មន្ត្រីជាន់ខ្ពស់ក្រសួងសុខាភិបាល អំពាវនាវដល់ប្រជាពលរដ្ឋឱ្យប្រុងប្រយ័ត្នចំពោះជំងឺផ្ដាសាយបក្សីប្រភេទ A/H9 (Influenza A/H9) ដែលបានរកឃើញលើទារិកាម្នាក់នៅខេត្តសៀមរាប ខណៈជំងឺនេះអាចសម្លាប់អាយុជីវិតមនុស្សបាន បើសិនមិនបានព្យាបាលឱ្យបានត្រឹមត្រូវ។
កាលពីថ្ងៃទី១១ ខែមីនា នាយកដ្ឋានប្រយុទ្ធនឹងជំងឺឆ្លង (CDC) របស់ក្រសួងសុខាភិបាល បានបង្ហោះនៅលើទំព័រហ្វេសប៊ុកបញ្ជាក់ពីការរកឃើញករណីជំងឺផ្ដាសាយបក្សី ប្រភេទ A/H9 (Influenza A/H9) លើទារិកាអាយុជាង១ឆ្នាំ រស់នៅស្រុកជីក្រែង ខេត្តសៀមរាប តាមរយៈប្រព័ន្ធតាមដានជំងឺរលាកសួត។ ទារិការូបនេះមានរោគសញ្ញាគ្រុនក្ដៅ ក្អក និងពិបាកដកដង្ហើម ប៉ុន្តែអ្នកជំងឺបានសះស្បើយ បន្ទាប់ពីសម្រាកព្យាបាលនៅមន្ទីរពេទ្យកុមារអង្គរ។
ប្រភពដដែលបន្តថា នៅក្នុងភូមិដែលទារិការស់នៅនោះមានមាន់ងាប់ជាបន្តបន្ទាប់ ចាប់តាំងពីខែកុម្ភ: ឆ្នាំ២០២២មក។
រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ប្រាប់ វីអូឌី នៅថ្ងៃចន្ទនេះថា អ្នកជំងឺដែលបានឆ្លងវីរុសនេះអាចនឹងស្លាប់បាន ប្រសិនបើមិនទទួលបានការព្យាបាលត្រឹមត្រូវនិងទាន់ពេលវេលានោះទេ។
លោកស្រីថា៖ «ប្រសិនបើឆ្លង ហើយមិនបានព្យាបាលបានត្រឹមត្រូវទេនោះ វាអាចបង្កឱ្យមានភាពធ្ងន់ធ្ងរនិងអាចស្លាប់បានដែរ»។
ប្រធានមន្ទីរសុខាភិបាលខេត្តសៀមរាប លោក ក្រុស សារ៉ាត់ មានប្រសាសន៍យ៉ាងខ្លីថា ទារិកាដែលបានឆ្លងជំងឺផ្ដាសាយប្រភេទថ្មីនេះបានជាសះស្បើយ និងបានត្រលប់ទៅផ្ទះវិញហើយ កាលពីអំឡុងចុងសប្ដាហ៍មុន។ យ៉ាងណា លោកថា មិនទាន់បានកត់សម្គាល់ពីភាពធ្ងន់ធ្ងររបស់ជំងឺនេះនៅឡើយ។
លោកថា៖ «ចុះបើខ្ញុំប្រាប់ហើយថាកូនហ្នឹងជា [សះស្បើយ ៣ទៅ៤ថ្ងៃ] ចេញទៅផ្ទះបាត់ហើយហ្នឹង! ជាទូទៅ អត់ទាន់មានអីជាហានិភ័យអីទេ»។
ថ្លែងពេលកំពុងចុះពិនិត្យដំណើរការចាក់វ៉ាក់សាំងបង្ការជំងឺកូវីដ-១៩ នៅខេត្តស្ទឹងត្រែង លោកស្រី ឱ វណ្ណឌីន អំពាវនាវឱ្យពលរដ្ឋប្រុងប្រយ័ត្នចំពោះជំងឺផ្ដាសាយបក្សីប្រភេទថ្មី Influenze A/H9 នេះ។ លោកស្រីអះអាងថា ជំងឺផ្ដាសាយបក្សីប្រភេទនេះកម្រនឹងឆ្លងណាស់ ប៉ុន្តែក៏ទាមទារឱ្យពលរដ្ឋត្រូវតែមានការប្រុងប្រយ័ត្នខ្ពស់បំផុត។
បើតាមលោកស្រី ឱ វណ្ណឌីន ជំងឺផ្ដាសាយបក្សីប្រភេទថ្មីនេះមានអាការមិនខុសពីជំងឺកូវីដ-១៩នោះទេ។
ដើម្បីទប់ស្កាត់ និងបង្ការនូវការឆ្លងជំងឺផ្ដាសាយបក្សីប្រភេទថ្មីនេះ លោកស្រី ឱ វណ្ណឌីន បានក្រើនរំឭកដល់ប្រជាពលរដ្ឋ ចៀសវាងការប៉ះពាល់ជាមួយសត្វបក្សីគ្រប់ប្រភេទ ហើយកុំចូលទៅកសិដ្ឋានចិញ្ចឹមសត្វបក្សី ជាដើម។ ដោយឡែក សម្រាប់អាជីវករលក់ដូរ ឬចិញ្ចឹមសត្វបក្សី ត្រូវតែប្រើប្រាស់មធ្យោបាយការពារខ្លួនឱ្យបានត្រឹមត្រូវ តាមរយៈការពាក់ម៉ាស់ និងស្រោមដៃ នៅពេលប៉ះពាល់ ហើយត្រូវតែលាងដៃជាមួយសាប៊ូក្រោយប៉ះពាល់សត្វបក្សី។
ទាក់ទងនឹងចំណីអាហារផ្សេងៗវិញ អ្នកនាំពាក្យក្រសួងសុខាភិបាលរូបនេះក៏បានណែនាំដល់ពលរដ្ឋត្រូវតែចម្អិនឱ្យបានឆ្អិនល្អ និងលាងសម្អាតឱ្យបានស្អាត ព្រមទាំងត្រូវលាងសម្អាតសម្ភារប្រើប្រាស់សម្រាប់ការចម្អិនអាហារជាមួយសាប៊ូឱ្យបានស្អាតផងដែរ៕
