អាជ្ញាធរបានដោះលែងបុគ្គលិកណាហ្គាវើលដ៍ជិត២០០នាក់ឱ្យត្រលប់ទៅផ្ទះវិញ បន្ទាប់ពីចាប់បញ្ជូនទៅមណ្ឌលចត្តាឡីស័ក ខណ្ឌព្រែកព្នៅ ខណៈពួកគេចេញធ្វើកូដកម្មជាថ្មីទៀត កាលពីម្សិលមិញ។
កូដករក្រុមហ៊ុនណាហ្គាវើលដ៍ កញ្ញា សៀក បញ្ញា ឱ្យដឹងនៅព្រឹកថ្ងៃចន្ទនេះថា អាជ្ញាធរនិងកងកម្លាំងសន្តិសុខបានរារាំងនិងចុះចាប់ក្រុមកូដករប្រមាណជិត២០០នាក់ បញ្ជូនទៅមណ្ឌលចត្តាឡីស័កក្នុងខណ្ឌព្រែកព្នៅ កាលពីរសៀលថ្ងៃម្សិលមិញ ខណៈពួកគេចេញធ្វើកូដកម្មជាថ្មីទៀត ដើម្បីទាមទារឱ្យមានដំណោះស្រាយវិវាទការងារនៅក្រុមហ៊ុនណាហ្គាវើលដ៍។
កញ្ញាបន្តថា ក្រោយពីអាជ្ញាធរចាប់បញ្ជូនពួកគាត់ទៅទម្លាក់ចោលនៅមណ្ឌលចត្តាឡីស័កនោះ រហូតដល់ម៉ោង៩យប់ ទើបដោះលែងឱ្យពួកគាត់ត្រលប់ទៅផ្ទះវិញ ដោយមិនមានគ្រូពេទ្យទៅធ្វើតេស្តរកវីរុសកូវីដ-១៩នោះទេ។
កញ្ញានិយាយថា៖ «គេប្រាប់ពួកខ្ញុំឈប់ប្រមូលផ្ដុំតវ៉ាទៀត តែពួកខ្ញុំនៅតែប្រកាន់ជំហរថា បើសិនជាមិនមានដំណោះស្រាយ ពួកខ្ញុំនៅតែតវ៉ា លុះត្រាតែក្រសួងពាក់ព័ន្ធទាំងអស់ ជាពិសេសខាងថៅកែដោះស្រាយ និងដោះលែងតំណាងពួកខ្ញុំទាំង១១រូប ដោយគ្មានលក្ខខណ្ឌ ចូលតុចរចា និងទទួលយកបុគ្គលិកធ្វើការវិញ»។
កញ្ញាបន្ថែមថា នៅពេលសមត្ថកិច្ចនិងកងសន្តិសុខចាប់ខ្លួនពួកគាត់ដោយប្រើអំពើហិង្សាចាប់បោះចូលរថយន្តនោះ បានធ្វើឱ្យពួកគាត់ឈឺចុកចាប់លើរាងកាយ ជាពិសេសស្ត្រីដែលមានផ្ទៃពោះ។
កញ្ញានិយាយថា៖ «នៅក្នុងឡានខ្ញុំ មានអ្នកពោះធំ គាត់ប្រាប់អាជ្ញាធរនិងកងសន្តិសុខថា គាត់ពោះធំ គាត់មានទម្ងន់ កុំឱ្យរុញគាត់ កុំឱ្យច្រានគាត់ គាត់ឡើងលើណា តែខាងអាជ្ញាធរគាត់នៅតែប្រើអំពើហិង្សា រុញគាត់ជាស្ត្រីដែលមានផ្ទៃពោះ ឥលូវគាត់កំពុងតែចុកពោះ កំពុងតែសម្ងំនៅខាងក្នុង ហើយការចាប់ខ្លួននេះនៅតែប្រើហិង្សាព្រៃផ្សៃដដែល»។
វីអូឌី នៅមិនទាន់អាចសុំការបញ្ជាក់ជុំវិញករណីនេះពីអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បាននៅឡើយទេ។
គួរបញ្ជាក់ថា វិវាទការងារនៅក្រុមហ៊ុនល្បែងដ៏ធំនៅចំកណ្ដាលរាជធានីភ្នំពេញនេះ បានអូសបន្លាយរយៈពេលជិត១ឆ្នាំមកហើយ។ ការអូសបន្លាយនេះបានឈានទៅដល់ការចាប់ខ្លួនថ្នាក់ដឹកនាំនិងសកម្មជនសហជីព ១១នាក់ ដាក់ពន្ធនាគារជាបន្តបន្ទាប់ ចាប់តាំងពីយប់ឆ្លងឆ្នាំសកលមក ក្រោយពីពួកគេប្រើប្រាស់សិទ្ធិធ្វើកូដកម្មអហិង្សា ទាមទារឱ្យក្រុមហ៊ុនណាហ្គាវើលដ៍គោរពសិទ្ធិកម្មករនិងសហជីព។
កាលពីថ្ងៃទី៧ ខែមីនា ឆ្នាំ២០២២ ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា បានជំរុញទៅអាជ្ញាធរកម្ពុជា ត្រូវចូលរួមពិភាក្សាដោះស្រាយតាមការទាមទាររបស់កូដករណាហ្គាវើលដ៍តាមផ្លូវច្បាប់ និងបញ្ឈប់ការរារាំង ធ្វើទុក្ខបុកម្នេញកូដករដែលធ្វើកូដកម្មដោយសន្តិវិធី ក្រោមហេតុផលទប់ស្កាត់កូវីដ-១៩បន្តទៀត៕