លោកនាយករដ្ឋមន្ត្រី ហ៊ុន សែន អះអាងថា កម្ពុជាមិនលើកទឹកចិត្តឱ្យមានការជម្លៀសប្រជាពលរដ្ឋខ្មែរចំនួន២៣គ្រួសារចេញពីប្រទេសអ៊ុយក្រែនឡើយ ខណៈប្រទេសនេះកំពុងមានសង្គ្រាម ដោយត្រូវរួមសុខទុក្ខជាមួយគ្នា ដូចពលរដ្ឋអ៊ុយក្រែនដែលកំពុងរស់នៅក្នុងប្រទេសរបស់គេបច្ចុប្បន្នដែរ។
ការអះអាងនេះ ក្រោយពេលប្រទេសអ៊ុយក្រែនបានធ្លាក់ចូលក្នុងសង្គ្រាមឈ្លានពានពីសំណាក់ប្រទេសរុស្ស៊ី រយៈពេលជិត១ខែមកហើយ ពោលគឺគិតចាប់ពីថ្ងៃទី២៤ ខែកុម្ភៈមក ខណៈរដ្ឋាភិបាលកម្ពុជាធ្លាប់បញ្ជាក់ថា មានពលរដ្ឋនិងអតីតនិស្សិតខ្មែរចំនួន២៣គ្រួសារកំពុងរស់នៅក្នុងប្រទេសមួយនេះ។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវមន្ទីរពេទ្យមិត្តភាពកម្ពុជា-ចិន ព្រះកុសុមៈ ឬពេទ្យលោកសង្ឃ នាព្រឹកថ្ងៃចន្ទនេះ លោក ហ៊ុន សែន មានប្រសាសន៍ថា មិនមានបញ្ជាណាមួយឱ្យពលរដ្ឋទាំង២៣គ្រួសារដែលកំពុងរស់នៅអ៊ុយក្រែនរត់ចោលប្រជាជនអ៊ុយក្រែនឡើយ។ លោកបន្តថា ពលរដ្ឋខ្មែរទាំងនោះត្រូវបន្តរស់នៅក្នុងប្រទេសអ៊ុយក្រែន។
លោក ហ៊ុន សែន បន្តថា៖ «ប្រជាជនអ៊ុយក្រែនគាត់រស់នៅយ៉ាងម៉េចបាន យើងរស់នៅជាមួយពួកគាត់ទៅ កុំរត់ចោលគ្នា»។
លោកនាយករដ្ឋមន្ត្រីបានលើកឡើងថា ក្នុងអំឡុងឆ្នាំ២០១៣ ប្រទេសកូរ៉េខាងជើងគំរាមធ្វើសង្គ្រាមដាក់កូរ៉េខាងត្បូង ពេលនោះមានប្រទេសមិនតិចទេដែលលើកឡើងអំពីបញ្ហាត្រូវជម្លៀសពលករគេចេញពីកូរ៉េខាងត្បូង តែកម្ពុជាមិនបានជម្លៀសពលរដ្ឋរបស់ខ្លួនឡើយ។
លោកបានឆ្លើយតបថា ពេលនោះ កម្ពុជាមិនមែនមិនយកចិត្តទុកដាក់ចំពោះប្រជាពលរដ្ឋរបស់ខ្លួនទេ ប៉ុន្តែទីមួយគឺសមត្ថភាពនៃការដឹកជញ្ជូន ព្រោះពលរដ្ឋខ្មែរដែលកំពុងធ្វើការនិងរស់នៅប្រទេសកូរ៉េខាងត្បូងមានជាង៥ម៉ឺននាក់ ព្រមទាំងបញ្ហារួមសុខរួមទុក្ខជាមួយគ្នាផងដែរ។
ទន្ទឹមនឹងនេះ កាលពីពេលប្រទេសចិនផ្ទុះជំងឺកូវីដ-១៩ដំបូង កាលពីចុងឆ្នាំ២០១៩ លោកក៏មិនបានជម្លៀសនិស្សិតខ្មែរចេញពីប្រទេសចិនមកនោះដែរ។
ផ្ទុយទៅវិញ លោក ហ៊ុន សែន ថែមទាំងបាននាំកូនប្រុសច្បងរបស់លោក និងប្រតិភូរដ្ឋាភិបាលផ្សេងទៀតទៅទីក្រុងប៉េកាំង ប្រទេសចិន ដើម្បីជួបជាមួយថ្នាក់ដឹកនាំចិន ដើម្បីបង្ហាញអំពីសាមគ្គីភាពក្នុងការប្រយុទ្ធជាមួយកូវីដ-១៩ ទៀតផង។
លោក ហ៊ុន សែន បានលើកឡើងថា៖ «ផ្ទុយទៅវិញ ខ្ញុំធ្វើដំណើរទៅកាន់ប្រទេសចិន ទៅប៉េកាំង ដើម្បីជួបប្រធានាធិបតី ស៊ី ជីនពីង ជួបនាយករដ្ឋមន្ត្រី លី ខឺឈាង នៅទីនោះ ដើម្បីបង្ហាញអំពីសាមគ្គីភាពក្នុងការប្រយុទ្ធជាមួយកូវីដ-១៩ ហើយក៏ជំរុញឱ្យនិស្សិតខ្មែរដែលកំពុងសិក្សានៅទីនោះ បន្ដរួមរស់នៅជាមួយប្រជាជនចិន និស្សិតចិនតទៅទៀត»។
កន្លងមក មន្ត្រីជាន់ខ្ពស់ក្រសួងការបរទេសកម្ពុជាបានអះអាងថា ពលរដ្ឋនិងអតីតនិស្សិតខ្មែរ២៣គ្រួសារដែលកំពុងស្ថិតនៅក្នុងប្រទេសអ៊ុយក្រែននោះ ពួកគេមានសុវត្ថិភាពជាធម្មតា ហើយមន្ត្រីទូតខ្មែរប្រចាំនៅប្រទេសរុស្ស៊ី ក៏បានទាក់ទងពួកគេជាប្រចាំផងដែរ៕
