មន្ត្រីក្រសួងព័ត៌មាន ទាត់ចោលការចោទប្រកាន់ដែលថា សមត្ថកិច្ចបង្ខំឱ្យអ្នកសារព័ត៌មានលុបរូបភាព ខណៈពួកគេថតរូបពីសកម្មភាពនៃការតវ៉ារបស់កូដករក្រុមហ៊ុនណាហ្គាវើលដ៍។
ការច្រានចោលនេះធ្វើឡើងក្រោយ សម្ព័ន្ធអ្នកសារព័ត៌មានកម្ពុជា (ខេមបូចា) កាលពីថ្ងៃទី១១ ខែមីនា បានថ្កោលទោសចំពោះសកម្មភាពរបស់កម្លាំងអាជ្ញាធររាជធានីភ្នំពេញ ដែលបានគំរាមកំហែងនិងធ្វើទុក្ខបុកម្នេញទៅលើអ្នកសារព័ត៌មាននៅទីតាំងកូដកម្មរបស់បុគ្គលិកក្រុមហ៊ុនណាហ្គាវើលដ៍ ដោយថា បានបង្ខំឱ្យអ្នកកាសែតវីអូឌីលុបរូបភាពចោល បើមិនដូច្នោះទេ កម្លាំងអាជ្ញាធរនឹងនាំពួកគេទៅប៉ុស្តិ៍នគរបាលថែមទៀតផង។ ពាក់ព័ន្ធករណីនេះ ខេមបូចា បានស្នើឱ្យរដ្ឋាភិបាលពិនិត្យមើលឡើងវិញ ដោយបញ្ឈប់នូវសកម្មភាពទាំងអស់នេះជាបន្ទាន់។
អ្នកនាំពាក្យក្រសួងព័ត៌មាន លោក មាស សុភ័ណ្ឌ ប្រាប់ វីអូឌី នាព្រឹកថ្ងៃចន្ទនេះថា នៅពេលដែលសមត្ថកិច្ចជំនាញកំពុងអនុវត្តតួនាទីនិងភារកិច្ចរបស់ខ្លួនទៅលើកូដករណាហ្គានោះ ក៏មានអ្នកសារព័ត៌មាន២រូបបានចូលទៅក្នុងក្រុមកូដករ ដែលធ្វើឱ្យសមត្ថកិច្ចស្មានតែជាកូដករ ក៏តម្រូវឱ្យឡើងរថយន្ត ដើម្បីនាំទៅធ្វើចត្តាឡីស័ក។ លោកបន្តថា ប៉ុន្តែក្រោយការសួរនាំ ទើបសមត្ថកិច្ចដឹងថាជាអ្នកសារព័ត៌មាន ទើបមិនតម្រូវឱ្យឡើងរថយន្តទៅធ្វើចត្តាឡីស័កនោះទេ និងអនុញ្ញាតឱ្យពួកគេត្រលប់ទៅវិញ។
យ៉ាងណា លោកអះអាងថា សមត្ថកិច្ចពុំបានគំរាមកំហែងឱ្យអ្នកសារព័ត៌មានណាម្នាក់លុបរូបភាពក្នុងអំឡុងពេលចុះយកព័ត៌មាននៅទីតាំងធ្វើកូដកម្ម ដូចការលើកឡើងរបស់ខេមបូចាឡើយ។
លោក មាស សុភ័ណ្ឌ ថ្លែងថា៖ «ការដែលអ្នកកាសែតនោះលើកឡើងថា សមត្ថកិច្ចគំរាមកំហែងឱ្យលុបរូបភាពនោះ វាជារឿងមិនពិតនោះទេ ហើយវាគ្រាន់តែជាការចោទប្រកាន់របស់ពួកគាត់មកលើសមត្ថកិច្ចតែប៉ុណ្ណោះ។ អ៊ីចឹងហើយសមត្ថកិច្ចបានបញ្ជាក់ហើយថា រឿងនេះមិនមានការគំរាមកំហែងដូចការលើកឡើងរបស់គាត់ទេ។ អ៊ីចឹងយើងមិនអាចចោទប្រកាន់មកលើសមត្ថកិច្ចថា សមត្ថកិច្ចហ្នឹងបានគំរាមកំហែងឬធ្វើទុក្ខបុកម្នេញទៅដល់អ្នកសារព័ត៌មានហ្នឹងឡើយ»។
អ្នកនាំពាក្យក្រសួងព័ត៌មានរូបនេះ បន្តថា ការអនុវត្តសិទ្ធិសេរីភាពនិងការអនុវត្តតួនាទីភារកិច្ចរបស់អ្នកសារព័ត៌មាន ត្រូវបានធានាការពារដោយច្បាប់ និងលិខិតបទដ្ឋានគតិយុត្តិជាធរមាន។ លោកថា ដូច្នេះ អ្នកសារព័ត៌មាននៅកម្ពុជាត្រូវប្រើសិទ្ធិនេះឱ្យបានត្រឹមត្រូវតាមច្បាប់ និងមិនគួរប្រើប្រាស់សិទ្ធិនេះទៅបំពានដល់សិទ្ធិនិងតួនាទីភារកិច្ចរបស់អ្នកដទៃនោះឡើយ។
នាយកប្រតិបត្តិខេមបូចា លោក ណុប វី ថ្លែងថា កន្លងមក លោកសង្កេតឃើញអ្នកសារព័ត៌មានវិជ្ជាជីវៈបានបំពេញកិច្ចការរបស់ខ្លួនស្របតាមតួនាទី មានព្រំដែនកំណត់ និងមិនបានបំពានភារកិច្ចរបស់សមត្ថកិច្ចឡើយ។ លោកថា បើសិនក្រសួងថា អ្នកសារព័ត៌មានទាំងនោះចោទប្រកាន់លើសមត្ថកិច្ច នោះក្រសួងអាចជជែកជាមួយអ្នកសារព័ត៌មានទាំងនោះបាន ព្រោះពួកគេមានទាំងភស្តុតាង រូបភាព និងឯកសារពាក់ព័ន្ធ។
លោកបន្ថែមថា៖ «មន្ត្រី! ដូចឧទាហរណ៍សមត្ថកិច្ច ឬមួយក៏សាលាក្រុង គាត់មិនដែល[សារភាព]ថាគាត់ហ្នឹងរារាំង ឬមួយក៏ទៅគំរាមចាប់កាមេរ៉ាអ្នកថតរូប យកទៅលុបរូបទេ។ គាត់អត់ដែលទៅទទួលស្គាល់ចំពោះអ្វីដែលគាត់បានធ្វើក្នុងរឿងហ្នឹងអ៊ីចឹងទេ។ ខ្ញុំគិតថា បើសិនជាក្រសួងលោកចង់ដឹងរឿងហ្នឹងពិតប្រាកដ លោកអាចសួរផ្ទាល់ៗចំពោះអ្នកសារព័ត៌មាន ឬមួយក៏សាម៉ីស្ថាប័នសារព័ត៌មានដែលគាត់ទទួលរងនូវការបៀតបៀនតាមរយៈរូបភាពបែបហ្នឹង»។
យ៉ាងណា លោកចង់ឱ្យក្រសួងព័ត៌មានផ្ដល់ការពិភាក្សា និងផ្ដល់អនុសាសន៍ទៅអាជ្ញាធរពាក់ព័ន្ធ ជាជាងព្យាយាមបដិសេធ ហើយលើកឡើងថាជារឿងមិនពិត។ លោកបន្ថែមថា បើអាជ្ញាធរមិនអនុញ្ញាតឱ្យអ្នកសារព័ត៌មានចុះយកព័ត៌មាននិងរូបភាពនៅកន្លែងធ្វើកូដកម្ម បាតុកម្ម និងទីតាំងដែលមានបញ្ហាផ្សេងៗដោយផ្ទាល់និងស្របតាមវិជ្ជាជីវៈទេ នោះជាចេតនាក្នុងការរឹតត្បិតដល់កិច្ចការងាររបស់អ្នកសារព័ត៌មាន។
អ្នកយកព័ត៌មានជាស្រ្ដីមួយរូបរបស់សារព័ត៌មាន វីអូឌី ដែលសុំមិនបញ្ចេញឈ្មោះ ប្រាប់ថា នៅពេលដែលកញ្ញា និងសហការីជាជនបរទេសម្នាក់ទៀត បានចុះយកព័ត៌មាន និងថតរូបភាពពីសកម្មភាពតវ៉ារបស់កូដករណាហ្គាវើលដ៍ កាលពីរសៀលថ្ងៃទី១១ ខែមីនានោះ ក៏មានសមត្ថកិច្ចស្លៀកពាក់ស៊ីវិល៤ទៅ៥នាក់ បានបង្ខំឱ្យពួកគេលុបរូបភាពដែលថតបាន និងទាមទារសុំមើលលិខិតបេសកកម្ម ទើបសមត្ថកិច្ចអនុញ្ញាតឱ្យពួកគេត្រឡប់មកផ្ទះវិញ។ យ៉ាងណា កញ្ញាថា ខ្លួនមិនបានចូលទៅក្នុងក្រុមកូដករដូចអ្វីដែលសមត្ថកិច្ចលើកឡើងឡើយ។
កញ្ញានិយាយថា៖ «ការពិត ពួកគាត់បានដេញមិនឱ្យពួកខ្ញុំថតរូប ពួកខ្ញុំក៏ចេញ។ ប៉ុន្តែនៅពេលដែលខ្ញុំដើរចេញមកយកម៉ូតូ ពួកគាត់ប្រមាណ៤ទៅ៥នាក់ ចេញមកសួរពួកខ្ញុំថាមកពីស្ថាប័នណា? ខ្ញុំក៏ប្រាប់ និងបង្ហាញកាតសារព័ត៌មាន។ តែគាត់បានបន្ថែមសួររកក្រដាសបេសកកម្មរបស់ខ្ញុំ ក្នុងការចុះមករាយការណ៍នៅទីនោះ។ គាត់ថែមទាំងឱ្យខ្ញុំនិយាយនៅពីមុខកាមារ៉ាទូរសព្ទគាត់ ដូចជាប្រាប់ឱ្យណែនាំខ្លួនដូចខាងលើ តែខ្ញុំមិនធ្វើតាម ព្រោះខ្ញុំគិតថាមិនសមហេតុផលក្នុងការធ្វើបែបនេះ»។
របាយការណ៍របស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ហៅកាត់ CCIM ស្តីពី «ការប្រឈមរបស់អ្នកសារព័ត៌មានឯករាជ្យប្រចាំឆ្នាំ២០២១» ដែលផ្សព្វផ្សាយកាលពីថ្ងៃទី១០ ខែមីនា បានរកឃើញថា ស្ថានភាពសេរីភាពសារព័ត៌មាននៅកម្ពុជា កាលពីឆ្នាំមុន កាន់តែអាក្រក់ បើប្រៀបធៀបនឹងឆ្នាំ២០២០។
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ និងសម្ព័ន្ធអ្នកសារព័ត៌មានកម្ពុជា បានកត់ត្រាពីការធ្វើទុក្ខបុកម្នេញទៅលើអ្នកសារព័ត៌មានចំនួន៥១ករណី ឬស្មើនឹងអ្នកសារព័ត៌មានរងគ្រោះចំនួន៩៣នាក់ (មាន៥នាក់ជាស្ដ្រី) ក្នុងនោះ អ្នកសារព័ត៌មានចំនួន៣២នាក់ត្រូវបានចាប់ឃាត់ខ្លួន ហើយ២៤នាក់ប្រឈមបណ្ដឹងផ្លូវច្បាប់ និង១៨នាក់ទៀតអះអាងថាបានទទួលរងការគំរាមកំហែងនិងការធ្វើទុក្ខបុកម្នេញ៕