរាម។
កំពុងអង្គុយជុំគ្នាជាមួយសមាជិកគ្រួសារនៅមុខផ្ទះ មានចម្ងាយប្រមាណ១០ម៉ែត្រពីគំនរដែលសំរាមកកស្ទះ អ្នកស្រី សាង គឹមផា វ័យ៦០ឆ្នាំ ជាពលរដ្ឋរស់នៅភូមិព្រែកទាល់ សង្កាត់ស្ទឹងមានជ័យ២ ខណ្ឌមានជ័យ បានឱ្យដឹងថា បញ្ហាសំរាមកកស្ទះនេះមានរយៈពេលប្រមាណ៨ខែមកហើយ ដោយមិនទាន់ឃើញមានអាជ្ញាធរមានវិធានការកាយចេញនោះទេ។ អ្នកស្រីថា ដោយសារតែមានសំរាមច្រើន ធ្វើឱ្យនៅតំបន់គាត់រស់នៅនេះមានមូសច្រើន ហើយគាត់តែងតែមានអាការឈឺក្បាល ដោយសារក្លិនសំរាមស្អុយខ្លាំង។
អ្នកស្រី សាង គឹមផា ប្រាប់ថា៖ «ធុំក្លិនណាស់អូនអើយ! យើងនៅហ្នឹង ដល់ពេលធុំស្អុយអ៊ីចឹង មិនដឹងធ្វើម៉េច។ ឈឺ[ក្បាល]នោះវាឈឺពេកហើយ ក្លិនខ្លាំង»។
ស្រី្តរូបនេះបន្ថែមថា ករណីសំរាមកកស្ទះនេះតែងតែកើតមានជាច្រើនលើកមកហើយ ទោះបីជាអាជ្ញាធរធ្លាប់កាយចេញក៏ដោយ ដោយថា រយៈពេលប្រមាណ៣ខែហ្នឹងមានសំរាមកើតឡើងដដែល។ អ្នកស្រីបន្តថា បើនៅពេលរដូវភ្លៀងចូលមកដល់វិញ សំរាមទាំងនោះបានអណ្ដែតត្រៀបត្រា ដោយហូរចេញពីប្រឡាយ មានទាំងទឹកស្អុយផង ចូលមកក្នុងផ្ទះរបស់គាត់ ដែលបានបង្កការលំបាកក្នុងការរស់នៅ។
អ្នកស្រីថា៖ «វា[សំរាម]អណ្ដែតឡើងពេញទាំងអស់ហ្មង ចូលផ្ទះហ្មង ផ្ទះអ៊ី! ចូលមកសុទ្ធតែសំរាមទាំងអស់ លិចសុទ្ធតែទឹកស្អុយ»។
បើតាមអ្នកស្រី សាង គឹមផា ប្រាប់ថា ដោយសារតែនៅក្នុងប្រឡាយមានសំរាមច្រើន បានធ្វើឱ្យបិទផ្លូវទឹកមិនឱ្យហូរបាន និងធ្វើឱ្យប្រឡាយកាន់តែរាក់ទៅៗ ដែលងាយនឹងជន់លិចផ្ទះពលរដ្ឋរស់នៅតាមដងប្រឡាយនេះ។
ករណីនេះ អ្នកស្រីបានអំពាវនាវឱ្យអាជ្ញាធរពន្លឿនក្នុងការប្រមូលសំរាមទាំងនោះចេញ ហើយមានវិធានការយ៉ាងណាកុំឱ្យកើតឡើងជាបន្តទៀត។
អ្នកស្រីថា៖ «បើបានពួកគាត់មកជួយអ៊ីចឹងទៅ យើងវាបំបាត់ការធុំក្លិនអ៊ីចឹងទៅ។ តែភ្លៀងមកតិចៗ វាជន់លិចពេញៗទាំងអស់ហ្នឹង [ប្រឡាយ] រាក់ទៅៗ»។
ចំណែកពលរដ្ឋរស់នៅភូមិព្រែកទាល់ម្នាក់ទៀត លោក គឹម ភ័ត្រា វ័យ៣៣ឆ្នាំ បានត្អូញត្អែរដែរថា ក្លិនស្អុយដែលជះចេញពីកន្លែងសំរាមកកស្ទះនោះ ធ្វើឱ្យប៉ះពាល់ដល់សុខភាពរបស់អ្នកភូមិដែលរស់នៅតំបន់នោះ។
លោកថា៖ «ប៉ះពាល់ វាដឹងតែប៉ះពាល់! ពេលខ្លះមានក្លិនមក! ពេលខែភ្លៀង ស្អុយម៉ាទំហឹងដែរ! មិនមែនអត់ស្អុយណា ឱ្យតែភ្លៀងខ្លាំងលិច»។
ស្លៀកខោខ្លីត្រឹមជង្គង់ លោក គឹម ភ័ត្រា ដែលកំពុងអង្គុយក្បែរកន្លែងកកស្ទះសំរាម លើកឡើងថា លោកបារម្ភពីសុខភាពកូនៗ ព្រោះក្លិនសំរាម។ លោកជំរុញឱ្យអាជ្ញាធរមានវិធានការប្រមូលសំរាមទាំងនោះចេញ។
លោកស្នើថា៖ «ឱ្យគាត់[អាជ្ញាធរ] មកប្រមូលឱ្យលឿនក៏វាល្អដែរ វាជួយកុំឱ្យកកនៅហ្នឹង! ហើយពេលខ្លះ អាសំរាមថង់ៗនៅហ្នឹង ក៏វាមានជាតិស្អុយ ក្លិនក៏វាភាយមកលើអ៊ីចឹងទៅ បានជួយឱ្យលឿនក៏វាល្អ»។
ចំណែកពលរដ្ឋមួយរូបទៀត លោក តាំង សុខអូន មានវ័យ៤០ឆ្នាំ សង្កេតឃើញថា មូលហេតុដែលនាំឱ្យមានសំរាមច្រើននៅតំបន់នោះ ដោយសារពលរដ្ឋមួយចំនួនមិនបានវេចខ្ចប់ទុកដាក់សំរាមឱ្យមានត្រឹមត្រូវនៅឡើយ ហើយតែងតែយកសំរាមទៅបោះចោលតាមរយៈដងប្រឡាយនេះជាប្រចាំ ដែលធ្វើឱ្យសំរាមទាំងនោះបានហូរមកប្រមូលផ្ដុំគ្នានៅទីនេះ។
លោក តាំង សុខអូន និយាយថា៖ «បើប្រជាជនយកសំរាមមកបោះក៏មាន។ និយាយទៅ មនុស្សអត់ចេះសម្អាតជួយគ្នា មកពីណាទំលាក់ក៏មាន អាយកមកទំលាក់ចូលក្នុង [ប្រឡាយ] នេះក៏មាន»។
កាលពីដើមឆ្នាំ២០២១ រដ្ឋាភិបាលបានធ្វើកំណែទម្រង់គោលនយោបាយ «ភូមិ-ឃុំ-សង្កាត់-មានសុវត្ថិភាព» ដោយដាក់បញ្ចូលកិច្ចការថែរក្សាបរិស្ថាន ដើម្បីគ្រប់គ្រងសំរាម ថែរក្សាអនាម័យ បរិស្ថាន និងសុខុមាលភាពប្រជាពលរដ្ឋ។ តាមរយៈគោលនយោបាយថ្មីនេះ រដ្ឋាភិបាលរំពឹងថានឹងជំរុញឱ្យមានការដោះស្រាយបញ្ហាកាកសំណល់គ្រប់ប្រភេទនៅទូទាំងប្រទេស។
ក្នុងឯកសារគោលនយោបាយបញ្ជាក់ថា៖ «មានវិធានការក្នុងការគ្រប់គ្រងថែរក្សា និងការពារធនធានធម្មជាតិ និងបរិស្ថានអនាម័យ ក្នុងភូមិ-ឃុំ-សង្កាត់ ប្រកបដោយប្រសិទ្ធភាព ជាពិសេសយន្តការដោះស្រាយបញ្ហាសំរាម សំណល់រឹង និងសំណល់រាវ សំដៅធ្វើឱ្យភូមិ-ឃុំ-សង្កាត់ មានសោភ័ណភាព គ្មានសំរាម ធ្វើឱ្យការរស់នៅប្រកបដោយផាសុកភាព មានភាពថ្លៃថ្នូរ ស៊ីវិល័យ និងមានអនាគតរុងរឿង ផ្អែកតាមគោលការណ៍ណែនាំរបស់ក្រសួងបរិស្ថាន និងក្រសួងស្ថាប័នពាក់ព័ន្ធ»។
បើតាមឯកសារស្ដីពីគោលនយោបាយ «ភូមិ-ឃុំ-សង្កាត់-មានសុវត្ថិភាព» ក៏បានតម្រូវឱ្យអាជ្ញាធរ ពាក់ព័ន្ធរៀបចំវេទិកាសាធារណៈ យ៉ាងហោចណាស់មួយដងក្នុងមួយខែ ដើម្បីទទួលយកសំណើរបស់ប្រជាពលរដ្ឋ និងជំរុញឱ្យអាជ្ញាធរដោះស្រាយបញ្ហានានាដែលកើតមានក្នុងមូលដ្ឋានឱ្យបានឆាប់រហ័ស។
យ៉ាងណាក្ដី ពាក់ព័ន្ធករណីសំរាមកកស្ទះជាច្រើនខែនៅក្នុងប្រឡាយស្ទឹងមានជ័យ ចៅសង្កាត់ស្ទឹងមានជ័យ២ លោក ទូច សំអុល បានឆ្លើយតបថា លោកបានដឹងពីករណីសំរាមនេះរួចហើយ និងបានរាយការណ៍ទៅថ្នាក់លើរួចហើយដែរ។ ប៉ុន្តែលោកថា អាជ្ញាធររវល់ការងារច្រើន ទើបមិនទាន់មានចំណាត់ការប្រមូលសំរាមនេះចេញនៅឡើយ។
លោក ទូច សំអុល បញ្ជាក់ថា៖ «ខ្ញុំឃើញដែរ ប៉ុន្តែការងារសំរាមហ្នឹង សង្កាត់បានធ្វើការទប់ស្កាត់ច្រើនណាស់ បានធូរស្រាលមួយចំនួនហើយ បានរាយការណ៍ទៅខាងស៊ីនទ្រី ទៅខណ្ឌទៅអីហើយ។ មួយរយៈនេះ គេអត់សូវបានកាយ ដោយសារមួយរយៈនេះគេរវល់ មានការងារច្រើន អត់ទាន់បានធ្វើ»។
ចៅសង្កាត់ស្ទឹងមានជ័យ២រូបនេះបន្ថែមថា មូលហេតុដែលអាជ្ញាធរនៅថ្នាក់មូលដ្ឋាន មិនអាចកាយសំរាមនោះចេញដោយផ្ទាល់បាន គឺដោយសារតែមិនមានឧបករណ៍គ្រប់គ្រាន់ ដូច្នេះបានត្រឹមតែរាយការណ៍ទៅថ្នាក់លើ និងផ្សព្វផ្សាយឱ្យពលរដ្ឋទុកដាក់សំរាមឱ្យបានត្រឹមត្រូវតែប៉ុណ្ណោះ។
លោក ទូច សំអុល ថា៖ «សង្កាត់អត់មានឧបករណ៍អីធ្វើទេ! គ្រាន់តែថាជួយផ្សព្វផ្សាយឱ្យប្រជាពលរដ្ឋនៅក្នុងភូមិដាក់សំរាមដាក់អី [ឱ្យបានត្រឹមត្រូវ] អាហ្នឹងមានធ្វើបានហើយ។ ប៉ុន្តែអាក្នុងប្រឡាយហ្នឹង កិច្ចការរបស់សាលារាជធានីភ្នំពេញ ដែលលោកគាត់ចាត់ការប្រឡាយហ្នឹង ខាងសង្កាត់យើងវាតូចតាច មិនមានឧបករណ៍ណាធ្វើ មានតែរាយការណ៍ជូនទៅខណ្ឌទៅក្រុងអ៊ីចឹងទៅ»។
អភិបាលរងខណ្ឌមានជ័យ លោក ឡុង ង៉ែត មានប្រសាសន៍ថា អាជ្ញាធរខណ្ឌមិនទាន់ទទួលបានព័ត៌មានករណីសំរាមកកស្ទះនេះនៅឡើយទេ។
ទោះយ៉ាងណា ក្រោយពេលទទួលបានព័ត៌មាននេះ លោកថា នឹងប្រាប់បន្តឱ្យមន្ទីរសាធារណការរាជធានីភ្នំពេញ មកកាយសំរាមទាំងនោះចេញ។
លោក ឡុង ង៉ែត និយាយថា៖ «នៅម្ដុំណា? ចាំខ្ញុំរាយការណ៍ទៅលើមួយចំនួនទៀត ខ្ញុំអត់កាន់ខាងហ្នឹងទេ ខ្ញុំអភិបាលរងខណ្ឌ ប៉ុន្តែបងបានផ្ដល់ព័ត៌មាន ខ្ញុំសូមអរគុណ។ ចាំខ្ញុំរាយការណ៍ទៅលោកអភិបាលខណ្ឌ ហើយឱ្យអភិបាលខណ្ឌគាត់រាយការណ៍ទៅមន្ទីរសាធារណការ ព្រោះក្នុងកណ្ដាលប្រឡាយ មន្ទីរសាធារណការ គាត់ជាអ្នកស្ដារ[ប្រឡាយ]»។
កាលពីថ្ងៃទី១ ខែមីនា ក្រុមយុវជនបរិស្ថានចំនួន៦នាក់បានយកលិខិតដែលមានស្នាមមេដៃគាំទ្រដោយយុវជនជាង៥០នាក់ផ្សេងទៀត ទៅដាក់នៅខណ្ឌចំនួន៣ រួមមាន ខណ្ឌឫស្សីកែវ ខណ្ឌចំការមន និងខណ្ឌមានជ័យ ដើម្បីទាមទារឱ្យអាជ្ញាធរពាក់ព័ន្ធជួយដោះស្រាយការកកស្ទះសំរាមនៅតាមបណ្ដោយលូ ខណៈពួកគេព្រួយបារម្ភពីផលប៉ះពាល់បរិស្ថាន និងសុខភាពពលរដ្ឋរស់នៅតំបន់ទាំងនោះ។
សកម្មជនបរិស្ថាន កញ្ញា ភួន កែវរស្មី ដែលចូលរួមដាក់លិខិតដែរនោះ សង្កេតឃើញថា វិធានការនានា រួមទាំងគោលនយោបាយរបស់រដ្ឋាភិបាល ដែលបានដាក់ចេញដើម្បីដោះស្រាយបញ្ហាសំរាមនាពេលកន្លងមក ហាក់មិនទាន់មានប្រសិទ្ធភាពនោះទេ ដែលធ្វើឱ្យបញ្ហាសំរាមនៅតែកើតមានឡើងជារៀងរាល់ថ្ងៃ។
កញ្ញា ភួន កែវរស្មី ថ្លែងថា៖ «យើងមើលឃើញថា វា[សំរាម]កើនឡើងពីមួយថ្ងៃទៅមួយថ្ងៃ វាស្ថិតនៅក្នុងស្ថានភាពមួយគួរឱ្យបារម្ភ ដែលគួរតែជាបញ្ហាអាទិភាព ដែលខាងខណ្ឌឬអភិបាលនៅក្រុងភ្នំពេញ គាត់យកចិត្តទុកឱ្យបានខ្លាំងជាងហ្នឹង»។
កញ្ញាបន្ថែមថា បើសំរាមនៅតែបន្តកើតមាននៅទីសាធារណៈនានា ហើយមិនទាន់មានដំណោះស្រាយចេញនោះទេ នឹងបង្កផលប៉ះធ្ងន់ធ្ងរដល់បរិស្ថាន សោភ័ណភាពទីក្រុង និងសុខភាពសាធារណៈ ជាដើម។
កញ្ញា ភួន កែវរស្មី បានជំរុញឱ្យរដ្ឋាភិបាលយកចិត្តទុកដាក់បន្ថែមទៀតចំពោះករណីនេះ និងលើកទឹកចិត្តឱ្យគ្រប់ភាគីពាក់ព័ន្ធចូលរួមទទួលខុសត្រូវចំពោះបញ្ហាសំរាមទាំងអស់គ្នា។
កញ្ញា ភួន កែវរស្មី បន្ថែមថា៖ «ខ្ញុំមានតែលើកទឹកចិត្ត ហើយនឹងជំរុញឱ្យគ្រប់ភាគីទាំងអស់ ទាំងក្រុមហ៊ុនសំរាម ទាំងអាជ្ញាធរដែលពាក់ព័ន្ធ មានសមត្ថកិច្ច ក្រសួងនានាដែលពាក់ព័ន្ធ ទាំងប្រជាពលរដ្ឋ ទាំងយុវជន ទាំងនាងខ្ញុំផ្ទាល់ គឺចូលរួមទាំងអស់គ្នា សហការគ្នា ដើម្បីឱ្យបញ្ហាហ្នឹងវាល្អប្រសើរ»។
របាយការណ៍របស់ក្រសួងបរិស្ថាន បានបង្ហាញថា កម្ពុជាមានសំរាមជាង១ម៉ឺនតោនក្នុងមួយថ្ងៃៗ ដោយក្នុងរាជធានីភ្នំពេញមានសំរាមជិត៣ ០០០តោន ចំណែកការប្រើប្រាស់ប្លាស្ទិកមានប្រមាណជាង១០លានថង់ក្នុងមួយថ្ងៃៗ ហើយបរិមាណសំរាមនៅទូទាំងប្រទេសវិញ មានជិត៤លានតោនក្នុងមួយថ្ងៃ៕