ក្រសួងពាណិជ្ជកម្មបានស្នើឱ្យអភិបាលរាជធានីខេត្តជួយអន្តរាគមន៍ចំពោះដេប៉ូស្ថានីយ៍ប្រេងឥន្ធនៈឯកជនមួយចំនួន ដែលលក់រាយខុសពីការកំណត់របស់ក្រសួង ឬផ្អាកលក់ដោយសារតែតម្លៃប្រេងឥន្ធនៈនៅលើទីផ្សារអន្តរជាតិមានការប្រែប្រួលខ្លាំង។
ការស្នើសុំនេះ បានធ្វើឡើងបន្ទាប់ពីមានដេប៉ូស្ថានីយ៍ប្រេងឥន្ធនៈមួយចំនួនបានផ្អាកការលក់រាយរបស់ខ្លួន និងមួយចំនួនបានលក់ឡើងថ្លៃមុនកាលកំណត់ ដោយសារតែតម្លៃប្រេងឥន្ធនៈនៅលើទីផ្សារអន្តរជាតិបានហក់ឡើងថ្លៃមួយគុណជាបី (50$/Barrel, 180.93$/Barrel) ចាប់តាំងពីដើមខែកុម្ភៈ ឆ្នាំ២០២២មក។ ការហក់ឡើងថ្លៃ ដោយសារតែប្រទេសនៅលើពិភពលោកបានបើកប្រទេសឡើងវិញ ក្រោយវិបត្តិនៃជំងឺកូវីដ-១៩ និងសង្គ្រាមរវាងរុស្ស៊ីនិងអ៊ុយក្រែន។
ក្នុងន័យនេះ ក្រសួងពាណិជ្ជកម្មបានស្នើឱ្យអភិបាលរាជធានីខេត្ត ចាត់តាំងមន្ត្រីថ្នាក់ស្រុក ឬ ថ្នាក់មូលដ្ឋានចូលរួមពិនិត្យ និងជួយជំរុញឱ្យដេប៉ូស្ថានីយ៍ប្រេងឥន្ធនៈឯកជនទាំងនោះ អនុវត្តតាមគោលការណ៍ច្បាប់ ឬសហការផ្តល់ព័ត៌មានមកមន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំរាជធានី ខេត្ត មន្ទីរពាណិជ្ជកម្មរាជធានី ខេត្ត និងមន្ត្រីពាក់ព័ន្ធ។
ក្រៅពីនេះ ក្រសួងពាណិជ្ជកម្មកំពុងស្នើសុំគោលការណ៍ទៅក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងថាមពល ដើម្បីស្នើសុំប្តូរការកំណត់រយៈពេលនៃការចេញថ្លៃលក់រាយជូនក្រុមហ៊ុនប្រេងឥន្ធនៈក្នុងរយៈពេល ១៥ថ្ងៃម្តង មកជារយៈពេល ១០ ថ្ងៃម្តងវិញ និងស្នើសុំឱ្យមានការអនុវត្តការផ្លាស់ប្តូរការកំណត់តម្លៃនេះ ឱ្យបានលឿនស្របតាមសភាពការណ៍ទីផ្សារអន្តរជាតិ។
គួរជម្រាបជូនថា ចាប់ពីថ្ងៃទី១៦ ខែមីនាមក តម្លៃប្រេងឥន្ធនៈធម្មតា និងប្រេងម៉ាសូត បានបន្តហក់ឡើងដល់៥៣០០រៀល ក្នុងមួយលីត្រ និងតម្លៃប្រេងឥន្ធនៈស៊ូពែហក់ឡើងដល់៥៨៥០រៀល ក្នុងមួយលីត្រ៕