ថ្នាក់ដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ (Naga World) បានអះអាងថា ពួកគេនឹងចូលតុចរចាដើម្បីរកដំណោះស្រាយវិវាទនៅក្រុមហ៊ុនល្បែងមួយនេះ ដរាបណាសមាជិកសហជីព ៣នាក់ទៀត ដែលកំពុងជាប់ឃុំនៅពន្ធនាគាររាជធានីភ្នំពេញ ត្រូវបានតុលាការដោះលែង។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ដែលទើបចេញពីពន្ធនាគារប្រាប់វីអូឌីនៅថ្ងៃទី១៦ ខែមីនា ថា ពួកគាត់បានរង់ចាំកិច្ចចរចាដោះស្រាយវិវាទជាមួយក្រុមហ៊ុនប្រមាណ៨ខែមកហើយ។
ជាមួយគ្នានេះ កញ្ញាថា ថ្នាក់ដឹកនាំសហជីពបានបន្ទន់ឥរិយាបថច្រើនណាស់មកហើយ ដើម្បីស្វែងរកដំណោះស្រាយពិតប្រាកដមួយ ជុំវិញវិវាទនៅក្រុមហ៊ុនណាហ្គានេះ រហូតបានសន្យាថា នឹងមិនចូលរួមធ្វើកូដកម្ម ហើយក៏មិនដឹកនាំការប្រជុំតវ៉ានានា បើទោះបីជាសកម្មភាពទាំងអស់នេះគឺជាសិទ្ធិ និងតួនាទីរបស់ថ្នាក់ដឹកនាំសហជីព និងតំណាងកម្មករក៏ដោយ។
លើសពីនេះកញ្ញាថា ថ្នាក់ដឹកនាំសហជីពថែមទាំងបានប្រាប់ទៅកម្មករនិយោជិតឱ្យផ្អាកការតវ៉ាមួយរយៈសិន ដើម្បីបង្កើតបរិយាកាសស្ងប់ស្ងាត់ក្នុងការចរចារកដំណោះស្រាយបញ្ចប់វិវាទទៀតផង។
យ៉ាងណា ពាក់ព័ន្ធការអញ្ជើញកោះប្រជុំរបស់ក្រសួងការងារ កាលពីថ្ងៃម្សិលមិញ កញ្ញាថា ថ្នាក់ដឹកនាំសហជីពនិងក្រុមប្រតិភូចរចាមិនអាចចូលរួមបានឡើយ ដោយសារតែសមាជិកសហជីពរបស់ខ្លួន៣នាក់ទៀត មិនទាន់ត្រូវបានដោះលែង។
កញ្ញា ឈឹម ស៊ីថរ បញ្ជាក់ថា៖ «អីចឹងទៅ ការដែលឱ្យពួកយើងចូលតុចរចា ខណៈដែលក្រុមការងារយើង៣នាក់ទៀត កំពុងជាប់ពន្ធនាគារ គឺជាអ្វីដែលពួកយើង មិនអាចបន្ទន់ឥរិយាបថលើសហ្នឹងទៀតបានទេ គឺដាច់ខាតត្រូវតែដោះលែងពួកគាត់សិន ទើបពួកយើងអាចចូលទៅក្នុងតុចរចាហ្នឹងបាន។ បើមិនអីចឹងទេ គឺយើងត្រូវ[ស្ថិត]ទៅក្នុងស្ថានភាពមួយដែល វាអត់មានតុល្យភាពនៅក្នុងការចរចាទេ។ ខ្ញុំចង់រំលឹកថា បើទោះពីពួកខ្ញុំនៅខាងក្រៅ[ឃុំ]មែន ប៉ុន្តែបទចោទប្រកាន់នៅមិនទាន់ត្រូវបានទម្លាក់ចោលទេ ហើយពួកយើងសុខចិត្តបង្ហាញឆន្ទៈក្នុងការបញ្ចប់បញ្ហា ចង់រកដំណោះស្រាយ ចូលតុចរចាហ្នឹង ទាំងដែលនៅជាប់បទចោទប្រកាន់នៅតាមខ្លួននៅឡើយ»។
កាលពីយប់ថ្ងៃទី១៤ ខែមីនា ឆ្នាំ២០២២ តុលាការបានសម្រេចដោះលែងថ្នាក់ដឹកនាំសហជីពណាហ្គាវើលដ៍ចំនួន ៨នាក់ឱ្យនៅក្រៅឃុំជាបណ្ដោះអាសន្ន។
ដោយឡែក សមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ ៣នាក់ទៀតដែលកំពុងជាប់ឃុំឃាំងនៅពន្ធនាគាររាជធានីភ្នំពេញឬប៉េហ្ស៊ី(PJ) ដែលមិនទាន់ដោះលែង ត្រូវបានតុលាការចោទពីបទរារាំងវិធានការសុខាភិបាលពាក់ព័ន្ធការការពារជំងឺកូវីដ-១៩។
យ៉ាងណា បើតាមសេចក្តីថ្លែងការណ៍របស់រាជរដ្ឋាភិបាលនៅថ្ងៃទី១៥ ខែមីនា បានឱ្យដឹងថា កូដករដែលកំពុងជាប់ឃុំ ៣នាក់ទៀត ក្រសួងការងារក៏បានរៀបចំសំណើដាក់ទៅកាន់ក្រសួងយុត្តិធម៌ និងក្រសួងសុខាភិបាលដើម្បីពិនិត្យ និងរកអន្តរាគមន៍ដោះលែងតាមផ្លូវច្បាប់។
រដ្ឋាភិបាលបញ្ជាក់ថា ក្រសួងការងារនឹងធ្វើការសម្របសម្រួល ដើម្បីស្វែងរកដំណោះស្រាយវិវាទការងារក្រុមហ៊ុនល្បែងមួយនេះ ដោយបានអញ្ជើញភាគីទាំងពីរមកប្រជុំដោះស្រាយបន្តនៅរសៀលថ្ងៃទី១៦ ខែមីនា ឆ្នាំ២០២២។
កាលពីថ្ងៃម្សិលមិញ ក្រសួងការងារនិងបណ្តុះបណ្តាលវិជ្ជាជីវៈ បានចេញសេចក្តីជូនដំណឹងមួយ បង្ហាញការសោកស្តាយដោយសារដំណើរការប្រជុំរវាងភាគីនិយោជក និងតំណាងកម្មករនិយោជិត មិនអាចប្រព្រឹត្តទៅបាន ដោយសារអវត្តមានតំណាងកម្មករនិយោជិត។
ជាថ្មីម្តងទៀត ក្រសួងការងារ អំពាវនាវឱ្យភាគីតំណងកម្មករនិយោជិតចូលរួមប្រជុំតាមការអញ្ជើញរបស់ក្រសួង ដើម្បីដោះស្រាយបញ្ចប់វិវាទរួមឱ្យបានឆាប់តាមផ្លូវច្បាប់ និងតាមការសន្យារបស់ខ្លួន នៅរសៀលថ្ងៃទី១៧ ខែមីនា ឆ្នាំ២០២២៕
