អន្តរជាតិ

ចារកម្មយោធាអង់គ្លេសថា ការឈ្លានពានរបស់រុស្ស៊ីលើអ៊ុយក្រែនហាក់ជាប់គាំង

លោក ភុន ច័ន្ទឧសភា
| ១៧ មីនា ២០២២
ម៉ោង ១៦:៤៧

ប្រធានាធិបតីអ៊ុយក្រែន លោក Zelensky ជួបប្រជុំជាមួយនាយករដ្ឋមន្ត្រីអង់គ្លេស លោក Boris Johnson រួមនឹងមន្ត្រីផ្សេងទៀត ពាក់ព័ន្ធនឹងការឈ្លានពានរបស់រុស្ស៊ីលើអ៊ុយក្រែន។ (ធ្វីតទ័រនាយករដ្ឋមន្ត្រីអង់គ្លេស៖ Boris Johnson)

ចារកម្មយោធារបស់ចក្រភពអង់គ្លេស បានឱ្យដឹងនៅថ្ងៃព្រហស្បតិ៍នេះថា ការឈ្លានពានរបស់រុស្ស៊ីលើអ៊ុយក្រែនហាក់លែងដំណើរការទៅមុខនៅគ្រប់ទីតាំងទាំងអស់ ខណៈកងកម្លាំងរុស្ស៊ីទទួលរងនូវការខាតបង់យ៉ាងធ្ងន់ធ្ងរ ដែលបានធ្វើឱ្យសកម្មភាពរបស់ខ្លួនតាមផ្លូវគោក សមុទ្រ ឬផ្លូវអាកាស មានការរីកចម្រើនតិចតួចបំផុតក្នុងរយៈពេលប៉ុន្មានថ្ងៃថ្មីៗនេះ។

ទីភ្នាក់ងារសារព័ត៌មាន Reuters បានស្រង់ការលើកឡើងរបស់ក្រសួងការពារជាតិអង់គ្លេសយកមកចុះផ្សាយថា៖ «សកម្មភាពតស៊ូរបស់អ៊ុយក្រែននៅតែរឹងមាំ និងមានការសម្របសម្រួលយ៉ាងល្អ»។

ប្រភពដដែលបន្តថា៖ «គិតរហូតមកដល់ពេលនេះ ទឹកដីអ៊ុយក្រែនភាគច្រើន ដែលរួមទាំងទីក្រុងធំៗទាំងអស់នោះ នៅតែស្ថិតក្នុងកណ្ដាប់ដៃអ៊ុយក្រែននៅឡើយ»។

គួរបញ្ជាក់ថា ចក្រភពអង់គ្លេស បានខិតខំធ្វើសកម្មភាពជាច្រើនក្នុងការឆ្លើយតបជាអន្តរជាតិចំពោះការលុកលុយរបស់រុស្ស៊ីលើអ៊ុយក្រែន រួមមាន ការផ្តល់ជំនួយផ្នែកយោធា ការជំរុញឱ្យមានការដាក់ទណ្ឌកម្មធ្ងន់ធ្ងរបន្ថែមទៀតលើរុស្ស៊ី និងផ្ដល់ការគាំទ្រផ្នែកហិរញ្ញវត្ថុ ដោយកាលពីពេលថ្មីៗនេះ ខ្លួនក៏បានសម្រេចផ្ដល់ថវិកាចំនួន១០០លានដុល្លារអាមេរិក (ស្មើនឹង៧៥,៦លានផោន) បន្ថែមទៀត តាមរយៈធនាគារពិភពលោកដល់អ៊ុយក្រែនផងដែរ ដើម្បីជួយកាត់បន្ថយសម្ពាធហិរញ្ញវត្ថុដែលប្រទេសមួយនេះជួបប្រទះ៕

រុស្ស៊ី, អ៊ុយក្រែន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។