រដ្ឋមន្ត្រីការបរទេសអ៊ុយក្រែន លោក Dmytro Kuleba បានធ្វើដំណើរមកដល់ប្រទេសតួកគីហើយ ដើម្បីជួបពិភាក្សាជាមួយរដ្ឋមន្ត្រីការបរទេសរុស្ស៊ី លោក Sergei Lavrov នៅថ្ងៃព្រហស្បតិ៍នេះ ទាក់ទងនឹងវិបត្តិរវាងប្រទេសទាំងពីរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
យោងតាមក្រសួងការបរទេសអ៊ុយក្រែនបានឱ្យដឹងតាមរយៈបណ្ដាញសង្គមធ្វីតទ័រ (Twitter) ថា៖ «លោក Dmytro Kuleba បានធ្វើដំណើរទៅកាន់ប្រទេសតួកគី ជាទីតាំងដែលរូបលោកនឹងចូលរួមក្នុងកិច្ចចរចាទាក់ទងនឹងទៅការបញ្ចប់សង្គ្រាមដែលបង្កឡើងដោយរុស្សីលើអ៊ុយក្រែន»។
គួរបញ្ជាក់ថា ជំនួបរវាងរដ្ឋមន្ត្រីការបរទេសនៃប្រទេសទាំងពីរនៅពេលនេះ គឺជាការជួបចរចាក្នុងកម្រិតខ្ពស់ជាលើកដំបូង គិតចាប់តាំងពីរុស្ស៊ីបានបើកការវាយប្រហារទ្រង់ទ្រាយធំលើអ៊ុយក្រែនកាលពីខែមុន ខណៈដែលតួកគីជាម្ចាស់ផ្ទះសង្ឃឹមថា ខ្លួនអាចនឹងជួយសម្របសម្រួលដល់ភាគីទាំងពីរក្នុងការឈានដល់ដំណោះស្រាយរួមមួយ។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចល័តទ័ពរបស់ខ្លួនចូលមកកាន់ប្រទេសនៅតំបន់អឺរ៉ុបមួយនេះ។
ទោះជាយ៉ាងណា ការឈ្លានពានពីសំណាក់រុស្ស៊ីនេះ នៅមិនទាន់សម្រេចបាននូវគោលបំណងរបស់ប្រធានាធិបតីរបស់ខ្លួនក្នុងការផ្ដួលរំលំរដ្ឋាភិបាលអ៊ុយក្រែននោះទេ៕
