រុស្ស៊ីបានឱ្យដឹងកាលពីយប់ថ្ងៃអង្គារថា ខ្លួនបានដាក់ប្រធានាធិបតីសហរដ្ឋអាមេរិក លោក ចូ បៃឌិន និងនាយករដ្ឋមន្ត្រីកាណាដា លោក Justin Trudeau រួមនឹងមន្ត្រីកំពូលៗរបស់សហរដ្ឋអាមេរិកមួយចំនួនទៀតនៅក្នុងបញ្ជីមួយដែលហាមឃាត់មិនឱ្យចូលប្រទេសរបស់ខ្លួន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ក្រៅពីលោក ចូ បៃឌិន មន្ត្រីអាមេរិកនៅក្នុងបញ្ជីដែលត្រូវបានហាមឃាត់មិនឱ្យចូលប្រទេសរុស្ស៊ីផ្សេងទៀត រួមមាន រដ្ឋមន្ត្រីការពារជាតិលោក Lloyd Austin, ប្រធានទីភ្នាក់ងារស៊ើបការណ៍សម្ងាត់ (CIA) លោក William Burns, ទីប្រឹក្សាសន្តិសុខជាតិរបស់សេតវិមាន លោក Jake Sullivan និងអតីតរដ្ឋមន្ត្រីការបរទេស និងជាបេក្ខភាពប្រធានាធិបតី លោកស្រី Hillary Clinton។
ការដាក់បម្រាមនេះជាការឆ្លើយតបទៅនឹងការដាក់ទណ្ឌកម្មដោយអាមេរិកមកលើមន្ត្រីរុស្ស៊ី បន្ទាប់ពីការឈ្លានពានអ៊ុយក្រែន ខណៈដែលលោក Justin Trudeau បន្ទាប់មកក៏ត្រូវបានដាក់ដោយក្រសួងការបរទេសរុស្សីទៅក្នុងបញ្ជីនេះផងដែរ។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែនតាមផ្លូវគោក ផ្លូវអាកាស និងសមុទ្រ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលបានធ្វើឱ្យបណ្ដាប្រទេសជាច្រើននៅលើពិភពលោក សម្រេចដាក់ទណ្ឌកម្មជាបន្តបន្ទាប់លើរុស្ស៊ីផងដែរ។
ទោះជាយ៉ាងណា រុស្ស៊ីបានលើកឡើងថា ខ្លួនកំពុងអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះត្រូវបានប្រទេសលោកខាងលិចចាត់ទុកថា ជាការលើកឡើងដោយគ្មានមូលដ្ឋានច្បាស់លាស់៕