សមត្ថកិច្ច និងកងកម្លាំងសណ្តាប់ធ្នាប់រាជធានីភ្នំពេញ បន្តចាប់ក្រុមកូដករណាហ្គាវើលដ៍ជាថ្មីទៀត ខណៈពួកគេចេញធ្វើកូដកម្មទាមទារឱ្យថៅកែក្រុមគោរពច្បាប់ការងារ និងទាមទាររកដំណោះស្រាយបញ្ចប់វិវាទឱ្យបានឆាប់។
កូដករក្រុមហ៊ុនណាហ្គាវើលដ៍ កញ្ញា សៀក បញ្ញា ប្រាប់វីអូឌីនៅថ្ងៃអាទិត្យទី២០ ខែមីនានេះថា នៅម៉ោងជាង២រសៀល សមត្ថកិច្ច និងកងកម្លាំងសណ្តាប់ធ្នាប់ បានចាប់ពួកគាត់រាប់សិបនាក់ដាក់រថយន្តក្រុង ទៅរក្សាទុកនៅមណ្ឌលព្យាបាលអ្នកជំងឺកូវីដ-១៩ ក្នុងខណ្ឌព្រែកព្នៅ។ ការចាប់កូដករនេះ កញ្ញាថា នៅពេលពួកគេបន្តចេញធ្វើកូដកម្មជាថ្មីទៀត ដើម្បីទាមទារឱ្យក្រុមហ៊ុនគោរពលក្ខខណ្ឌការងារ ទាមទារឱ្យតុលាការទម្លាក់បទចោទលើសហជីព សមាជិកសហជីព និងកូដករសរុប១៥នាក់ ទើបពួកគេចូលតុចរចារកដំណោះស្រាយបញ្ចប់វិវាទការងារជាមួយក្រុមហ៊ុន។
កញ្ញាព្រមានថា បើសិនជាក្រុមហ៊ុន និងអាជ្ញាធរពាក់ព័ន្ធមិនធ្វើតាមការស្នើសុំរបស់ពួកគាត់ទេ នោះក្រុមកូដករ នៅតែបន្តតវ៉ារហូតមានដំណោះស្រាយ ។
កញ្ញាព្រមានដូចនេះថា៖ «ពួកខ្ញុំតវ៉ាទាមទារឱ្យថៅកែក្រុមហ៊ុនណាហ្គាវើលដ៍ចេញមកដោះស្រាយ និងទម្លាក់បទចោទទាំងអស់ទៅលើតំណាងពួកខ្ញុំទាំង១៥នាក់ និងចូលតុចរចារដោយភាពស្មោះត្រង់ ដោយឆន្ទៈ មិនមែនគាត់សង្ងំនៅស្ងៀម គាត់អត់មានដំណោះស្រាយឱ្យខ្ញុំចឹងទេ។ បើអត់ដោះស្រាយទេ ពួកខ្ញុំនៅតែតវ៉ារាល់ថ្ងៃ រហូតមានដំណោះស្រាយ»។
វីអូឌី មិនអាចសុំការបំភ្លឺពីអ្នកនាំពាក្យក្រសួងការងារ លោក ហេង សួរ និងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា បានទេនៅរសៀលថ្ងៃអាទិត្យនេះ ។
វិវាទការងារនៅក្រុមហ៊ុនល្បែងដ៏ធំនៅចំកណ្ដាលរាជធានីភ្នំពេញនេះ បានអូសបន្លាយរយៈពេលជិត១ឆ្នាំមកហើយ។ ការអូសបន្លាយនេះ ឈានទៅដល់ការចាប់ខ្លួនថ្នាក់ដឹកនាំនិងសកម្មជនសហជីព ១១នាក់ដាក់ពន្ធនាគារជាបន្តបន្ទាប់ចាប់តាំងពីយប់ឆ្លងឆ្នាំសកលមកដោយចោទពីបទញុះញង់ និងល្មើសច្បាប់កូវីដ-១៩ ដោយគ្រាន់តែពួកគេប្រើប្រាស់សិទ្ធិស្របច្បាប់ ធ្វើកូដកម្មអហិង្សាទាមទារឱ្យក្រុមហ៊ុនណាហ្គាវើលដ៍គោរពសិទ្ធិកម្មករនិងសហជីព។
ក្រោយមក កាលពីពេលថ្មីៗនេះ តុលាការសម្រេចដោះលែងថ្នាក់ដឹកនាំនិងសកម្មជនសហជីព ១១នាក់ ជាបណ្តោះអាសន្ន ដើម្បីឱ្យពួកគេមានសេរីភាពវិញ ដើម្បីចូលរួមតុចរចាបញ្ចប់វិវាទជាមួយក្រុមហ៊ុន។ ប៉ុន្តែដោយសារតែមិនទាន់ទម្លាក់បទចោទលើអ្នកទាំង១១នាក់នោះ ក្រុមកូដករនៅតែបន្តតវ៉ាជាថ្មីទៀត ដើម្បីទាមទារទម្លាក់ចោលបទចោទ ប៉ុន្តែរហូតមកដល់ថ្ងៃអាទិត្យទី២០ ខែមីនានេះ នៅមិនទាន់មានសេចក្តីសម្រេចតាមការទាមទាររបស់ពួកគេនៅឡើយ ។
រដ្ឋមន្ត្រីក្រសួងមហាផ្ទៃ លោក ស ខេង ធ្លាប់អះអាងថា លោកក៏បានជំរុញទៅភាគីពាក់ព័ន្ធម្តងជាពីរដង ឱ្យពន្លឿនការដោះស្រាយវិវាទក្រុមហ៊ុនល្បែងមួយនេះឱ្យបានឆាប់តាមដែលអាចធ្វើទៅបាន ប៉ុន្តែវិវាទនៅតែបន្តអូសបន្លាយ។
កាលពីថ្ងៃទី៧ ខែមីនា ឆ្នាំ២០២២ ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា បានជំរុញទៅអាជ្ញាធរកម្ពុជា ត្រូវចូលរួមពិភាក្សាដោះស្រាយតាមការទាមទាររបស់កូដករណាហ្គាវើលដ៍តាមផ្លូវច្បាប់ និងបញ្ឈប់ការរារាំង ធ្វើទុក្ខបុកម្នេញកូដករដែលធ្វើកូដកម្មដោយសន្តិវិធី ក្រោមហេតុផលទប់ស្កាត់កូវីដ-១៩បន្តទៀត៕
