ក្រសួងរៀបចំដែនដី នគរូបនីយកម្ម និងសំណង់ បានជំរុញទៅអង្គភាពប្រឆាំងអំពើពុករលួយ ឬ ACU ឱ្យបន្តចាត់វិធានការចំពោះមន្ត្រីរាជការស៊ីវិល និងកងកម្លាំងដែលបានចូលរួមប្រព្រឹត្តបទល្មើសទន្ទ្រានដីព្រៃលិចទឹកនៅតំបន់ទន្លេសាប។
ការជំរុញនេះធ្វើឡើង ក្រោយរដ្ឋមន្ត្រីក្រសួងរៀបចំដែនដី លោក ជា សុផារ៉ា បានដឹកនាំកិច្ចប្រជុំអន្តរក្រសួងតាមប្រព័ន្ធអនឡាញ ដែលមានការចូលរួមពីប្រធានអង្គភាពប្រឆាំងអំពើពុករលួយ រដ្ឋមន្ត្រីក្រសួងកសិកម្ម ព្រមទាំងស្ថាប័នពាក់ព័ន្ធ ដើម្បីត្រួតពិនិត្យលទ្ធផលនៃការអនុវត្តវិធានការបង្ក្រាបការទន្ទ្រានដីរដ្ឋក្នុងដែនព្រៃលិចទឹកនៃតំបន់ទន្លេសាប តបតាមបញ្ជារបស់លោកនាយករដ្ឋមន្ត្រី ហ៊ុន សែន កាលពីថ្ងៃទី២៨ ខែវិច្ឆិកា ឆ្នាំ២០២១។ នេះបើយោងតាមរយៈសេចក្ដីប្រកាសព័ត៌មានរបស់ក្រសួងរៀបចំដែនដី កាលពីថ្ងៃទី១០ ខែមីនានេះ។
ប្រភពដដែលបានប្រាប់ឱ្យរដ្ឋបាលខេត្តពាក់ព័ន្ធទាំងអស់ ត្រូវបន្តជំរុញនីតិវិធីតុលាការលើករណីសំណុំរឿងបទល្មើសទន្ទ្រានកាន់កាប់ដីរដ្ឋក្នុងដែនព្រៃលិចទឹកនៅតំបន់ទន្លេសាប ហើយព្រះរាជអាជ្ញាអមសាលាដំបូងខេត្តត្រូវបន្តជួយជំរុញការអនុវត្តនីតិវិធីក្រោយពេលទទួលបានបណ្ដឹង។
ក្រសួងរៀបចំដែនដី គូសបញ្ជាក់ថា៖ «អង្គភាពប្រឆាំងអំពើពុករលួយ ត្រូវបន្តចាត់វិធានការចំពោះមន្ត្រីស៊ីវិលនិងកងកម្លាំងដែលបានចូលរួមប្រព្រឹត្តបទល្មើសទន្ទ្រានដែនព្រៃលិចទឹកនៃតំបន់ទន្លេសាប»។
លិខិតដដែលបញ្ជាក់ថា បានឃាត់ខ្លួនអ្នកពាក់ព័ន្ធបទល្មើសទន្ទ្រានយកដែនព្រៃលិចទឹកនៅតំបន់ទន្លេសាបចំនួន៣៤នាក់ ក្នុងនោះ ៥នាក់បានដោះលែងវិញ និងឃុំខ្លួនមនុស្ស២៩នាក់។ យ៉ាងណា ក្រសួងរៀបចំដែនដីពុំបានបញ្ជាក់ពីអត្តសញ្ញាណរបស់ជនប្រព្រឹត្តណាម្នាក់នោះឡើយ ខណៈទំហំផ្ទៃដីដែលរងការទន្ទ្រានកាន់កាប់ដោយខុសច្បាប់នោះ ក្រសួងក៏មិនបានបង្ហាញទំហំជាក់លាក់នោះដែរ។
វីអូឌី មិនអាចទាក់ទងសុំការអត្ថាធិប្បាយពីប្រធានអង្គភាពប្រឆាំងអំពើពុករលួយ លោក ឱម យិនទៀង និងអ្នកនាំពាក្យក្រសួងរៀបចំដែនដី លោក សេង ឡូត បានទេ នៅថ្ងៃសុក្រនេះ។
ប្រធានសម្ព័ន្ធប្រជានេសាទកម្ពុជា លោក ឡុង សូចែត សាទរចំពោះការចាត់វិធានការលើមន្ត្រីស៊ីវិលនិងកងកម្លាំងដែលចូលរួមប្រព្រឹត្តបទល្មើសទន្ទ្រានដីព្រៃលិចទឹកតំបន់ទន្លេសាប ខណៈករណីទន្ទ្រានទាំងនេះពុំមែនទើបតែកើតឡើងនាពេលបច្ចុប្បន្នទេ។
បែបនេះក្ដី លោកថា វិធានការនិងការកំណត់ព្រំប្រទល់នៅក្នុងបឹងទន្លេសាប ធ្លាប់ត្រូវបានអាជ្ញាធរអនុវត្តរួចមកហើយ ហើយក៏មានភាពស្ងប់ស្ងាត់បទល្មើសមួយរយៈ ប៉ុន្តែក្រោយមកទៀត បទល្មើសមានច្រើនលើសដើម។
លោកបន្ថែមថា បរិបទចុងក្រោយនេះ ដែនព្រៃលិចទឹកតំបន់ទន្លេសាបត្រូវបានគេរំលោភទន្ទ្រានយកយ៉ាងធ្ងន់ធ្ងរ ខណៈពួកគេសុទ្ធតែជាអ្នកមានអំណាច និងជាបុគ្គលមានតួនាទីធំដុំ។
យ៉ាងណា លោករំពឹងថា រដ្ឋាភិបាលនឹងមានជំហរចាត់ការលើមន្ត្រីដែលគប់គិតទន្ទ្រានយកទាំងនោះឱ្យមានប្រសិទ្ធភាព បើមិនដូច្នេះទេ ដីព្រៃលិចទឹកតំបន់ទន្លេសាបនឹងត្រូវវិនាស។
លោកថា៖ «ឱ្យតែធ្វើទៅតាមច្បាប់ដែលមានហ្នឹងទៅ គឺអ្នកទាំងហ្នឹងខ្លាចឯង! ហើយអ្នកខ្លះដែលចូលខ្លួនហើយមិនទាន់ត្រូវបានកាត់ទោស ឬមិនទាន់ត្រូវបានស្រាវជ្រាវរកឃើញ ក៏គាត់ភ័យដែរ មិនហ៊ានបន្តទៀតទេ។ បើឃើញ ចាប់ ហើយគេអនុវត្តច្បាប់មិនលែងអ៊ីចឹង។ ប៉ុន្តែបើសិនជាចាប់ហើយលែងវិញ វាមិនមានប្រសិទ្ធភាពទេ។ អ្នកហ្នឹងនឹងទៅប្រព្រឹត្តទៀត ហើយអ្នកថ្មីឃើញអ្នកចាស់ហ្នឹងរួច[ខ្លួន]មកវិញ ក៏គេនឹងបន្តទៅដែរ ព្រោះមនុស្សឥលូវនេះ តម្រូវការគេម្នាក់ៗ គេចង់បានដី គេចង់បានផលប្រយោជន៍ធំដុំអ៊ីចឹងនោះ។ អ៊ីចឹងមានតែការអនុវត្តច្បាប់ឱ្យបានតឹងតែងមួយទេ ដែលធ្វើឱ្យមានប្រសិទ្ធភាព»៕
កាលពីថ្ងៃទី២៨ ខែវិច្ឆិកា ឆ្នាំ២០២១ លោកនាយករដ្ឋមន្ត្រី ហ៊ុន សែន បានបញ្ជាឱ្យបង្ក្រាបចំពោះការទន្ទ្រានកាន់កាប់ដីព្រៃលិចទឹកនៅជុំវិញបឹងទន្លេសាប បន្ទាប់ពីលោកទទួលបានរបាយការណ៍ពីលោក សុខ ទូច ជុំវិញការរំលោភកាន់កាប់ដីព្រៃលិចទឹករាប់ពាន់ហិកតាដោយខុសច្បាប់។
មិនតែប៉ុណ្ណោះ លោក ហ៊ុន សែន ថែមទាំងជំរុញទៅស្ថាប័នពាក់ព័ន្ធឱ្យចាត់វិធានការច្បាប់ចំពោះមន្ត្រីពាក់ព័ន្ធ ពិសេសលោកបាននិយាយចំឈ្មោះអតីតអភិបាលខេត្តកំពង់ឆ្នាំង លោក ឈួរ ចាន់ឌឿន ដែលបច្ចុប្បន្នជាអនុរដ្ឋលេខាធិការក្រសួងមហាផ្ទៃ ក្រោយមានរបាយការណ៍បង្ហាញថា មន្ត្រីជាន់ខ្ពស់រដ្ឋាភិបាលរូបនេះបានទន្ទ្រានកាន់កាប់ដីព្រៃលិចទឹកក្នុងភូមិសាស្ត្រខេត្តកំពង់ឆ្នាំង ទំហំ២ ០០០ហិកតា៕