ប្រភពស្និទ្ធស្នាលនឹងប្រធានាធិបតីរុស្ស៊ី លោក វ្លាឌីមៀរ ពូទីន មួយរូប បានឱ្យដឹងនៅថ្ងៃពុធនេះថា សហរដ្ឋអាមេរិកមានគោលបំណងបំបាក់មុខមាត់ បែងចែក និងបំផ្លាញប្រទេសរុស្ស៊ី។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទោះជាយ៉ាងណា ប្រភពខាងលើនេះបានប្ដេជ្ញាថា ប្រទេសរបស់ខ្លួននឹងមិនអនុញ្ញាតឱ្យមានករណីនេះកើតឡើងនោះទេ។
លោក Dmitry Medvedev ដែលធ្លាប់ទទួលបានតំណែងជាប្រធានាធិបតីចាប់ពីឆ្នាំ២០០៨ ដល់ឆ្នាំ២០១២ និងបច្ចុប្បន្ន ជាអនុលេខាធិការនៃក្រុមប្រឹក្សាសន្តិសុខរបស់ប្រទេសរុស្ស៊ី បានបញ្ជាក់ឱ្យដឹងផងដែរថា ការសម្រេចបាននូវគោលបំណងរបស់អាមេរិកយ៉ាងដូច្នេះ អាចនឹងមានលទ្ធផលមហន្តរាយសម្រាប់ពិភពលោកទាំងមូល។
លោកបានបន្តឱ្យដឹងនៅក្នុងសារដែលត្រូវបានបង្ហោះនៅលើប្រព័ន្ធតេឡេក្រាមថា៖ «ប្រទេសរុស្ស៊ី នឹងមិនអនុញ្ញាតឱ្យមានការវិវត្តបែបនេះកើតឡើងជាដាច់ខាត»។
គិតរហូតមកដល់ពេលនេះ ការឈ្លានពានរបស់រុស្ស៊ីលើអ៊ុយក្រែនបានឈានចូលមកដល់សប្ដាហ៍ទី៤ហើយ ដែលបានបង្កឱ្យជនស៊ីវិលរាប់រយនាក់បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរមួយ ហើយមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថា សកម្មភាពរបស់ខ្លួននេះ គឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះត្រូវបានប្រទេសលោកខាងលិចចាត់ទុកថា ជាការលើកឡើងដោយគ្មានមូលដ្ឋានច្បាស់លាស់៕
