ថ្លែងក្នុងពិធីបិទសន្និបាតប្រចាំឆ្នាំរបស់ខេត្តព្រះសីហនុ រដ្ឋមន្ត្រីក្រសួងមហាផ្ទៃ លោក ស ខេង បានឱ្យដឹងថា បញ្ហាសណ្ដាប់ធ្នាប់និងសន្តិសុខដែលបន្តកើតឡើងឥតឈប់ឈរ គឺជាករណីដែលតម្រូវឱ្យមានការដោះស្រាយជាបន្ទាន់។
យោងតាមវីដេអូនៃពិធីខាងលើ កាលពីថ្ងៃពុធ ដែលត្រូវបានបង្ហោះដោយលោក ស ខេង រដ្ឋមន្ត្រីក្រសួងមហាផ្ទៃរូបនេះ បានធ្វើការលើកឡើងពីករណីចាប់ជំរិត ឆក់ ប្លន់ ឃាតកម្ម ការធ្វើទារុណកម្ម និងឧក្រិដ្ឋកម្មគ្រឿងញៀន ជាដើម ខណៈដែលលោកថា ករណីទាំងនេះចាំបាច់ត្រូវតែលុបបំបាត់ឱ្យអស់មុនការបោះឆ្នោតឃុំ-សង្កាត់ឈានចូលមកដល់ក្នុងខែមិថុនាខាងមុខ។
លោកថា មន្រ្តីនគរបាលខេត្តបានបញ្ជូនព័ត៌មាននានាទាក់ទងនឹងឧក្រិដ្ឋកម្មដល់រូបលោក ដោយលោកមើលឃើញថា ករណីទាំងនោះពិតជាឃោរឃៅខ្លាំងណាស់។
រដ្ឋមន្ត្រីក្រសួងមហាផ្ទៃរូបនេះបន្តថា៖ «ពេលខ្លះ ខ្ញុំមិនចង់មើលនោះទេ ប៉ុន្តែចៀសមិនរួច ដោយខ្ញុំត្រូវតែពិនិត្យលើករណីទាំងនោះ។ រូបភាពទាំងអស់នោះពិតជាសាហាវខ្លាំងណាស់ ហើយករណីទាំងនេះក៏កំពុងតែត្រូវបានផ្សព្វផ្សាយដល់ពិភពលោកទាំងមូលផងដែរ ថាកម្ពុជាមិនល្អ ដោយមានការលួច ឆក់ ប្លន់ ចាប់ជំរិត គំរាមគំហែង និងហិង្សាគ្រប់កន្លែង។ វាមិនប៉ះពាល់ត្រឹមតែកេរ្តិ៍ឈ្មោះរបស់ខេត្តព្រះសីហនុតែមួយប៉ុណ្ណោះទេ»។
លោក ស ខេង បន្តថា ដំបូងឡើយ វាមិនចាំបាច់សម្រាប់លោកក្នុងការធ្វើជាអធិបតីក្នុងពិធីនេះនោះទេ ប៉ុន្តែវាមានចំណុចសំខាន់មួយដែលតម្រូវឱ្យរូបលោកត្រូវតែចូលរួម។
លោកថា៖ «បញ្ហាសន្តិសុខ សណ្ដាប់ធ្នាប់ ជាពិសេសឧក្រិដ្ឋកម្ម នៅតែកើតមានជាបន្តបន្ទាប់ឥតឈប់ឈរ ហើយបញ្ហាទាំងនេះជះឥទ្ធិពលអាក្រក់ដល់កេរ្តិ៍ឈ្មោះខេត្តព្រះសីហនុរបស់យើង»។
លោក ស ខេង បានឱ្យដឹងទៀតថា ក្នុងករណីដែលមានការបំផ្លើសតាមប្រព័ន្ធផ្សព្វផ្សាយ និងដោយគ្មានការបំភ្លឺច្បាស់លាស់ទៀតនោះ ព័ត៌មាននេះអាចក្លាយជាការពិត ដែលធ្វើឱ្យមនុស្សគ្រប់គ្នាជឿជាក់បាន។
កាលពីខែមុន មានករណីជនរងគ្រោះដែលត្រូវគេបង្ខំឱ្យធ្វើការងារមួយរូប បានលើកឡើងថា ឈាមរបស់លោកត្រូវបានគេបូមយកទៅលក់បន្ទាប់ពីខ្លួនបដិសេធមិនធ្វើការឱ្យពួកគេ។
បន្ទាប់ពីមានការលើកឡើងនេះ អគ្គស្នងការដ្ឋាននគរបាលជាតិ ថ្លែងថា ខ្លួនបានបើកការស៊ើបអង្កេត ហើយរកឃើញថារឿងនេះជាការប្រតិដ្ឋព័ត៌មានឡើងតែប៉ុណ្ណោះ។
ក្នុងសប្ដាហ៍នេះ សមត្ថកិច្ចថៃក៏បានរាយការណ៍ពីករណីបង្ខាំងមនុស្សឱ្យធ្វើជាទាសករបូមឈាមផ្សេងទៀតនៅកម្ពុជាផងដែរ។ ទោះជាយ៉ាងណា សមត្ថកិច្ចកម្ពុជាបានច្រានចោលករណីនេះ ដោយបានចាត់ទុកថា ជារឿងដ៏គួរឱ្យអស់សំណើចមួយ។
លោក ស ខេង បានបន្ថែមថា កិច្ចសហប្រតិបត្តិការជាមួយមន្រ្តីនគរបាលចិនក៏ធ្លាប់ត្រូវបានពិភាក្សាកាលពីពេលកន្លងទៅ ប៉ុន្តែការចរចាមិនទទួលបានលទ្ធផលនោះទេ ដោយសារតែអាជ្ញាធរចិនចង់ធ្វើការចាប់ខ្លួនដោយពួកគេផ្ទាល់នៅកម្ពុជា។
លោកថា៖ «យើងមិនមានការយល់ស្របគ្នានោះទេ។ ពួកគេ [ភាគីចិន] បានស្នើដើម្បីធ្វើការចាប់ខ្លួនដោយផ្ទាល់។ ពួកគេមិនចង់ត្រឹមតែផ្ដល់ព័ត៌មានប៉ុណ្ណោះទេ ប៉ុន្តែពួកគេថែមទាំងចង់មកចាប់ខ្លួនដោយពួកគេផ្ទាល់ថែមទៀតផង។ អ្វីដែលយើងចង់បាននោះ គឺយើងចង់ឱ្យពួកគេផ្ដល់នូវព័ត៌មាន ដូចជា ដីកា ឯកសារ និងគោលដៅណាមួយដែលពួកគេកំណត់ថាជាជនល្មើស ដើម្បីអាចឱ្យយើងធ្វើការចាប់ខ្លួនបានដូចអ្វីដែលយើងកំពុងតែធ្វើនៅពេលបច្ចុប្បន្ន។ នេះជាអ្វីដែលយើងចង់បាន»។
លោកបន្តថា វាពាក់ព័ន្ធនឹងអធិបតេយ្យភាព ហើយប្រសិនបើកម្ពុជាផ្ដល់សិទ្ធិនេះដល់ចិន នោះកម្ពុជាក៏នឹងត្រូវប្រគល់សិទ្ធិដូចគ្នានេះឱ្យទៅប្រទេសផ្សេងទៀតផងដែរ។
លោក ស ខេង បន្ថែមថា៖ «យើងទាំងអស់គ្នាត្រូវតែប្ដេជ្ញាចិត្ត ដើម្បីបញ្ចប់បញ្ហាឧក្រិដ្ឋកម្មដែលកើតឡើងនៅខេត្តព្រះសីហនុ។ នេះជាការប្ដេជ្ញាចិត្តរបស់យើង។ មុនការបោះឆ្នោតឃុំ-សង្កាត់ឈានចូលមកដល់ យើងត្រូវតែខិតខំប្រឹងប្រែងធ្វើយ៉ាងណា ដើម្បីបញ្ចប់ករណីទាំងនេះ។ បើទោះបីជាវាមិនអាចសម្រេចបាន ១០០ភាគរយ ក៏យើងត្រូវតែទប់ស្កាត់កុំឱ្យករណីនេះកើតឡើងក្នុងចំនួនច្រើនផងដែរ ព្រោះយើងមើលឃើញថា វាពិតជាសាហាវខ្លាំងណាស់»។
ទាក់ទិនករណីនេះ អភិបាលខេត្តព្រះសីហនុ លោក គួច ចំរើន ក៏បានឱ្យដឹងផងដែរថា កិច្ចប្រជុំមួយស្ដីពីបញ្ហាសន្តិសុខកាលពីពេលថ្មីៗនេះ បានកំណត់បញ្ហាសំខាន់ៗចំនួន៣។
លោកថា៖ «ទីមួយ ការបន្តកើតឡើងនៃឧក្រិដ្ឋកម្មចាប់ជំរិត ការឃុំខ្លួនដោយខុសច្បាប់ និងអំពើហិង្សាប្រដាប់អាវុធ។ ទីពីរ ការផ្សព្វផ្សាយតាមប្រព័ន្ធផ្សព្វផ្សាយ និងបណ្ដាញសង្គម ដែលប្រតិដ្ឋនិងបំផ្លើសព័ត៌មាន។ ទីបី ជនដែលបន្តមកប្រព្រឹត្ត ធ្វើឱ្យខូចដល់កិត្តិយសនិងកេរ្តិ៍ឈ្មោះរបស់រដ្ឋបាលខេត្ត»។
ទាក់ទិនករណីនេះ អគ្គស្នងការដ្ឋាននគរបាលជាតិ នឹងធ្វើការជាមួយរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ដើម្បីគ្រប់គ្រងអាជីវកម្មល្បែងស៊ីសង ខណៈដែលនាយកដ្ឋានអន្តោប្រវេសន៍ នឹងធ្វើការប្រយុទ្ធប្រឆាំងការជួញដូរមនុស្ស។
ជាមួយគ្នានេះដែរ រដ្ឋបាលខេត្តនឹងបង្កើតក្រុមព័ត៌មានជាភាសាចិនមួយ ដើម្បីបំភ្លឺការពិតដល់ជនជាតិចិនទាំងឡាយ និងជួបជាមួយសមាគមចិនឱ្យបានទៀងទាត់ផងដែរ។
លោក គួច ចំរើន បន្តថា រដ្ឋបាលខេត្តនឹងស្នើឱ្យតុលាការផ្ដន្ទាទោសយ៉ាងតឹងរ៉ឹងប្រឆាំងនឹងការកាន់កាប់អាវុធខុសច្បាប់ ការជួញដូរគ្រឿងញៀន ឃាតកម្ម ការជួញដូរមនុស្ស ការចាប់ជំរិត និងជំរិតទារប្រាក់ផងដែរ។
យោងតាមស្ថិតិដែលចេញដោយប្រធានក្រុមប្រឹក្សាខេត្តព្រះសីហនុ លោក សូ ជុងហូរ បានឱ្យដឹងថា ឧក្រិដ្ឋកម្មបានធ្លាក់ចុះក្នុងឆ្នាំ២០២១ រួមទាំងការថយចុះ ១៨ភាគរយនៃបទឧក្រិដ្ឋ និង ៤៨ភាគរយនៃការជួញដូរមនុស្សនិងការកេងប្រវ័ញ្ចផ្លូវភេទ។
យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក ក៏បានឱ្យដឹងផងដែរថា ក្នុងរយៈពេលពីរខែដំបូងនៃឆ្នាំ២០២២នេះ យ៉ាងហោចណាស់មានសាកសពស្លាប់ដោយជាប់ខ្នោះចំនួនពីរត្រូវបានប្រទះឃើញ ខណៈដែលការបាញ់ប្រហារនិងឃាតកម្មមាន៥ករណី និងមានការចាប់ខ្លួនមនុស្សចំនួន៦នាក់ពីបទចាប់ជំរិតផងដែរ ក្នុងខេត្តព្រះសីហនុ៕
បកប្រែនិងសម្រួលដោយលោក ភុន ច័ន្ទឧសភា ចេញពីអត្ថបទដើមភាសាអង់គ្លេស៖ Interior Minister Urges Crackdown on Sihanoukville Crime
