ចៅក្រមសាលាដំបូងរាជធានីភ្នំពេញ បានបដិសេធសំណើរបស់ប្រធានគណបក្សសង្រ្គោះជាតិដែលត្រូវបានតុលាការកំពូលរំលាយ ដែលស្នើសុំទៅចូលរួមកិច្ចប្រជុំកម្រិតពិភពលោក ដែលរៀបចំឡើងនៅក្នុងប្រទេសអាល្លឺម៉ង់ នៅដំណាច់ខែមីនាខាងមុខនេះ។
លោកមេធាវី ចាន់ ចេន សហមេធាវីការពារក្ដីរបស់លោក កឹម សុខា បានថ្លែងនៅមុខសាលាដំបូងរាជធានីភ្នំពេញ ក្រោយបញ្ចប់សវនាការនៅព្រឹកថ្ងៃពុធនេះថា ក្រុមមេធាវីបានដាក់លិខិតទៅចៅក្រមស៊ើបសួរនៃសាលាដំបូងរាជធានីភ្នំពេញ កាលពីថ្ងៃទី២១ ខែមីនា ក្រោយពីអង្គការ Global Solutions Summit បានស្នើសុំលោក កឹម សុខា តាមរយៈក្រសួងការបរទេសកម្ពុជា កាលពីថ្ងៃទី២២ ខែកុម្ភៈ ធ្វើជាវាគ្មិនស្ដីពីដំណោះស្រាយសកល និងការប្រឈមនយោបាយសកល រួមទាំងបញ្ហាសិទ្ធិ និងសេដ្ឋកិច្ច។
លោកបន្តថា ជាការឆ្លើយតប មួយថ្ងៃបន្ទាប់ពីទទួលបានលិខិតអញ្ជើញពីអង្គការ Global Solutions Summit ក្រសួងការបរទេសកម្ពុជាបានបញ្ជូនបញ្ហារបស់លោក កឹម សុខា ទៅឱ្យតុលាការជាអ្នកទទួលខុសត្រូវវិញ ដោយសារលោក កឹម សុខា នៅជាប់បម្រាមរបស់តុលាការ ដែលមិនអាចចេញទៅក្រៅប្រទេសបាន។
ប៉ុន្តែលោកថា ក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ បានសម្រេចនៅព្រឹកថ្ងៃទី២៣ ខែមីនានេះ ដោយមិនអនុញ្ញាតឱ្យលោក កឹម សុខា ទៅចូលរួមកិច្ចប្រជុំនេះនៅប្រទេសអាល្លឺម៉ង់ដោយផ្ទាល់ទេ ប៉ុន្តែតុលាការបើកផ្លូវឱ្យលោក កឹម សុខា អាចចូលរួមកិច្ចប្រជុំកម្រិតពិភពលោកនេះតាមប្រព័ន្ធអនឡាញ (Online) បាន។
លោកមេធាវី ចាន់ ចេន បានចាត់ទុកសេចក្ដីសម្រេចរបស់ក្រុមប្រឹក្សាជំនុំជម្រះនេះ ថាមិនបានផ្ដល់ផលចំណេញអ្វីសម្រាប់ពិភពលោក និងកម្ពុជានោះទេ។ ផ្ទុយទៅវិញ លោកថា ការបិទផ្លូវលោក កឹម សុខា មិនឱ្យទៅចូលរួមក្នុងកិច្ចប្រជុំស្ដីពីដំណោះស្រាយសកល ជាមួយប្រទេសដែលមានសេដ្ឋកិច្ចរីកចម្រើន G7 និង G20 នេះ ជាការខាតបង់ផលប្រយោជន៍ធំសម្រាប់កម្ពុជា។
លោកថា៖ «យើងមិនយល់ស្របតាមទេ ប៉ុន្តែយើងគោរពទៅតាមសេចក្ដីសម្រេចតុលាការ ទី១។ ហើយទី២ទៀត ពិតជាមានការសោកស្ដាយ ពីព្រោះបើសិនជាមានវត្តមានឯកឧត្ដម កឹម សុខា ទៅប្រជុំផ្ទាល់នៅទីក្រុងប៊ែរឡាំង ផលប្រយោជន៍នឹងមក ទី១ បានទៅដល់ពិភពលោក ហើយទី២ទៀត ផលប្រយោជន៍ក៏បានមកកម្ពុជាយើងដែរ»។
កិច្ចប្រជុំស្ដីពីដំណោះស្រាយសកលដែលរៀបចំឡើងនៅទីក្រុងប៊ែរឡាំង ប្រទេសអាល្លឺម៉ង់នេះ នឹងប្រព្រឹត្តទៅរយៈពេល២ថ្ងៃ ចាប់ពីថ្ងៃទី២៨ ដល់ថ្ងៃទី២៩ ខែមីនា។
នៅចំពោះមុខនេះ លោកមេធាវី ចាន់ ចេន នៅមិនទាន់ដឹងថាតើលោក កឹម សុខា នឹងត្រូវចូលរួមកិច្ចប្រជុំនេះ ដោយរបៀបណានៅឡើយទេ។ ប៉ុន្តែលោកថា អង្គការ Global Solutions Summit ចង់ឱ្យលោក កឹម សុខា ចូលរួមកិច្ចប្រជុំនេះដោយផ្ទាល់ ដោយសារក្រៅពីថ្លែងសុន្ទរកថាហើយ នៅមានកិច្ចពិភាក្សាជាក្រុមតូចៗបន្ថែមទៀត។
បើតាមលោក ចាន់ ចេន នៅក្នុងអង្គសវនាការថ្ងៃនេះ ទាំងតំណាងអយ្យការ និងសហមេធាវីការពារក្ដីឱ្យដើមបណ្ដឹងរដ្ឋប្បវេណី ព្យាយាមដោះបន្ទុក និងដេញដោលប្រឆាំងការស្នើសុំនេះ មុនមានសេចក្ដីសម្រេចចុងក្រោយរបស់ក្រុមប្រឹក្សាជំនុំជម្រះ។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា យល់ឃើញថា ការជំទាស់របស់តំណាងអយ្យការ និងការសម្រេចចិត្តរបស់ក្រុមប្រឹក្សាជំនុំជម្រះ ហាក់មានហេតុផលរឹងមាំតាមផ្លូវច្បាប់ ក្នុងពេលមេធាវីការពារក្ដីរបស់លោក កឹម សុខា មិនសូវមានប្រៀប និងខ្វះភស្តុតាងដោះបន្ទុក។ ប៉ុន្តែយ៉ាងណា លោកនៅតែចាត់ទុកថា ការបើកផ្លូវសម្រាប់អ្នកនយោបាយអាចមានឱកាសចូលរួមក្នុងកិច្ចប្រជុំកំពូលៗបែបនេះ គួរត្រូវបានបើកចំហ។
លោកបន្តថា៖ «ខ្ញុំគិតអញ្ចេះទេ បើសិនជារឿងនេះមានការបន្ធូរបន្ថយបញ្ហាហ្នឹងទៅ ដោយផ្ដល់សិទ្ធិឱ្យលោក កឹម សុខា អាចធ្វើនយោបាយបាន ហើយអាចចេញក្រៅប្រទេសបាន វាជារឿងមួយល្អ ដោយអាចបង្ហាញថា ស្ថានភាពនយោបាយនិងភាពតានតឹងផ្នែកនយោបាយនៅកម្ពុជាអាចមានបរិយាកាសល្អប្រសើរឡើងវិញ»។
លោក ចាន់ ចេន សហមេធាវីការពារក្ដីឱ្យលោក កឹម សុខា បានប្រាប់ក្រុមអ្នកសារព័ត៌មានដែរថា សវនាការជុំទី៣៤ នៅព្រឹកថ្ងៃពុធនេះ ក្រៅពីតុលាការចេញសេចក្ដីសម្រេចលើសំណើសុំចូលរួមកិច្ចប្រជុំនៅទីក្រុងប៊ែរឡាំងហើយ ក្រុមប្រឹក្សាជំនុំជម្រះក៏សម្រេចក្នុងពេលជាមួយគ្នា ទទួលយកភស្តុតាងបន្ថែមទៀតពីភាគីពាក់ព័ន្ធ។ លោកបន្តថា គិតមកទល់នឹងពេលនេះ តុលាការនៅមិនទាន់មានភស្តុតាងដើម្បីដាក់បន្ទុកលើលោក កឹម សុខា នៅឡើយទេ។
តុលាការសម្រេចបើកសវនាការបន្តទៀតលើសំណុំរឿងលោក កឹម សុខា នៅថ្ងៃទី៣០ ខែមីនា ខាងមុខនេះ។ ដោយឡែក នៅខាងក្រៅនៃបរិវេណតុលាការឯណេះវិញ គេសង្កេតឃើញថា កម្លាំងសមត្ថកិច្ចត្រូវបានគេដាក់ពង្រាយក្នុងកម្រិតតិចតួចនិងមិនតឹងរ៉ឹងទេ ខណៈអ្នកគាំទ្រលោក កឹម សុខា វិញក៏មិនសូវមានដែរ បើធៀបនឹងសវនាការមុនៗ៕