ប្រសិតពិសេសរបស់ប្រធានអាស៊ាន និងជារដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានដឹកនាំប្រតិភូរបស់ខ្លួនចាកចេញពីកម្ពុជា ទៅធ្វើទស្សនកិច្ចការងារលើកដំបូងនៅប្រទេសមីយ៉ាន់ម៉ា ដើម្បីលើកទឹកចិត្តឱ្យមានការពិគ្រោះយោបល់លើកិច្ចនយោបាយនិងមនុស្សធម៌ ខណៈប្រទេសនេះកំពុងមានវិបត្តិផ្ទៃក្នុងធ្ងន់ធ្ងរ។
សេចក្ដីប្រកាសព័ត៌មានរបស់ក្រសួងការបរទេសកម្ពុជាបានឱ្យដឹងថា ទស្សនកិច្ចនេះមានរយៈពេល៣ថ្ងៃ គិតចាប់ពីថ្ងៃទី២១ ដល់ថ្ងៃទី២៣ ខែមីនា ឆ្នាំ២០២២ ដោយធ្វើឡើងតបតាមការអញ្ជើញរបស់ក្រុមប្រឹក្សារដ្ឋបាលនៃសាធារណរដ្ឋសហភាពមីយ៉ាន់ម៉ា និងមានការយល់ព្រមពីមេដឹកនាំប្រទេសនេះ គឺលោក មីន អ៊ុងឡាំង ផងដែរ។
លើសពីនេះទៅទៀត គោលបំណងនៃដំណើរទស្សនកិច្ចលើកដំបូងនៃប្រេសិតពិសេសនេះ គឺដើម្បីបង្កើតលក្ខខណ្ឌអំណោយផលដែលឈានទៅដល់ការបញ្ចប់អំពើហិង្សា ការចែកចាយជំនួយមនុស្សធម៌ ដោយមានការគាំទ្រនិងសម្របសម្រួលពីលេខាធិការដ្ឋានអាស៊ាន និងមជ្ឈមណ្ឌលសម្របសម្រួលអាស៊ាន ដើម្បីជំនួយមនុស្សធម៌ ជាដើម។
វិបត្តិផ្ទៃក្នុងមីយ៉ាន់ម៉ា ឬភូមា បានកើតឡើងកាលពីដើមឆ្នាំ២០២០ ក្រោយមេដឹកនាំយោធា លោក មីន អ៊ុងឡាំង បានធ្វើរដ្ឋប្រហារ និងចាប់ខ្លួនលោកស្រី អ៊ុងសាន សូជី ដែលឈ្នះការបោះឆ្នោត និងជាតំណាងឱ្យអ្នកប្រជាធិបតេយ្យនៅប្រទេសនេះ។ វិបត្តិនយោបាយក្នុងប្រទេសនេះបានបង្កទៅជាសង្គ្រាមផ្ទៃក្នុងអូសបន្លាយជាង១ឆ្នាំមកហើយ ថែមទាំងបានសម្លាប់ពលរដ្ឋស៊ីវិលរាប់ពាន់នាក់ថែមទៀតផង។
យ៉ាងណា ក្នុងសេចក្ដីថ្លែងការណ៍រួមរបស់កម្ពុជា-ជប៉ុន កាលពីម្សិលមិញ បានជំរុញឱ្យមេដឹកនាំរបបយោធាមីយ៉ាន់ម៉ាត្រូវអនុវត្តកិច្ចព្រមព្រៀងជាឯកច្ឆន្ទចំនួន៥ចំណុចរបស់អាស៊ានឱ្យបានឆាប់រហ័ស និងជួយសម្រួលដល់ការចែកចាយជំនួយមនុស្សធម៌ដល់ប្រជាជនមីយ៉ាម៉ា។
កិច្ចព្រមព្រៀងឯកច្ឆន្ទ៥ចំណុចស្ដីពីដំណោះស្រាយសម្រាប់មីយ៉ាន់ម៉ា ត្រូវបានដាក់ចេញដោយកិច្ចប្រជុំកំពូលអាស៊ាន កាលពីខែមេសា ឆ្នាំ២០២១ រួមមាន តម្រូវឱ្យរបបយោធាភូមាបញ្ឈប់ជាបន្ទាន់នូវអំពើហិង្សា។ បន្ថែមពីនេះ ការចាប់ផ្ដើមការសន្ទនាប្រកបដោយការស្ថាបនា ក្នុងចំណោមភាគីពាក់ព័ន្ធទាំងអស់ ដើម្បីស្វែងរកដំណោះស្រាយដោយសន្តិវិធី ដើម្បីផលប្រយោជន៍របស់ប្រជាជន។
ដោយឡែក ចំណុចទី៣ ប្រេសិតពិសេសរបស់ប្រធានអាស៊ាន នឹងសម្រួលដល់ការសម្រុះសម្រួលនៃដំណើរការរៀបចំកិច្ចសន្ទនា ដោយមានជំនួយពីអគ្គលេខាធិការអាស៊ាន ហើយអាស៊ានត្រូវផ្ដល់ជំនួយមនុស្សធម៌តាមរយៈមជ្ឈមណ្ឌលអាហារ។ ជាងនេះទៀត ប្រេសិតពិសេស និងគណៈប្រតិភូ នឹងធ្វើទស្សនកិច្ចនៅមីយ៉ាន់ម៉ា ដើម្បីជួបជាមួយភាគីពាក់ព័ន្ធទាំងអស់ផងដែរ៕
