នាយករដ្ឋមន្ត្រីកម្ពុជា បានផ្ញើសារកុំឱ្យពលរដ្ឋជេរលោករឿងសាំងឡើងថ្លៃ ដោយលោកសម្អាងថា វាជាបញ្ហាសកលបណ្ដាលមកពីសង្គ្រាមរវាងរុស្ស៊ី និងអ៊ុយក្រែន។
ការថ្លែងរបស់លោក ហ៊ុន សែន ធ្វើឡើងក្នុងពិធីសម្ពោធភូមិកុមារ SOS នៅខេត្តព្រៃវែង នាព្រឹកថ្ងៃព្រហស្បតិ៍នេះ។
លោកថា៖ «សាំងឡើងថ្លៃ សូមកុំជេរ ហ៊ុន សែន អី! រឿងហ្នឹង វាជារឿងសភាពការណ៍អន្តរជាតិដែលបានកើតឡើង សង្គ្រាមរវាងរុស្ស៊ីនិងអ៊ុយក្រែន ដែលបានបង្កើតជាបញ្ហាសម្រាប់សេដ្ឋកិច្ចសកល ហើយអតិផរណា [ការកើនឡើងថ្លៃទំនិញនៅទីផ្សារ] នៅសហរដ្ឋអាមេរិក គឺថាមិនធ្លាប់មានក្នុងរយៈពេល៤០ឆ្នាំៗ នៅអឺរ៉ុបក៏កំពុងរងផលប៉ះពាល់»។
ប៉ុន្មានថ្ងៃមកនេះ ទំនិញនៅលើទីផ្សារបានហក់ឡើងថ្លៃ ក្នុងនោះមានទាំងប្រេងឥន្ធនៈផងដែរ ដែលការឡើងថ្លៃនោះបានឡើងពីជាង៤ ០០០រៀងក្នុងមួយលីត្រ សម្រាប់សាំងស៊ុបពែ ដល់ទៅ៥៨៥០រៀលក្នុងមួយលីត្រ គិតត្រឹមថ្ងៃទី១៧ ខែមីនា ឆ្នាំ២០២២នេះ។
ការដែលនាយករដ្ឋមន្ត្រីផ្ញើសារបែបនេះ ក៏ស្របគ្នាទៅនឹងអ្នកប្រើប្រាស់បណ្ដាញសង្គមជាច្រើន ក្នុងនោះក៏មានទាំងមេដឹកនាំសហជីព និងអ្នកនយោបាយក្រៅរដ្ឋាភិបាលផង បានបញ្ចេញមតិបង្ហាញពីការព្រួយបារម្ភអំពីផលប៉ះពាល់ទៅលើពលរដ្ឋដែលមានប្រាក់ចំណូលទាប។
ប្រធានសហភាពសហជីពកម្ពុជា លោក រ៉ុង ឈុន បាននិយាយក្នុងសេចក្ដីថ្លែងការណ៍ចុះថ្ងៃទី១៦ ខែមីនានេះថា ការហក់ឡើងនូវតម្លៃប្រេងឥន្ធនៈនាប៉ុន្មានខែចុងក្រោយនេះ បានបង្កផលប៉ះពាល់ដល់ពលរដ្ឋមួយចំនួន ពិសេសអ្នកមានចំណូលទាប ដូចជា កម្មករ អាជីវករ កសិករ មន្ត្រីរាជការ រួមទាំងអ្នកប្រកបមុខរបរមិនរៀបរយ។
សេចក្ដីថ្លែងការណ៍បានអះអាងថា បញ្ហានេះ រដ្ឋាភិបាលមិនទាន់មានវិធានការ ដើម្បីដោះស្រាយនៅឡើយទេ។
បន្ថែមពីនេះ លោក រ៉ុង ឈុន ឱ្យដឹងនៅថ្ងៃនេះថា ការដែលនាយករដ្ឋមន្ត្រីសម្អាងការហក់ឡើងថ្លៃប្រេងដោយសារបញ្ហាសកល ជារឿងសមហេតុផលមួយ។ ប៉ុន្តែលោកថា ការបញ្ចេញកញ្ចប់ថវិកាជាតិ ដើម្បីជួយដោះស្រាយបញ្ហាប្រឈមរបស់ពលរដ្ឋ វាជាទំនួលខុសត្រូវរបស់រដ្ឋាភិបាល។
លោកថា៖ «បើរដ្ឋាភិបាលខ្លាចការស្ដីបន្ទោស ហើយខ្លួនមិនព្រមមានវិធានការ ទាល់តែលាឈប់ដឹកនាំទៅ ឱ្យអ្នកដែលបានគិតគូរអំពីសុខទុក្ខរបស់ប្រជាពលរដ្ឋដឹកនាំម្ដងទៅ។ ហើយធម្មតា អ្នកដឹកនាំមានការទទួលខុសត្រូវចំពោះបញ្ហារបស់ប្រជាពលរដ្ឋ»។
ប្រធានគណបក្សកម្ពុជានិយម និងអតីតតំណាងរាស្ត្រគណបក្សសង្រ្គោះជាតិដែលតុលាការរំលាយ លោក យ៉ែម បុញ្ញឬទ្ធិ ផ្ដល់ជាយោបល់ថា រដ្ឋាភិបាលអាចទប់ស្កាត់ស្ថានភាពនេះបាន តាមវិធានកាត់បន្ថយពន្ធទៅលើការនាំចូលប្រេងសាំងជាអន្តរកាល ប្រើប្រាស់ទុនបម្រុងរបស់ជាតិ ពិសេសថវិកាជាតិ ស្ដីពីគម្រោងឥតព្រាងទុក សម្រាប់គ្រោះមហន្តរាយ ឬវិបត្តិផ្សេងៗ រួមទាំងថវិកាបម្រុង សម្រាប់ទប់ស្កាត់ជំងឺកូវីដ-១៩។
លោកថា៖ «ពីព្រោះតម្លៃប្រេងសាំងនេះ បើប្រៀបធៀបជាមួយប្រាក់ចំណូលរបស់ប្រជាពលរដ្ឋ គឺមានលក្ខណៈធ្ងន់ធ្ងរ ហើយនាំឱ្យទំនិញឡើងថ្លៃយ៉ាងគំហុកនៅថ្ងៃខាងមុខបន្តបន្ទាប់ទៀត»។
អ្នករត់រ៉ឺម៉កកង់បីនៅភ្នំពេញមួយរូប លោក ប៊ុន ប៉ិច អះអាងថា ការហក់ឡើងតម្លៃប្រេង និងហ្គាស នាប៉ុន្មានខែមកនេះ ធ្វើឱ្យការរកប្រាក់ចំណូលរបស់គាត់ធ្លាក់ចុះពី៥ម៉ឺនរៀលក្នុង១ថ្ងៃ មកនៅ២ម៉ឺនរៀលក្នុងមួយថ្ងៃវិញ ក្រោយពីផាត់ថ្លៃហ្គាសរួច។
លោកថា៖ «គ្រាន់តែបានមួយទប់ទល់ទិញម្ហូបទិញអីបាន បើថាឱ្យបានសល់សងធនាគារអី អត់មានសល់ទេ រកលុយសងមិនបានទេ»។
បញ្ហាប្រេងឥន្ធនៈឡើងថ្លៃខ្ពស់នេះ លោកអំពាវនាវទៅរដ្ឋាភិបាលឱ្យជួយទម្លាក់តម្លៃប្រេង នៅត្រឹម៣ ០០០រៀលក្នុងមួយលីត្រ ទើបពួកគាត់អាចមានលទ្ធភាពសន្សំប្រាក់ខ្លះសម្រាប់សងត្រលប់ទៅធនាគារវិញបាន៕