អគ្គនាយកដ្ឋានពន្ធដារ បានឱ្យដឹងថា រយៈពេល២ខែ គិតត្រឹមខែកុម្ភៈ ឆ្នាំ២០២២ ចំណូលពន្ធអាករគ្រប់ប្រភេទប្រមូលបានសរុបមានចំនួនជាង៥០០លានដុល្លារ ដោយចំនួននេះកើនឡើងជាង២២ភាគរយ បើធៀបនឹងរយៈពេលដូចគ្នាកាលពីឆ្នាំមុន។
តាមសេចក្ដីប្រកាសព័ត៌មានរបស់អគ្គនាយកដ្ឋានពន្ធដារ កាលពីថ្ងៃទី១៤ ខែមីនា ដែលទើបនឹងផ្សព្វផ្សាយកាលពីម្សិលមិញ បានឱ្យដឹងថា ២ខែមកនេះ កម្ពុជាទទួលបានចំណូលពីពន្ធដារជាង២ ០៧៤ពាន់លានរៀល ឬស្មើប្រមាណ៥១២លានដុល្លារ ដែលស្មើនឹង ១៨,១៧ភាគរយ នៃផែនការប្រចាំឆ្នាំ។ ចំណូលពន្ធដែលប្រមូលបានសម្រាប់ថវិកាជាតិនេះ កើនដល់ចំនួន ២២,៦៩ភាគរយ បើធៀបរយៈពេលដូចគ្នា ឆ្នាំ២០២១។
ក្នុងខែកុម្ ភៈឆ្នាំ២០២២នេះ ចំណូលពន្ធសំខាន់ៗដែលធ្វើឱ្យមានការកើនឡើងនូវការប្រមូលពន្ធ មាន៥ប្រភេទ រួមមាន ពន្ធលើប្រាក់ចំណូល ពន្ធអាករ អាករពិសេស ពន្ធលើប្រាក់បៀវត្ស និងពន្ធលើការផ្ទេរកម្មសិទ្ធិអចលនទ្រព្យ។
ក្នុងពិធីប្រកាសលទ្ធផលប្រមូលចំណូលប្រចាំខែកុម្ភៈ ឆ្នាំ២០២២ កាលពីថ្ងៃទី១៤ ខែមីនា អគ្គនាយកនៃអគ្គនាយកដ្ឋានពន្ធដារ លោក គង់ វិបុល ក៏បានក្រើនរម្លឹកពាក់ព័ន្ធទៅនឹងការគេចវេះពន្ធដារ ដោយថា មានសហគ្រាសមួយចំនួនតូចមិនបានចុះបញ្ជីឱ្យបានត្រឹមត្រូវ និងរហូតបង្កើតផែនការគេចវេះពន្ធ (Tax evasion) ក្នុងគោលបំណងកាត់បន្ថយការបង់ពន្ធ។
យ៉ាងណា លោកអះអាងថា សហគ្រាសទាំងនោះនឹងក្លាយជាគោលដៅនៃការស៊ើបអង្កេត ចំពោះបទល្មើសព្រហ្មទណ្ឌ និងករណីធ្ងន់ធ្ងរដែលអាចឈានដល់បទល្មើសសម្អាតប្រាក់ថែមទៀតផង៕