កិច្ចប្រជុំកំពូលអាស៊ាន-អាមេរិក ឬ Special ASEAN-US Summit ដែលគ្រោងធ្វើនៅចុងខែមីនានេះ ត្រូវបានលើកពេលជាផ្លូវការ។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានបញ្ជាក់នៅព្រឹកថ្ងៃទី១០ ខែមីនានេះថា កិច្ចប្រជុំកំពូលអាស៊ាន-អាមេរិកដែលគ្រោងធ្វើនៅសហរដ្ឋអាមេរិក នាថ្ងៃទី២៨-២៩ ខែមីនានេះ ត្រូវបានលើកពេល ដោយសារតែថ្នាក់ដឹកនាំប្រទេសជាសមាជិកអាស៊ានមួយចំនួនជាប់រវល់។
យ៉ាងណាក្ដី ឥណ្ឌូនេស៊ី ដែលជាប្រទេសសម្របសម្រួលទំនាក់ទំនងដៃគូសន្ទនារវាងអាស៊ាននិងសហរដ្ឋអាមេរិក កំពុងខិតខំសម្របសម្រួល ដើម្បីកំណត់កាលបរិច្ឆេទថ្មីដែលអាចទទួលយកបានដោយថ្នាក់ដឹកនាំអាស៊ានទាំងអស់។
លោកបន្តថា សម្រាប់កម្ពុជា ក្នុងនាមជាប្រធានអាស៊ាន បានគាំទ្រការលើកពេលកិច្ចប្រជុំនេះ ប៉ុន្តែបានអះអាងថា កម្ពុជាប្រកាន់យកភាពបត់បែនទៅលើកាលបរិច្ឆេទដែលបានស្នើឡើង និងបានធ្វើការសម្របសម្រួល ជាពិសេសទៅលើរបៀបវារៈនៅក្នុងប្រទេស ដើម្បីបំពេញកាតព្វកិច្ចរបស់ខ្លួនក្នុងតំបន់និងអន្តរជាតិ។
លោក ជុំ សុន្ទរី បានសរសេរតាមរយៈសារអេឡិចត្រូនិចតេឡេក្រាមថា៖ «គួរឱ្យសោកស្ដាយ កាលបរិច្ឆេទដែលបានស្នើឡើង គឺមិនសមស្របសម្រាប់ថ្នាក់ដឹកនាំ [អាស៊ាន] ដោយសារភាពជាប់រវល់ច្រើនរបស់ថ្នាក់ដឹកនាំ។ ដោយហេតុនេះហើយ ភាគីទាំងសងខាង អាស៊ាននិងសហរដ្ឋអាមេរិកបានសម្រេចលើកពេលកិច្ចប្រជុំកំពូលនេះ និងបន្តធ្វើការដើម្បីស្វែងរកកាលបរិច្ឆេទដែលសមស្របសម្រាប់ភាគីទាំងសងខាង»។
សហរដ្ឋអាមេរិកបានប្រកាសកាលពីថ្ងៃទី២៨ ខែកុម្ភៈ ថាកិច្ចប្រជុំកំពូលអាស៊ាន-អាមេរិកនឹងធ្វើឡើងនៅវិមានប្រធានាធិបតីអាមេរិក (White House) នៃរដ្ឋធានីវ៉ាស៊ីនតោនសហរដ្ឋអាមេរិក នៅថ្ងៃទី២៨-២៩ ខែមីនានេះ។
មន្ត្រីទទួលបន្ទុកផ្នែកព័ត៌មានប្រចាំវិមានប្រធានាធិបតីអាមេរិក អ្នកស្រី Jen Psaki បានប្រកាសថា ប្រធានាធិបតីអាមេរិកនឹងស្វាគមន៍មេដឹកនាំអាស៊ាននៅរដ្ឋធានីវ៉ាស៊ីនតោននៃសហរដ្ឋអាមេរិក នៅថ្ងៃទី២៨ និង២៩ ខែមីនាខាងមុខនេះ។ ប៉ុន្តែលិខិតនេះបញ្ជាក់ថា អាមេរិកនឹងគោរពតាមការសម្រេចរបស់អាស៊ាន ដែលថា កិច្ចប្រជុំនេះនឹងមិនអញ្ជើញមេដឹកនាំរបបយោធាភូមា លោក មីន អ៊ុងឡាំង ចូលរួមប្រជុំកិច្ចប្រជុំកំពូលនេះឡើយ៕
