អាជ្ញាធរខេត្តព្រះសីហនុ បានបញ្ជូនមនុស្ស១០នាក់ទៅតុលាការ ក្រោយពលរដ្ឋទាំងនោះធ្វើសកម្មភាពចូលកាប់ទន្ទ្រានដីព្រៃក្នុងតំបន់ការពារ ស្ថិតក្នុងភូមិចាំស្រី ឃុំកំពង់សីលា ស្រុកកំពង់សីលា។
ក្នុងសេចក្តីប្រកាសព័ត៌មានរបស់មន្ទីរបរិស្ថានខេត្តព្រះសីហនុ ចុះថ្ងៃទី១៤ ខែមីនា ឆ្នាំ២០២២ បានឱ្យដឹងថា កាលពីថ្ងៃទី១៣ ខែមិនានេះ សមត្ថកិច្ចចម្រុះ និងមន្ត្រីបរិស្ថានខេត្តព្រះសីហនុ បានចុះបង្ក្រាបសកម្មភាពកាប់ឆ្ការព្រៃក្នុងតំបន់ឧទ្យានជាតិជួរភ្នំក្រវ៉ាញខាងត្បូង ដោយឃាត់ខ្លួនមនុស្ស ២៩៥នាក់ (ស្រី១១៣នាក់) ក្នុងនោះសមត្ថកិច្ចជំនាញបានបញ្ជូនខ្លួនមនុស្ស ១០នាក់ ដើម្បីកសាងសំណុំរឿងទៅតុលាការ។
សេចក្តីប្រកាសព័ត៌មានដដែល ឱ្យដឹងទៀតថា ក្នុងប្រតិបត្តិការនោះ អាជ្ញាធរដកហូតបានវត្ថុតាងមួយចំនួន ដូចជា ចបកាប់១ដើម ចបជីក៥ដើម ញញួរ៣ដើម ពូថៅ១៨ដើម ដែកគាស់២ ដែកគោល៥គីឡូ កាំបិតផ្គាក់២៣ដើម កាំបិតកួច៣តង់ រថយន្ត៤គ្រឿង និងម៉ូតូ២គ្រឿង។
បើសេចក្តីប្រកាសព័ត៌មាននេះ កន្លងមក មន្ត្រីបរិស្ថានខេត្តព្រះសីហនុ បានចុះទប់ស្កាត់ និងបង្ក្រាបបទល្មើស រុករាន កាប់ឆ្លារព្រៃ ដាំដំណាំ សង់ខ្ទម និងបោះបង្គោលរបងហ៊ុព័ទ្ធ កាន់កាប់ជាកម្មសិទ្ធិដោយខុសច្បាប់ ស្ថិតក្នុងតំបន់ឧទ្យានជាតិជូរភ្នំក្រវាញខាងត្បូង ជាបន្តបន្ទាប់។
ប្រធានមន្ទីរបរិស្ថានខេត្តព្រះសីហនុ លោក សាមុត សុធារិទ្ធិ ប្រាប់វីអូឌីនៅថ្ងៃទី១៧ខែមីនានេះថា អាជ្ញាធរបានបញ្ជូនពលរដ្ឋទាំង ១០នាក់នោះ ទៅតុលាការហើយកាលពីរសៀលថ្ងៃម្សិលមិញ ក្រោយពីឃុំខ្លួន៤៨ម៉ោងនៅស្នងការដ្ឋានខេត្តព្រះសីហនុ ខណៈពលរដ្ឋជាង២០០នាក់ទៀត ត្រូវបានសមត្ថកិច្ចជំនាញធ្វើការអប់រំ និងបានអនុញ្ញាតឱ្យត្រឡប់ទៅផ្ទះវិញ។ យ៉ាងលោកមិនផ្តល់ព័ត៌មានលម្អិតជុំវិញករណីនេះទេ។
មេឃុំកំពង់សីលាលោក ហុង គា មានប្រសាសន៍ថា ប្រជាពលរដ្ឋដែលប្រមូលផ្តុំទន្ទ្រានដីព្រៃរបស់រដ្ឋនេះពុំមែនជាពលរដ្ឋនៅក្នុងមូលដ្ឋាននោះទេ គឺជាអ្នកចំណាកស្រុកមកពីខេត្តផ្សេងៗ ដូចជា ខេត្តកំពង់ស្ពឺ។ លោកថា ពួកគេមកតាមមេខ្យល់ ដើម្បីទៅចាប់យកដី និងកាប់ឆ្ការព្រៃ។
បើតាមមេឃុំរូបនេះ ពលរដ្ឋទាំងនោះ ទើបតែមកធ្វើសកម្មភាពកាប់ស្ការព្រៃជាលើកដំបូង ហើយត្រូវបានបង្ក្រាបភ្លាមៗពីសំណាក់អាជ្ញាធរពាក់ព័ន្ធ។
លោកបន្ថែមថា៖ «ពួកគេជឿថា ទោះចាញ់ក៏គេបានលុយដែរ ហើយប្រសិនបើពួកគេបានដី ពួកគេនឹងញុះញង់អ្នកភូមិផ្សេងទៀតឱ្យចូលរួមជាមួយពួកគេដើម្បីទាមទារដីធ្លី [បន្ថែមទៀត] ហើយពួកគេជឿថាអាជ្ញាធរមិនអាចធ្វើអ្វីប្រឆាំងពួកគេបាន»។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង សាទរចំពោះចំណាត់ការទៅលើជនទាំងឡាយណាដែលទន្ទ្រានយកដីព្រៃក្នុងតំបន់ការពារនានា ប៉ុន្តែលោកជំរុញដល់អាជ្ញាធរពាក់ព័ន្ធអនុវត្តឱ្យបានស្មើភាពគ្នា ដោយមិនថា ជននោះជាអ្នកមានលុយមានអំណាច ឬពលរដ្ឋធម្មតានោះទេ។
មន្ត្រីសង្គមស៊ីវិលដែលធ្វើការផ្នែកព្រៃឈើរូបនេះ ក៏ជំរុញឱ្យរដ្ឋាភិបាលមានចំណាត់ការលើអាជ្ញាធរពាក់ព័ន្ធក្នុងដែនសមត្ថកិច្ចផងដែរ ចំពោះការធ្វេសប្រហែសធ្វើឱ្យមានបទល្មើសកើតឡើងក្នុងតំបន់ការពារទាំងនោះផងដែរ។
លោកបន្ថែមថា៖ «មន្ត្រីអាជ្ញាធរមូលដ្ឋានក៏ត្រូវទទួលដែរ ប្រសិនជាខ្លួនបានដឹងហើយនៅបន្តឱ្យមានភាពធ្វេសប្រហែសនៅក្នុងបទល្មើសទាំងអស់នោះ។ ចំណុចនេះផងដែរ ខ្ញុំយល់ថា មានតែចូលរួមរឹតបន្តឹងក្នុងការអនុវត្តច្បាប់ និងមួយទៀតការគាំទ្រនិងលើកទឹកចិត្តឱ្យប្រជាសហគមន៍ចូលរួមក្នុងការការពារធនធានធម្មជាតិ បានអាចការពារធនធានធម្មជាតិទាំងអស់ហ្នឹងបាន»។
មាត្រា៥៦ និងមាត្រា៦២ នៃច្បាប់ស្តីពីព្រៃឈើ ចែងថា ជនទាំងឡាយណាដែលធ្វើសកម្មភាពកាប់គាស់ រុករាន ឈូសឆាយដីព្រៃ ឆ្ការ ដុត ដើម្បីយកដីធ្វើជាកម្មសិទ្ធិ ត្រូវផ្តន្ទាទោសដាក់ពន្ធនាគារពី ៥ឆ្នាំ ទៅ ១០ឆ្នាំ និងពិន័យជាប្រាក់ពី ១៥លានរៀល ទៅ ១៥០លានរៀល។ ចំពោះបុគ្គលប្រព្រឹត្ត ជានីតិបុគ្គល និងត្រូវពិន័យជាប្រាក់ពី ១៥០លានរៀល ទៅ ២៥០លានរៀល ខណៈវត្ថុតាងត្រូវរឹបអូសជាសម្បត្តិរដ្ឋ៕