ក្រសួងសុខាភិបាលបានប្រកាសរកឃើញអ្នកឆ្លងកូវីដ-១៩ ប្រភេទ»អូមីក្រុង» ចំនួនជាង ២០០ករណីបន្ថែមទៀត ដោយចំនួននេះមានការថយចុះ១ករណីប៉ុណ្ណោះ បើធៀបនឹងការប្រកាសរកឃើញរបស់ក្រសួងកាលពីម្សិលមិញ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១១ ខែមីនា ឆ្នាំ២០២២ បានឱ្យដឹងថា កាលពីម្សិលមិញ បានរកឃើញមានអ្នកជំងឺកូវីដ-១៩ ប្រភេទបំប្លែងខ្លួន «អូមីក្រុង»ចំនួន ២៣៧នាក់។ អ្នកជំងឺដែលរកឃើញឆ្លងថ្មីទាំងនោះ មាន ២០៧ករណី ជាការរកឃើញឆ្លងចូលក្នុងសហគមន៍ និង៣០ករណីទៀត ជាការនាំចូលពីក្រៅប្រទេស។ ជាមួយគ្នានេះ ក្រសួងបញ្ជាក់ថាមានករណីស្លាប់ថ្មីម្នាក់ ខណៈអ្នកជំងឺព្យាបាលជាសះស្បើយថ្មីមានចំនួន៣០៥នាក់ផងដែរ។
កាលពីថ្ងៃព្រហស្បតិ៍ម្សិលមិញក្រសួងបានប្រកាសរកឃើញករណីឆ្លងថ្មីចំនួន២៣៨នាក់ និងស្លាប់ថ្មីចំនួន១នាក់ ហើយករណីនាំចូលពីក្រៅប្រទេសមានចំនួន២៤នាក់ និងឆ្លងក្នុងសហគមន៍ចំនួន ២១៤នាក់។
ក្រសួងបញ្ជាក់ថា មកទល់ព្រឹកថ្ងៃសុក្រនេះ កម្ពុជារកឃើញករណីជំងឺកូវីដ-១៩ប្រភេទបំប្លែងខ្លួន «អូមីក្រុង» បានឆ្លងចូលទៅក្នុងសហគមន៍មានចំនួនសរុប ១២ ១១៩ករណី។
កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួន «អូមីក្រុង» ជាលើកដំបូង កាលពីថ្ងៃទី ១៤ខែធ្នូ ឆ្នាំ២០២១ លើស្ត្រីខ្មែរម្នាក់ ដែលធ្វើដំណើរពីប្រទេសហ្គាណា នៃតំបន់អាហ្វ្រិកខាងលិច មកកម្ពុជា។
គិតត្រឹមព្រឹកថ្ងៃសុក្រដដែលនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៣ ៧៣៨នាក់ ក្នុងនោះ អ្នកជំងឺព្យាបាលជាសះស្បើយចំនួន១២៨ ៣០០នាក់ អ្នកស្លាប់ចំនួន៣ ០៤៥នាក់ និងករណីនាំចូលពីក្រៅប្រទេសចំនួន ២១ ០៣៥នាក់៕
