ប្រធានាធិបតីអ៊ុយក្រែន លោក Volodymyr Zelenskiy បានថ្លែងឱ្យដឹងនៅក្នុងសុន្ទរកថាជាវីដេអូមួយដែលបានចេញផ្សាយនៅព្រឹកថ្ងៃពុធនេះថា ជំហររបស់អ៊ុយក្រែន និងរុស្ស៊ី ក្នុងកិច្ចចរចាស្ដីពីសន្តិភាព ហាក់មើលទៅមានភាពប្រាកដប្រជាជាងមុន។ ទោះជាយ៉ាងណា លោកថា ដំណើរការនេះត្រូវការពេលវេលាបន្ថែមទៀត។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់មន្ត្រីជាន់ខ្ពស់អ៊ុយក្រែនមួយរូបដែលបានឱ្យដឹងកាលពីថ្ងៃអង្គារថា កិច្ចពិភាក្សារវាងខ្លួនជាមួយនឹងរុស្ស៊ីមានការលំបាកខ្លាំង ប៉ុន្តែវានៅតែមានចន្លោះសម្រាប់ការសម្របសម្រួល ខណៈដែលការចរចានឹងបន្តនៅថ្ងៃពុធនេះបន្ថែមទៀត។
ជាមួយគ្នានេះ លោក Volodymyr Zelenskiy បន្ថែមថា៖ «កិច្ចប្រជុំនៅតែបន្ត ដោយខ្ញុំទទួលបានដំណឹងថា ជំហរក្នុងអំឡុងពេលការចរចាហាក់ស្ដាប់ទៅមានភាពប្រាកដប្រជាជាងពេលកន្លងទៅ។ ទោះជាយ៉ាងណា យើងត្រូវការពេលវេលាបន្ថែមទៀតសម្រាប់រាល់ការសម្រេចចិត្តទាំងឡាយណា ដើម្បីជាផលប្រយោជន៍របស់អ៊ុយក្រែន»។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចលនាទ័ពរបស់ខ្លួនចូលមកឈ្លានពានប្រទេសជិតខាងមួយនេះ។
ទោះជាយ៉ាងណា ការឈ្លានពានពីសំណាក់រុស្ស៊ីនេះ នៅមិនទាន់សម្រេចបាននូវគោលបំណងរបស់ប្រធានាធិបតីរបស់ខ្លួនក្នុងការផ្ដួលរំលំរដ្ឋាភិបាលអ៊ុយក្រែននោះទេ៕
