រដ្ឋាភិបាលអាមេរិក បានផ្ដល់ថវិកាជាង ៨៤លានដុល្លារដល់រដ្ឋាភិបាលកម្ពុជា សម្រាប់រៀបចំស្បៀងអាហារដែលមានជីវជាតិដល់សិស្សថ្នាក់មត្តេយ្យនិងបឋម ចាប់តាំងពីឆ្នាំ២០២១មក។
កាលពីថ្ងៃទី១៧ ខែមីនា ឆ្នាំ២០២២ ម្សិលមិញ ក្រសួងអប់រំ យុវជន និងកីឡា តំណាងកម្មវិធីស្បៀងអាហារពិភពលោក(WFP) និងស្ថានទូតសហរដ្ឋអាមេរិកប្រចាំកម្ពុជា បានធ្វើទស្សនកិច្ចនៅខេត្តសៀមរាប ដើម្បីប្រារព្ធពិធីផ្តល់អាហារតាមសាលារៀន និងប្រគល់សម្ភារៈគាំទ្រដល់កម្មវិធីនៅសាលារៀនចំនួន ៨៥បន្ថែមទៀត។
តំណាងកម្មវិធីស្បៀងអាហារពិភពលោក លោកស្រី គ្លែរ កូណាន់ លើកឡើងក្នុងសេចក្តីប្រកាសព័ត៌មានថា ចាប់តាំងពីឆ្នាំ២០២១ រដ្ឋាភិបាលសហរដ្ឋអាមេរិក បានផ្ដល់ទឹកប្រាក់សរុបជាង ៨៤លានដុល្លារ សម្រាប់គាំទ្រកម្មវិធីស្បៀងអាហារ ដោយធ្វើយ៉ាងណាឱ្យកុមារកម្ពុជា ដែលមកពីក្រុមគ្រួសារក្រីក្រទទួលបានអាហារពេលព្រឹកដែលមានជីវជាតិ និងបានរួមចំណែកលើកកម្ពស់ការអប់រំ និងអាហារូបត្ថម្ភរបស់ពួកគេ។
លោកស្រីបញ្ជាក់បន្ថែមថា៖«អ្វីដែលជាចំណុចសំខាន់បំផុតនោះ គឺវាជាមូលដ្ឋានគ្រឹះសម្រាប់កម្មវិធីជាតិ ដោយជួយអភិវឌ្ឍសមត្ថភាពជាតិក្នុងការចាត់ចែងកម្មវិធី និងការកសាងហេដ្ឋារចនាសម្ព័ន្ធសម្រាប់ទទួលទានអាហារ ទឹកស្អាត ក៏ដូចជាអនាម័យ នៅក្នុងសាលារៀនទូទាំងប្រទេស»។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជាលោក Patrick W. Murphy បានលើកឡើងក្នុងសេចក្ដីប្រកាសព័ត៌មានដែរថា ការផ្ដល់អាហារប្រកបដោយគុណភាពតាមសាលារៀន មានសារៈសំខាន់ណាស់សម្រាប់សិស្ស និងក្រុមគ្រួសាររបស់ពួកគេ។ លោកបន្តថា សហរដ្ឋអាមេរិកមានសេចក្តីសោមនស្សរីករាយ ក្រោយពីបានឃើញលទ្ធផលនៃការគាំទ្រកន្លងមករបស់សហរដ្ឋអាមេរិក ចំពោះអាហារូបត្ថម្ភតាមសាលារៀននៅកម្ពុជា។
លោក Patrick W. Murphy បន្ថែមថា៖ «ការផ្ដល់អាហារប្រកបដោយគុណភាពតាមសាលារៀនមានសារៈសំខាន់ណាស់សម្រាប់សិស្ស និងក្រុមគ្រួសាររបស់ពួកគេ ហើយនេះគឺជាសកម្មភាពជាទីរីករាយនិងសាទរដែលក្រសួងអប់រំទទួលយកកម្មវិធីនេះ និងពង្រីកនៅតាមសាលារៀនទូទាំងប្រទេស»។
រដ្ឋមន្ត្រីក្រសួងអប់រំ យុវជន និងកីឡាលោក ហង់ ជួនណារ៉ុន បានលើកឡើងថា ថវិកាដែលអាមេរិកបានផ្ដល់សម្រាប់គាំទ្រកម្មវិធីស្បៀងអាហារនៅតាមសាលារៀននេះមានសារៈសំខាន់ ជាពិសេសក្នុងការជួយទប់ទល់ទៅនឹងផលប៉ះពាល់ដែលបង្កដោយជំងឺរាតត្បាតទៅលើការអភិវឌ្ឍធនធានមនុស្ស។
លោក ហង់ ជួនណារ៉ុន ថ្លែងថា៖ «កម្មវិធីប្រគល់ជូននេះ គឺជាព្រឹត្តិការណ៍ដ៏សំខាន់មួយសម្រាប់កម្មវិធីផ្តល់ស្បៀងអាហារតាមសាលារៀននៅកម្ពុជា។ វាបង្ហាញនូវការប្ដេជ្ញាចិត្តរបស់រាជរដ្ឋាភិបាល ក្នុងការពង្រីកកម្មវិធីនេះជាបណ្តើរៗ ដោយទទួលស្គាល់ពីឥទ្ធិពលជាវិជ្ជមានរបស់កម្មវិធីនេះទៅលើការអប់រំ អាហារូបត្ថម្ភ និងកិច្ចគាំពារសង្គម»។
កម្មវិធីផ្តល់ស្បៀងអាហារតាមសាលារៀន បានផ្តល់អាហារដែលមានជីវជាតិដល់សិស្ស ដើម្បីឱ្យពួកគេបានទទួលទាននៅតាមសាលារៀន ដោយការទទួលទានអាហារនៅសាលារៀននេះ មានសារសំខាន់ដោយបានរួមចំណែកដល់ការអប់រំតាមរយៈការបង្កើនការចុះឈ្មោះចូលរៀន វត្តមាន ការយកចិត្តទុកដាក់ និងភាពរហ័សរហួនរបស់សិស្សនៅក្នុងថ្នាក់រៀន។
ជាមួយគ្នានេះ កម្មវិធីផ្តល់ស្បៀងអាហារតាមសាលារៀន បានផ្តល់នូវរបបអាហារមានជីវជាតិ ដែលជួយរួមចំណែកឱ្យកុមារមានសុខភាពល្អ និងដើរតួក្នុងការលើកកម្ពស់ដោយប្រយោល នូវប្រាក់ចំណូលរបស់ក្រុមគ្រួសារដែលងាយរងគ្រោះបំផុត ខណៈកម្មវិធីនេះ ក៏បានរួមចំណែកផងដែរក្នុងការជំរុញសេដ្ឋកិច្ចតាមមូលដ្ឋាន តាមរយៈការដាំដុះនិងទិញដូរកសិផលនៅក្នុងសហគមន៍។
នៅកម្ពុជា កម្មវិធីផ្តល់ស្បៀងអាហារតាមសាលារៀនផ្តល់អត្ថប្រយោជន៍ដល់សិស្សថ្នាក់មត្តេយ្យ និងបឋមសិក្សាចំនួន ២៨០ ០០០នាក់ នៅក្នុងសាលារៀនចំនួន ១ ១១៣ នៅក្នុងខេត្តចំនួន១០។ បច្ចុប្បន្នថវិកាដែលទទួលបាននេះ រដ្ឋាភិបាលកម្ពុជា ជាអ្នកផ្ដល់មូលនិធិ និងចាត់ចែងកម្មវិធីនៅតាមសាលាចំនួន២៩០ (២៦%) និងបានបែងចែកថវិកាចំនួន២,៩លានដុល្លារ សម្រាប់កម្មវិធីផ្ដល់ស្បៀងអាហារនៅក្នុងឆ្នាំនេះ។
បើតាមមន្ត្រីផ្នែកទំនាក់ទំនងនិងរបាយការណ៍កម្មវិធីស្បៀងអាហារពិភពលោក (WFP) នៃអង្គការសហប្រជាជាតិប្រចាំកម្ពុជា លោកស្រី ជា ជូ ប្រាប់វីអូឌីកាលពីថ្ងៃទី១០ ខែវិច្ឆិកា ឆ្នាំ២០២១ថា កម្មវិធីឧបត្ថម្ភកុមារនេះត្រូវបាន WFP ផ្ដើមធ្វើនៅកម្ពុជាតាំងពីឆ្នាំ១៩៩៩ ពីមានការសហការជាមួយរដ្ឋាភិបាលកម្ពុជាតាមរយៈក្រសួងអប់រំ។
លោកស្រី ជា ជូ បន្តថា ខេត្តដែលកម្មវិធីស្បៀងអាហារពិភពលោក និងរដ្ឋាភិបាលកម្ពុជា បាននិងកំពុងសហការផ្ដល់អាហារតាមសាលារៀននៅក្នុងខេត្តចំនួន១០ ដូចជា ខេត្តកំពង់ឆ្នាំង ពោធិ៍សាត់ សៀមរាប កំពង់ធំ ឧត្ដរមានជ័យ ជាដើម៕