តុលាការ​ច្រាន​ចោល​សំណើ​របស់​លោក កឹម សុខា​ សុំ​ទៅ​ប្រជុំ​នៅ​ប្រទេស​អាល្លឺម៉ង់​

លោក កឹម សុខា ធ្វើដំណើរត្រលប់ទៅគេហដ្ឋានវិញ ក្រោយចេញពីសវនាការនៅសាលាដំបូងរាជធានីភ្នំពេញ ថ្ងៃទី១៩ ខែមករា ឆ្នាំ២០២២។ (គួយ ឡង់ឌី)

ចៅក្រម​សាលាដំបូង​រាជធានី​ភ្នំពេញ បាន​ច្រានចោល​សំណើ​របស់​លោក កឹម សុខា ដែល​ស្នើសុំ​ទៅ​ចូលរួម​កិច្ចប្រជុំ​នៅ​ប្រទេស​អាល្លឺម៉ង់​ចាប់ពី​ថ្ងៃទី២៨-២៩ ខែមីនា ខាង​មុខ​នេះ ដោយឱ្យចូលរួមតាម Online វិញ។

មេធាវីការពារក្តីឱ្យលោក កឹម សុខា គឺលោក ចាន់ ចេន បានប្រាប់អ្នកកាសែតនៅក្រោយសវនាការនៅថ្ងៃពុធនេះថា លោក សោកស្តាយចំពោះ​សេចក្តី​សម្រេចរបស់ចៅក្រមសាលាដំបូងរាជធានីភ្នំពេញ ដោយចាត់ទុកថា ធ្វើឱ្យខាតបង់ប្រយោជន៍សម្រាប់ពិភពលោក និងសម្រាប់កម្ពុជាផងដែរ។

បើតាមការបញ្ជាក់ពីលោកមេធាវី ចាន់ ចេន ឱ្យដឹងថា លោក កឹម សុខា ត្រូវបានអង្គការ Global Solutions Summit អញ្ជើញឱ្យទៅធ្វើជាវាគ្មិន​នៅក្នុងកិច្ចប្រជុំមួយដែលមានការចូលរួមពីប្រទេសដែលមានសេដ្ឋកិច្ចរីកចំរើន G7 និង G20 ដែលមានកិច្ចពិភាក្សាមួយ ស្តីពី ការប្រឈមនានាជាសកល។

គួជំរាបជូនថា នៅថ្ងៃទី២៣ ខែមីនានេះ គឺជាសវនាការជុំទី៣៤ហើយ ដែលសាលាដំបូងរាជធានីភ្នំពេញបានបើកសវនាការលើសំណុំរឿងលោក កឹម សុខា។ ក៏ប៉ុន្តែមេធាវីលោក កឹម សុខា គឺលោក ចាន់ ចេន បានឱ្យដឹងថា គិតមកទល់នឹងពេលនេះ តុលាការមិនមានភស្តុតាងដើម្បីដាក់បន្ទុកលើលោក កឹម សុខា នៅឡើយទេ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ