សាលាឧទ្ធរណ៍រាជធានីភ្នំពេញ សម្រេចតម្កល់សាលក្រមសាសាដំបូងរាជធានីភ្នំពេញ ដែលបានកាត់ទោសកុមារ កាក់ សុវណ្ណច្ឆ័យ វ័យ១៦ឆ្នាំ ដាក់ពន្ធនាគាររយៈពេល៨ខែ និងដាក់ឱ្យស្ថិតក្រោមការត្រួតពិនិត្យរបស់តុលាការរយៈពេល២ឆ្នាំ កាលពីថ្ងៃទី១ ខែវិច្ឆិកា ឆ្នាំ២០២១។
ការសម្រេចរបស់សាលាឧទ្ធរណ៍នាថ្ងៃនេះ ធ្វើឡើងបន្ទាប់ពីបើកសវនាការអសាធារណៈកាលពីថ្ងៃទី១៧ ខែកុម្ភៈ ឆ្នាំ២០២២។
កុមារ កាក់ សុវណ្ណច្ឆ័យ ត្រូវបានចៅក្រមសាលាដំបូងរាជធានីភ្នំពេញ ចោទប្រកាន់និងកាត់ទោសដាក់ពន្ធនាគារ៨ខែ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ»។ ប៉ុន្តែតុលាការបង្គាប់ឱ្យកុមាររូបនេះអនុវត្តទោសក្នុងពន្ធនាគាររយៈពេល៤ខែនិង១៥ថ្ងៃ ចំណែកទោសដែលនៅសល់ត្រូវព្យួរសាកល្បងរយៈពេល២ឆ្នាំ។
ប្រធានក្រុមប្រឹក្សាសាលាឧទ្ធរណ៍រាជធានីភ្នំពេញ នៅថ្ងៃចន្ទនេះ បានប្រកាសសាលដីកា ដោយសម្រេចតម្កល់សេចក្ដីសម្រេចរបស់សាលាដំបូងរាជធានីភ្នំពេញទុកជាបានការដដែល ក្រោមហេតុផលថា ការសម្រេចរបស់តុលាការថ្នាក់ក្រោមជារឿងត្រឹមត្រូវ។
ម្ដាយរបស់កុមារ កាក់ សុវណ្ណច្ឆ័យ គឺអ្នកស្រី ព្រំ ចាន់ថា ចាត់ទុកការសម្រេចរបស់សាលាឧទ្ធរណ៍ថាជារឿងអយុត្តិធម៌ ខណៈកូនប្រុសរបស់គាត់កំពុងមានជំងឺអូទីហ្សឹមហើយ ប៉ុន្តែតុលាការនៅតែមិនព្រមទម្លាក់បទចោទប្រកាន់ទៀត។ អ្នកស្រីបន្តថា ការមិនទម្លាក់នេះក៏ជាការដាក់សម្ពាធមកលើក្រុមគ្រួសាររបស់គាត់ដែរ។
អ្នកស្រីថា៖ «ធ្វើនេះជាការដាក់គំនាបមួយ ចង់បំពាក់ស្មារតីក្រុមគ្រួសារខ្ញុំ ជាពិសេសគឺខ្ញុំតែម្ដង! ព្រោះជាទូទៅ ពីមួយសប្ដាហ៍ទៅមួយសប្ដាហ៍ ខ្ញុំតែងតែតវ៉ាឱ្យប្ដីខ្ញុំ ក៏ដូចជាបងៗនៅក្នុងពន្ធនាគារទាំងអស់ ដែលជាប់ពន្ធនាគារទាំងអយុត្តិធម៌សម្រាប់គណបក្ស CNRP ដែលត្រូវបានគេរំលាយទៅហើយ។ គេចង់ដាក់គំនាបលើក្រុមគ្រួសារខ្ញុំតែម្ដង»។
កុមារ កាក់ សុវណ្ណច្ឆ័យ គឺជាកូនលោក កាក់ កុម្ភារ សកម្មជនគណបក្សសង្គ្រោះជាតិដែលត្រូវតុលាការរំលាយ ដែលបច្ចុប្បន្ននេះ លោកក៏កំពុងជាប់ពន្ធនាគាររយៈពេលជិត២ឆ្នាំហើយ ក្រោមបទចោទ «ញុះញង់ និងរួមគំនិតក្បត់»។ កុមារ កាក់ សុវណ្ណច្ឆ័យ ត្រូវបានចាប់ខ្លួនកាលពីថ្ងៃទី២៤ ខែមិថុនា ឆ្នាំ២០២១ ដោយសាររិះគន់ថ្នាក់ដឹកនាំរដ្ឋាភិបាលតាមរយៈប្រព័ន្ធទំនាក់ទំនងឯកជននិងបណ្ដាញសង្គម ប៉ុន្តែកុមាររូបនេះត្រូវបានដោះលែងពីពន្ធនាគារ កាលពីថ្ងៃទី១០ ខែវិច្ឆិកា ឆ្នាំ២០២១។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បង្ហាញការសោកស្ដាយ និងចាត់ទុកការមិនទម្លាក់បទចោទទៅលើកុមាររូបនេះ ថាអាចជាប់ពាក់ព័ន្ធនឹងរឿងនយោបាយ។ លោកបន្តថា សំណុំរឿងកុមារ កាក់ សុវណ្ណច្ឆ័យ និងសំណុំរឿងសកម្មជនផ្សេងទៀត អាចនឹងត្រូវបានតុលាការលើកលែងនិងទម្លាក់បទចោទប្រកាន់ លុះត្រាតែស្ថានភាពនយោបាយល្អប្រសើរវិញ។
លោកថា៖ «បើសិនជាអនុវត្តច្បាប់បានត្រឹមត្រូវ កុមាររូបហ្នឹងគឺបានដោះលែងឱ្យមានសេរីភាព មុនតាំងពីយកទៅឃុំខ្លួនម្ល៉េះ។ រឿងសាលាឧទ្ធរណ៍នេះ យើងឃើញហើយ កន្លងមក ឱ្យតែសកម្មជនសង្គម នយោបាយ ឬសកម្មជនបរិស្ថាន យើងឃើញថា តុលាការតែងតែតម្កល់អ៊ីចឹង វាជាវប្បធម៌ទៅហើយ។ យើងកម្រឃើញមានករណីលើកលែងចោទ ឬទម្លាក់ការចោទប្រកាន់ណាស់»។
យ៉ាងណាក៏ដោយ កុមារ កាក់ សុវណ្ណច្ឆ័យ ក៏ធ្លាប់ត្រូវបានសមត្ថកិច្ចរាជធានីភ្នំពេញចាប់ខ្លួនម្ដងរួចមកហើយ កាលពីខែតុលា ឆ្នាំ២០២០ ពីបទ «ចូលទីស្នាក់ការអតីតគណបក្សសង្គ្រោះជាតិ» នៅសង្កាត់ចាក់អង្រែលើ រាជធានីភ្នំពេញ ដោយបំពានលើបម្រាមតុលាការ។ ប៉ុន្តែកុមារារូបនោះត្រូវបានសមត្ថកិច្ចដោះលែងវិញ ក្រោយសាកសួរអស់រយៈពេល៤៨ម៉ោង។
ក្រោយពីសមត្ថកិច្ចដោះលែងរួច ប៉ុន្មានខែក្រោយមក កុមារា កាក់ សុវណ្ណច្ឆ័យ ត្រូវបានជនមិនស្គាល់មុខលួចវាយពីក្រោយ បណ្ដាលឱ្យបែកក្បាលដេរ២០ថ្នេរ។ ប៉ុន្តែជាច្រើនខែមកនេះ សមត្ថកិច្ចនៅមិនទាន់រកឃើញមុខជនដៃដល់ ដើម្បីយកមកផ្ដន្ទាទោសនៅឡើយទេ៕