អ្នកភូមិអះអាងថា ពួកគាត់ជិត១០០នាក់ តំណាងឱ្យពលរដ្ឋ៨៨គ្រួសារ រស់នៅជាប់បឹងតាមោក ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ បានប្រមូលផ្ដុំគ្នាតវ៉ាមុខសាលាខណ្ឌ ដើម្បីទាមទារឱ្យអាជ្ញាធរដោះស្រាយសំណងផលប៉ះពាល់ដីធ្លី។
លោក ជ័រ សារិន ដែលអះអាងថាជាតំណាងប្រជាពលរដ្ឋ ប្រាប់វីអូឌីថា អ្នកភូមិប្រហែល៨០នាក់សម្រេចទៅតវ៉ានៅមុខសាលាខណ្ឌព្រែកព្នៅនេះ ដោយសារអាជ្ញាធរនៅសង្កាត់បដិសេធមិនដោះស្រាយដីធ្លីជូនពួកគាត់ ខណៈដីដែលកំពុងមានជម្លោះដីនោះត្រូវបានក្រុមហ៊ុនពុះជាឡូត៍ និងកំពុងផ្សព្វផ្សាយលក់។
តំណាងពលរដ្ឋរូបនេះអះអាងថា ដី៧៩ហិកតារបស់អ្នកភូមិ៨៨គ្រួសារ ដែលនៅជាប់បឹងកប់ស្រូវ ឬបឹងតាមោក ស្ថិតក្នុងភូមិកប់ស្រូវ សង្កាត់គោករកា ត្រូវបានក្រុមហ៊ុនឯកជនមួយមិនស្គាល់ឈ្មោះ បានធ្វើសកម្មភាពដឹកដីចាក់លុបយកធ្វើកម្មសិទ្ធិតាំងពីចុងឆ្នាំ២០២១ ដោយមិនបានដោះស្រាយផលប៉ះពាល់ឡើយ ខណៈអ្នកភូមិបានចូលទៅអាស្រ័យផលតាំងពីឆ្នាំ១៩៧៩ រហូតមកដល់បច្ចុប្បន្ន។
លោកបន្ថែមថា៖ «ចូលមកឆ្នាំ១៩៨២ និង១៩៨៣ហ្នឹង យើងបានចូលបង្កបង្កើនផល ដោយធ្វើស្រែប្រាំង ដាំឈូក និងបន្លែបង្ការផ្សេងៗហ្នឹង។ ប៉ុន្តែមកដល់ឆ្នាំ២០២១ និង២០២២ហ្នឹង ស្រាប់តែឃើញគេមកចាក់ដីលុប លុបទាំងដីខ្ញុំកំពុងដាំឈូកទៀត។ អ៊ីចឹងសំណង គឺខ្ញុំទាមទារជាគោលនយោបាយឱ្យពួកខ្ញុំបានរស់ផង ព្រោះខ្ញុំអស់កន្លែងបង្កបង្កើនផលទៀតហើយហ្នឹង»។
ពលរដ្ឋម្នាក់ទៀត អ្នកស្រី ម៉ោង ស្រីណាក់ អះអាងថា គ្រួសារអ្នកស្រីបានអាស្រ័យផលលើដីទំហំទទឹង៥០ម៉ែត្រ និងបណ្ដោយជាង១០០ម៉ែត្រ ដោយធ្វើស្រែប្រាំង ដាំឈូក និងដាំបន្លែផ្សេងៗជាបន្តបន្ទាប់តាំងពីឆ្នាំ១៩៨៥ រហូតដល់ឆ្នាំ២០២១ ទើបមានក្រុមហ៊ុនឯកជនមួយចាក់លុប ហើយនៅឆ្នាំ២០២២នេះ ក្រុមហ៊ុននោះបានពុះជាឡូត៍សម្រាប់ដាក់លក់។
អ្នកស្រីបានបង្ហាញការខកចិត្តចំពោះអាជ្ញាធរដែលមិនដោះស្រាយសំណងផលប៉ះពាល់ជូនពួកគាត់ ខណៈក្រុមហ៊ុនមកក្រោយមានសិទ្ធិទិញលក់លើដីនោះ។
អ្នកស្រីបន្ថែមថា៖ «បើសិនជារដ្ឋគាត់យក គាត់ចេញថ្លៃអាស្រ័យផលយើងតិចតួច ហើយគាត់ទៅកន្លែងអីមួយជារបស់រដ្ឋ អាហ្នឹងយើងក៏មិនអន់ចិត្ត មិនតូចចិត្តដែរ។ តែនេះ គេយកមកពុះដីឡូត៍លក់ ធ្វើផ្ទះល្វែងលក់ ហើយអត់បានដោះស្រាយសំណងអីឱ្យផង ចុះដីដែលយើងខំអាស្រ័យជាង៣០ឆ្នាំ គ្មានប្រយោជន៍ទេ! អ៊ីចឹងហេតុអីបានជាក្រុមហ៊ុនមានសិទ្ធិកាន់កាប់ ហើយយើងគ្មានសិទ្ធិ»។
វីអូឌី មិនអាចសុំការឆ្លើយតបពីអភិបាលខណ្ឌព្រែកព្នៅ លោក សុខ សម្បត្តិ បានទេ ពាក់ព័ន្ធករណីនេះ។
ប៉ុន្តែបើតាមចៅសង្កាត់គោករកា លោក សន ស៊ីន ប្រាប់ វីអូឌី កាលពីថ្ងៃទី២៥ ខែកុម្ភៈថា ដីដែលកំពុងរងការចាក់លុបនោះជាដីរបស់រដ្ឋ ដែលរដ្ឋាភិបាលបានចេញអនុក្រឹត្យផ្ដល់ជូនទៅក្រសួងមួយចំនួន ដើម្បីសាងសង់និងអភិវឌ្ឍហេដ្ឋារចនាសម្ព័ន្ធផ្សេងៗ។
ប្រធានកម្មវិធីនៃអង្គការសមាគមធាងត្នោត លោក ឯម ខេមរា បានស្នើដល់អាជ្ញាធរពាក់ព័ន្ធពិចារណាដោះស្រាយជូនពលរដ្ឋ ដើម្បីធានាពីសិទ្ធិទទួលបានជីវភាពសមរម្យដែលមានចែងក្នុងច្បាប់ជាតិនិងអន្តរជាតិ ជាពិសេសច្បាប់រដ្ឋធម្មនុញ្ញ ខណៈរដ្ឋាភិបាលបានកាត់ដីតំបន់បឹងតាមោកអស់រាប់ពាន់ហិកតាឱ្យអ្នកមានលុយមានអំណាច និងក្រុមហ៊ុនឯកជន។
មន្ត្រីសង្គមស៊ីវិលរូបនេះបន្តថា ប្រសិនបើពុំមានការដោះស្រាយសមស្របណាមួយជូនពលរដ្ឋទេ នឹងអាចកើតមានសកម្មភាពតវ៉ាផ្សេងៗ និងប៉ះពាល់ដល់ជីវភាពរស់នៅរបស់ប្រជាពលរដ្ឋទាំងនោះផងដែរ។
លោកបន្ថែមថា៖ «រដ្ឋាភិបាលបានកាត់ដីជូនក្រុមហ៊ុនឯកជន និងបុគ្គលឯកជនហ្នឹង គឺរដ្ឋកាត់បាន។ ចុះហេតុអីបានឯកជនទាំងហ្នឹងមានសិទ្ធិទទួលបានដីសាធារណៈរបស់រដ្ឋ? ចុះហេតុអីបានប្រជាពលរដ្ឋអត់មានសិទ្ធិប្រកបមុខរបរ ឬក៏ទទួលផលពីដីកន្លែង ដើម្បីចិញ្ចឹមរបស់ពួកគាត់ពីផ្ទៃបឹងតាមោកនេះបាន?»
បឹងតាមោក ឬបឹងកប់ស្រូវ មានផ្ទៃដីសរុប៣ ២៣៩ហិកតា ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះត្រូវបានរដ្ឋាភិបាលចេញអនុក្រឹត្យមួយកាលពីដើមខែកុម្ភៈ ឆ្នាំ២០១៦ ដោយកំណត់បឹងធម្មជាតិមួយនេះជាសម្បតិ្តសាធារណៈរបស់រដ្ឋ។
បើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែធ្នូ ឆ្នាំ២០២១ ផ្ទៃបឹងតាមោកសរុបជាង២ ០០០ហិកតា ហើយត្រូវបានរដ្ឋាភិបាលកាត់ឬដោះដូរទៅឱ្យស្ថាប័នរដ្ឋ ក្រុមហ៊ុនឯកជន និងបុគ្គលឯកជនមួយចំនួន ដែលគេដឹងថា ជាអ្នកមានប្រាក់និងមានអំណាច សម្រាប់សាងសង់អគារ និងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន៕