ពលរដ្ឋជាច្រើននាក់ ដែលអះអាងថា កំពុងមានជម្លោះដីធ្លីជាមួយក្រុមហ៊ុនរបស់ឧកញ៉ា លី យ៉ុងផាត់ នៅស្រុកបទុមសាគរ ខេត្តកោះកុង ប្រមូលផ្ដុំតវ៉ាមុខសាលាដំបូងខេត្តនៅថ្ងៃនេះ ខណៈតំណាង៣នាក់របស់ពួកគេចូលបំភ្លឺចំពោះមុខតុលាការ។
កាលពីថ្ងៃទី២៤ ខែកុម្ភៈ ឆ្នាំ២០២២ តំណាងអយ្យការអមសាលាដំបូងខេត្តកោះកុង លោក វ៉ៃ ភីរម្យ បានកោះហៅតំណាងពលរដ្ឋ១៨នាក់ ដែលអះអាងថា កំពុងមានជម្លោះដីធ្លីជាមួយក្រុមហ៊ុនរបស់ឧកញ៉ា លី យ៉ុងផាត់ ឱ្យចូលបំភ្លឺនៅខែមីនា ឆ្នាំ២០២២នេះ ជាបន្តបន្ទាប់ ក្រោមបទចោទដូចគ្នាគឺ «បង្កចលាចល និងធ្វើឱ្យខូចសណ្ដាប់ធ្នាប់សាធារណៈ» ក្នុងភូមិសាស្ត្រខេត្តកោះកុង។
បើតាមដីកាកោះ តំណាងពលរដ្ឋដែលត្រូវចូលបំភ្លឺនៅថ្ងៃទី១៤ ខែមីនានេះ រួមមាន លោក ឈឹម សាផាន ចូលបំភ្លឺនៅម៉ោង៩ព្រឹក ខណៈតំណាងពលរដ្ឋ២នាក់ រួមមាន អ្នកស្រី កុយ យឿន និងអ្នកស្រី លុយ ស្រីពណ៌ នឹងត្រូវចូលបំភ្លឺនៅម៉ោង២រសៀល។
តំណាងពលរដ្ឋម្នាក់ អ្នកស្រី ជុំ ស្រីនៅ ដែលកំពុងជាប់បណ្ដឹងនៅតុលាការដែរនោះ បានឱ្យដឹងថា ប្រជាសហគមន៍មានជម្លោះដីធ្លីប្រហែល៤០០នាក់ មកពីស្រុកស្រែអំបិល ស្រុកបទុមសាគរ និងស្រុកថ្មបាំង បាននាំគ្នាឈរលើកបដាមុខសាលាដំបូងខេត្តកោះកុង ដើម្បីគាំទ្រតំណាងពលរដ្ឋ៣នាក់ដែលចូលបំភ្លឺ និងទាមទារឱ្យតុលាការទម្លាក់ចោលការចោទប្រកាន់លើតំណាងពលរដ្ឋដែលកំពុងជាប់បណ្ដឹង។
តំណាងពលរដ្ឋរូបនេះលើកឡើងថា ក្រុមពលរដ្ឋដែលកំពុងជាប់បណ្ដឹងនៅតុលាការនោះ ពុំមានកំហុសដូចការចោទប្រកាន់ឡើយ។ អ្នកស្រីថា អ្វីដែលពួកគាត់កំពុងតវ៉ានេះ គឺគ្រាន់តែទាមទារដីធ្លីដែលបានបាត់បង់ដោយសារក្រុមហ៊ុនរបស់លោក លី យ៉ុងផាត់ បានរំលោភយកកាលពីឆ្នាំ២០០៦ ដោយមិនបានដោះស្រាយសំណងតែប៉ុណ្ណោះ។
អ្នកស្រីបន្ថែមថា៖ «អ្វីដែលពួកខ្ញុំធ្វើកន្លងមក គឺគ្រាន់តែចង់បានដំណោះស្រាយដីធ្លីប៉ុណ្ណោះ មិនបានធ្វើអ្វីខុសដូចការចោទប្រកាន់ដូចនៅក្នុងពាក្យបណ្ដឹងឡើយ»។
តំណាងពលរដ្ឋម្នាក់ទៀត អ្នកស្រី រុន ភាព ដែលកំពុងជាប់បណ្ដឹងនៅតុលាការដែរនោះ បាននិយាយថា ករណីពួកគាត់ជាប់បណ្ដឹងនៅតុលាការនេះ ជាការគំរាមកំហែងបំបាក់ស្មារតីមិនឱ្យពួកគាត់ហ៊ានចេញតវ៉ា និងជារឿងអយុត្តិធម៌មួយសម្រាប់ប្រជាពលរដ្ឋដែលបាត់បង់ដីធ្លីផងដែរ។
អ្នកស្រីបន្តថា បើទោះបីមានការគំរាមកំហែងនិងបារម្ភពីសុវត្ថិភាព ប៉ុន្តែដើម្បីដីធ្លីដែលបាត់បង់ គឺអ្នកស្រីនៅតែរក្សាជំហរបន្តតវ៉ាតទៀត។
អ្នកស្រីបន្ថែមថា៖ «ខ្ញុំសូមអំពាវនាវដល់តុលាការឱ្យទម្លាក់ចោលការចោទប្រកាន់លើពួកខ្ញុំទាំងអស់គ្នា ដោយសារពួកខ្ញុំមិនបានធ្វើអ្វីខុសដូចការចោទប្រកាន់ទេ ហើយអាជ្ញាធរគួរតែដោះស្រាយដីធ្លីជូនពួកខ្ញុំឱ្យបានឆាប់ផងដែរ»។
តំណាងអយ្យការអមសាលាដំបូងខេត្តកោះកុង លោក វ៉ៃ ភីរម្យ មានប្រសាសន៍ថា តុលាការបានសម្រេចឱ្យពលរដ្ឋទាំង៣នាក់នោះត្រលប់ទៅលំនៅឋានវិញ ដោយមិនទាន់សម្រេចថាយ៉ាងណានៅឡើយទេ ដោយសារនីតិវិធីនៃការសាកសួរមិនទានបានបញ្ចប់នៅឡើយ។
វីអូឌី មិនអាចរកការឆ្លើយតបពីតំណាងក្រុមហ៊ុនលោក លី យ៉ុងផាត់ បានទេ ចំពោះការចោទប្រកាន់នេះ។
ពាក់ព័ន្ធករណីនេះ អភិបាលស្រុកបទុមសាគរ លោក ហាក់ ឡេង ធ្លាប់ប្រាប់វីអូឌីថា អាជ្ញាធរស្រុកមិនបានប្ដឹងតំណាងពលរដ្ឋទាំងនោះទៅតុលាការនោះទេ។ យ៉ាងណា លោកថា មានពលរដ្ឋ៣ក្រុមកំពុងតវ៉ារឿងដីធ្លី ដោយអះអាងថា ក្រុមហ៊ុនរបស់លោក លី យ៉ុងផាត់ រំលោភយក ខណៈដែលក្រសួងរៀបចំដែនដី និងរដ្ឋបាលខេត្តកោះកុង បានចេញលិខិតបដិសេធមិនដោះស្រាយជូនពួកគេជាច្រើនដង ដោយសារតែក្រុមពលរដ្ឋទាំងនោះទទួលបានការដោះស្រាយពីអាជ្ញាធររួចជាយូរឆ្នាំមកហើយ។
អភិបាលស្រុករូបនេះអះអាងថា ដីដែលក្រុមពលរដ្ឋកំពុងតវ៉ាទាមទារនោះជាដីឯកជនរបស់រដ្ឋ ស្ថិតក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទ។
មន្ត្រីសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជា ប្រចាំខេត្តកោះកុង និងកំពង់ស្ពឺ លោក ញ៉ិល ភាព ដែលកំពុងឃ្លាំមើលករណីនេះ មានប្រសាសន៍ថា អាជ្ញាធរនិងអ្នកមានលុយមានអំណាចតែងតែប្រើប្រព័ន្ធតុលាការ និងបទចោទដូចជាបទ «បង្កចលាចល និងធ្វើឱ្យខូចសណ្ដាប់ធ្នាប់សាធារណៈ» បទ «បរិហារបង្កាច់កេរ្តិ៍ និងបរិហារជាសាធារណៈ» និងបទ «ញុះញង់» ជាដើម ដើម្បីប្រឆាំងពលរដ្ឋមានជម្លោះដីធ្លី។
មន្ត្រីសមាគមរូបនេះបន្តថា ការប្រើប្រាស់ប្រព័ន្ធតុលាការដាក់សម្ពាធលើពលរដ្ឋ ដើម្បីគំរាមកំហែង គឺមិនអាចដោះស្រាយបញ្ហាបានឡើយ និងមិនអាចធ្វើឱ្យពលរដ្ឋឈប់តវ៉ានោះដែរ ផ្ទុយទៅវិញ រឹតតែធ្វើឱ្យប្រជាពលរដ្ឋឈឺចាប់ និងអស់ជំនឿលើការដឹកនាំរបស់រដ្ឋាភិបាលទៅវិញ។
លោកបន្ថែមថា៖ «ហើយការប្រើប្រាស់ប្រព័ន្ធតុលាការនេះទៀតសោត វារឹតតែធ្វើឱ្យប្រជាពលរដ្ឋមានការឈឺចាប់កាន់តែខ្លាំងឡើង ហើយមើលឃើញពីភាពអយុត្តិធម៌សង្គម ភាពមិនទទួលខុសត្រូវក្នុងការដឹកនាំរបស់ស្ថាប័នរដ្ឋ ដែលមានសិទ្ធិសម្រេចចិត្តនៅក្នុងជួររដ្ឋាភិបាល ហើយមិនអាចបញ្ចប់បានទេ ដរាបណាយើងមិនធ្វើការដោះស្រាយក្នុងយន្តការណាមួយដែលធ្វើឱ្យពួកគាត់ទទួលយកបាននោះ»។
កាលពីថ្ងៃទី៨ ខែកុម្ភៈ សមាគមការពារសិទ្ធិមនុស្សអាដហុក បានចេញរបាយការណ៍មួយដោយរកឃើញថា ក្នុងឆ្នាំ២០២១ ប្រជាពលរដ្ឋចំនួនជិត២ម៉ឺនគ្រួសារ (១៧ ០៣៣) បានរងផលប៉ះពាល់ដោយសារវិវាទដីធ្លី ដែលមានទំហំជាង៥០ ០០០ហិកតា (៥២ ៦០១,៨៧ហិកតា)។
អាដហុក ឱ្យដឹងទៀតថា មានពលរដ្ឋរងគ្រោះដីធ្លី១៥៧នាក់កំពុងជាប់បណ្ដឹងអាជ្ញា និងដាក់ឱ្យស្ថិតក្រោមការត្រួតពិនិត្យពីតុលាការ ខណៈជនរងគ្រោះ ១៧នាក់ទៀតកំពុងឃុំខ្លួនបណ្ដោះអាសន្នក្នុងពន្ធនាគារ ដោយសារការតវ៉ាទាមទារដីធ្លីរបស់ខ្លួន៕