សមត្ថកិច្ចខេត្តកំពង់ឆ្នាំង អះអាងថា មន្ត្រីជំនាញបានបញ្ជូនជនជាតិវៀតណាមម្នាក់ទៅតុលាការ ក្រោយរកឃើញថាបានធ្វើសកម្មភាពនេសាទដោយខុសច្បាប់នៅបឹងទន្លេសាប។
ការបញ្ជូនជនជាតិវៀតណាមទៅតុលាការនេះ ធ្វើឡើងក្រោយពីប្រធានរាជបណ្ឌិត្យសភាកម្ពុជា លោកបណ្ឌិត សុខ ទូច សហការជាមួយខណ្ឌរដ្ឋបាលជលផលខេត្តកំពង់ឆ្នាំង ចុះទប់ស្កាត់បទល្មើសនេសាទនៅបឹងទន្លេសាប ស្ថិតក្នុងស្រុកបរិបូណ៍ កាលពីថ្ងៃម្សិលមិញនេះ។
នាយខណ្ឌរដ្ឋបាលជលផលខេត្តកំពង់ឆ្នាំង លោក លី ឡា ប្រាប់វីអូឌីនៅថ្ងៃសុក្រនេះថា ជនជាតិវៀតណាមឈ្មោះ ឡាំង យ៉ាងថាប់ ដែលលួចឆក់ត្រីនៅបឹងទន្លេសាបនោះ ត្រូវបានបញ្ជូនទៅតុលាការហើយកាលពីថ្ងៃម្សិលមិញនេះ។
លោកបន្ថែមថា៖ «យើងបានសហការជាមួយព្រះរាជអាជ្ញា ព្រោះយើងបានតាមដានជនសង្ស័យនេះ ពេលគាត់ចូលផ្ទះយើងសុំដីកាឆែកឆេរ និងឃាត់ខ្លួនគាត់តែម្តង គាត់ជាជនជាតិវៀតណាមនៅឆ្នុកទ្រូហ្នឹង»។
លោក លី ឡា បន្ថែមថា នេះមិនមែនជាលើកទីមួយទេ ដែលសមត្ថកិច្ចជំនាញជលផលឃាត់ខ្លួន និងបញ្ជូនជនល្មើសទៅតុលាការពាក់ព័ន្ធការនេសាទត្រីដោយប្រើប្រាស់ឧបករណ៍ឆក់ត្រីខុសច្បាប់ នៅបឹងទន្លេសាបនេះ ប៉ុន្តែភាគច្រើនជាជនជាតិខ្មែរ។
វីអូឌី មិនអាចសុំការបញ្ជាក់បន្ថែមពី ប្រធានរាជបណ្ឌិត្យសភាកម្ពុជា លោកបណ្ឌិត សុខ ទូច បានទេពាក់ព័ន្ធករណីនេះ។
ប៉ុន្តែលោកបានសរសេរនៅលើហ្វេសប៊ុករបស់លោកកាលពីថ្ងៃម្សិលមិញថា រូបលោកបានសហការជាមួយព្រះរាជអាជ្ញា និងខណ្ឌរដ្ឋបាលជលផលខេត្តកំពង់ឆ្នាំង ឃាត់បានជនជាតិវៀតណាមម្នាក់ និងទូកដែលលួចធ្វើបទល្មើសឆក់ត្រីនៅបឹងទន្លេសាបស្ថិតក្នុងឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង។
លោកសរសេរបន្តថា៖ «សូមអ្នកកុំភ្លេចថា អ្នកអាចភ្លេចច្បាប់ តែច្បាប់មិនភ្លេចអ្នកឡើយ។ សូមអរគុណដល់កម្លាំងព្រះរាជអាជ្ញាខេត្តកំពង់ឆ្នាំង និងខណ្ឌរដ្ឋបាលជលផលខេត្តកំពង់ឆ្នាំង ដែលចាប់បានករណីល្មើសក្នុងឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង»។
ក្នុងបទសម្ភាសន៍មួយរយៈពេលជាង២៥នាទី ដែលផ្សាយតាមបណ្តាញសង្គម លោកបណ្ឌិត សុខ ទូច លើកឡើងថា បទល្មើសនេសាទនៅតំបន់បឹងទន្លេសាបបានឈានការប្រកាសសន្ន។ លោកថា ជនល្មើសបានប្រើប្រាស់ឧបករណ៍នេសាទខុសច្បាប់ ដូចជា ស្បៃម៉ុង អួនក្រឡាល្អិតរាប់ពាន់ម៉ែត្រ ឈិបយន្ត និងឧបករណ៍ឆក់ត្រជាក់ ឆក់ក្តៅជាដើម ដើម្បីចាប់ត្រី ដែលធ្វើឱ្យត្រីទាំងតូចទាំងធំឆាប់វិនាសហិនហោច។
អ្នកនាំពាក្យសាលាដំបូងខេត្តកំពង់ឆ្នាំងលោក ឡុង ស៊ីថា មានប្រសាសន៍ថា លោកមិនទាន់ទទួលបានព័ត៌មាននេះនៅឡើយទេ។
ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា លោក ហេង គឹមហុង បានសាទរចំពោះចំណាត់ការរបស់អាជ្ញាធរទៅលើជនល្មើស ដែលនេសាទខុសច្បាប់នៅបឹងទន្លេសាបនេះ ប៉ុន្តែលោកថា ចំណាត់ការនេះគួរតែត្រូវបានអនុវត្តតឹងរឹងតាំងយូរណាស់មកហើយ មិនមែនទើបតែធ្វើពេលលោកបណ្ឌិតលោក សុខ ទូច ចុះស្រាវជ្រាវនេះទេ។
មន្ត្រីសង្គមស៊ីវិលរូបនេះបន្តថា បទល្មើសនេសាទក្នុងបឹងទន្លេសាបដែលបានកើតឡើងនេះ អាចជាប់ពាក់ព័ន្ធអំពើពុករលួយជាប្រព័ន្ធ រវាងអាជ្ញាធរពាក់ព័ន្ធ និងជនល្មើស ឬកម្សោយ នៃការអនុវត្តច្បាប់របស់មន្ត្រីជំនាញ។
លោក ហេង គឹមហុង ស្នើដល់រដ្ឋាភិបាលពិនិត្យឡើងវិញទៅលើការធ្វើការងារ និងការអនុវត្តច្បាប់របស់មន្ត្រីជំនាញ ឬធ្វើកំណែទម្រង់ប្រព័ន្ធ នៃការគ្រប់គ្រងលើរដ្ឋបាលជលផល ដើម្បីការពារធនធានជលផលឱ្យបានគង់យូរអង្វែង។
លោកបន្ថែមថា៖ «នេះជារឿងសំខាន់ណាស់ ប្រសិនបើមន្ត្រីទាំងអស់ហ្នឹង មានគ្រប់គ្រាន់ហើយឬក៏មានជាប់ពាក់ព័ន្ធជាមួយអំពើពុករលួយ ឬក៏មិនយកចិត្តទុកដាក់នៅក្នុងការបំពេញមុខងាររបស់ខ្លួន ក្រសួងកសិកម្ម ជាពិសេសរដ្ឋាភិបាលគួរតែធ្វើការចង្អុរបង្ហាញឱ្យមានការធ្វើកំណែទម្រង់ឡើងវិញ។ ហើយឈានទៅរកការទប់ស្កាត់ ឬឃាត់ខ្លួនមន្ត្រីទាំងឡាយណាដែលមិនបានបំពេញមុខងារ ឬក៏មានជាប់ពាក់ព័ន្ធជាមួយបទល្មើសនេសាទ ឬក៏ប្រព្រឹត្តអំពើពុករលួយដែលជំរុញឱ្យការនេសាទនេះប៉ះពាល់ដល់មច្ឆាជាតិ»។
កាលពីថ្ងៃទី១១ ខែមីនានេះ អាជ្ញាធរនៅខេត្តប៉ែកខាងត្បូងបឹងទន្លេសាប ក៏បានបញ្ជូនជនជាតិវៀតណាម៨នាក់ទៅសាលាដំបូងខេត្តពោធិ៍សាត់ ក្រោយពួកគាត់ប្រើប្រាស់ឧបករណ៍ឆក់ និងឈិបយន្តសម្រាប់នេសាទត្រីនៅបឹងទន្លេសាប។
អ្នកនាំពាក្យសាលាដំបូងខេត្តពោធិ៍សាត់ លោកស្រី ផាន់ សុគន្ធថង មានប្រសាសន៍ថា ជនជាតិវៀតណាមទាំង៨នាក់នោះត្រូវបានតុលាការចោទប្រកាន់ពីបទ «នេសាទដោយអូសអួនទឹកសាបនិងឈិបយន្ត»។
តាមមាត្រា៩៩ នៃច្បាប់ស្ដីពីជលផល ចែងថា បើជនទាំងឡាយណាដែលនេសាទដោយអូសអួនទឹកសាប និងឈិបយន្តត្រូវផ្ដន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពី៥លានរៀលទៅ៥០លានរៀល។
មាត្រា៩៨ នៃច្បាប់ដដែលនេះ ចែងថា ជនទាំងឡាយណាដែលបានប្រព្រឹត្តបទល្មើសដោយប្រើឧបករណ៍ឆក់ និងស្បៃមុងគ្រប់ប្រភេទខុសពីច្បាប់កំណត់ ត្រូវផ្ដទ្ទាទោសដាក់ពន្ធនាគារពី៣ទៅ៥ឆ្នាំ ខណៈមាត្រា១០១ នៃច្បាប់នេះបានកំណត់ថា អ្នកដែលបានប្រព្រឹត្តបទល្មើស ដោយប្រើមង ឬអួនគ្រប់ប្រភេទ ដែលមានក្រឡាតូចជាង១សង់ទីម៉ែត្រ ក្នុងដែនទឹកសាប ត្រូវផ្ដទ្ទាទោសដាក់ពន្ធនាគារពី១ខែ ទៅ១ឆ្នាំ និងពិន័យជាប្រាក់ពី១លានរៀលទៅ៥លានរៀល។
ចំណែកមាត្រា១០២ នៃច្បាប់ដដែលនេះ ចែងថា ប្រសិនបើសកម្មភាពបទល្មើសនោះប្រព្រឹត្តឡើងដោយមន្ត្រីអាជ្ញាធរដែនដី មន្ត្រីនគរបាល និងមន្ត្រីអាជ្ញាធរផ្សេងទៀត ដោយបានអន្តរាគមន៍ដោយផ្ទាល់ ឬប្រយោល ត្រូវផ្ដន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់៥លានរៀលទៅ៥០លានរៀល៕
