មន្ត្រីជាន់ខ្ពស់ក្រសួងបរិស្ថាន លើកឡើងថា កម្ពុជាបាននិងកំពុងខិតខំប្រឹងប្រែងក្នុងការការពារនិងអភិរក្សធនធានធម្មជាតិបន្តទៀត ដោយធ្វើយ៉ាងណាត្រូវធានាឱ្យបាននូវនិរន្តរភាពនិងគុណភាពបរិស្ថាន ដោយថា ធនធានធម្មជាតិត្រូវបានថែរក្សាការពារយ៉ាងល្អសម្រាប់ជាប្រយោជន៍ដល់មនុស្សជាតិរាប់ជំនាន់។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានលើកឡើងក្នុងសេចក្ដីប្រកាសព័ត៌មានរួមមួយនាថ្ងៃទី២៤ ខែមីនានេះ ស្ដីពី «អនាគតដែលយើងប្រាថ្នា» ជាប្រធានបទនៃ «ទិវាមួយម៉ោងសម្រាប់ភពផែនដី ឆ្នាំ២០២២»។
បើតាមមន្ត្រីរូបនេះ ទិវានេះធ្វើឡើងដើម្បីជំរុញឱ្យមានការប្ដេជ្ញាចិត្តរួមគ្នាបន្ថែមទៀតសម្រាប់និរន្តរភាពនៃភពផែនដី ដោយមានការចូលរួមពីអង្គការសង្គមស៊ីវិលជាតិ សហភាពអឺរ៉ុប សិល្បៈករ និងក្រុមហ៊ុនឯកជនផ្សេងៗ ជាដើម។
លោក នេត្រ ភក្ត្រា បានលើកឡើងថា កម្ពុជាបានដាក់ឱ្យដំណើរការនូវប្រព័ន្ធត្រួតពិនិត្យព្រៃឈើជាតិ និងប្រព័ន្ធព័ត៌មានសុវត្ថិភាពបរិស្ថាន និងការអនុវត្តគម្រោង (REDD+) ដើម្បីកាត់បន្ថយការបញ្ចេញឧស្ម័នផ្ទះកញ្ចក់ពីការបាត់បង់ និងរេចរឹលព្រៃឈើ ព្រមទាំងជាការកំណត់គោលដៅកាត់បន្ថយអត្រានៃការបាត់បង់ព្រៃឈើមកត្រឹមពាក់កណ្ដាល នៅត្រឹមឆ្នាំ២០៣០។
លោកបន្តថា កម្ពុជាបាននិងកំពុងខិតខំប្រឹងប្រែងបន្តទៀតក្នុងការការពារនិងអភិរក្សធនធានធម្មជាតិ ដោយធ្វើយ៉ាងណាធានាឱ្យបាននូវនិរន្តរភាព និងគុណភាពបរិស្ថាន ដែលត្រូវបានធានាថា ធនធានធម្មជាតិត្រូវបានថែរក្សាការពារបានយ៉ាងល្អសម្រាប់ជាប្រយោជន៍ដល់មនុស្សជាតិរាប់ជំនាន់ទៀត។
លោក នេត្រ ភក្ត្រា បានលើកឡើងក្នុងសេចក្ដីប្រកាសព័ត៌មានថា៖ «ទិវាមួយម៉ោងសម្រាប់ភពផែនដី គឺជាឱកាសល្អមួយសម្រាប់យើងទាំងអស់គ្នាបង្ហាញពីការយកចិត្តទុកដាក់ចំពោះធម្មជាតិ និងបរិស្ថាន ក៏ដូចជាប្រាប់ដល់អ្នកដទៃទៀតឱ្យបានយល់ពីសារៈសំខាន់នៃធនធានធម្មជាតិចំពោះជីវិតនៅលើភពផែនដី ព្រមទាំងចូលរួមស្វែងរកដំណោះស្រាយចំពោះបញ្ហាប្រឈមជាច្រើនដែលកំពុងកើតឡើងនាពេលបច្ចុប្បន្ន ជាពិសេសការប្រែប្រួលអាកាធាតុ ការខូចខាតប្រព័ន្ធអេកូឡូស៊ី ដែលជាកត្តាគំរាមកំហែងសកលដល់មនុស្ស និងធម្មជាតិ។ ទិវានេះផ្ដល់ឱកាសសម្រាប់យើងចូលរួមអបអរ ក៏ប៉ុន្តែវាក៏ជាពេលដែលយើងត្រូវបង្ហាញឆន្ទៈដ៏មោះមុតចំពោះការការពារបរិស្ថាន និងធនធានធម្មជាតិផងដែរ ហើយការការពារបរិស្ថាន និងអភិរក្សធនធានធម្មជាតិនេះ មិនមែនធ្វើត្រឹមរយៈពេល១ម៉ោងនៃការប្រារព្ធទិវានេះទេ គឺយើងត្រូវធ្វើជាប្រចាំ»។
តារាចម្រៀងម្នាក់ កញ្ញា មាស សុខសោភា លើកឡើងក្នុងសេចក្ដីប្រកាសព័ត៌មាននោះដែរថា ប្រសិនបើគ្រប់គ្នាមិនរួមចំណែកក្នុងការការពារទេ មនុស្សជាតិ សត្វព្រៃ និងភពផែនដី នឹងទទួលរងទុក្ខកាន់តែខ្លាំងឡើង ជាងស្ថានភាពដែលបានកើតឡើងរួចមកហើយនោះថែមទៀត។
កញ្ញាបាននិយាយថា៖ «ធម្មជាតិអំពាវនាវឱ្យមានយើងបង្ហាញឆន្ទៈនិងធ្វើសកម្មភាពរួមគ្នា […] ឥលូវនេះហើយគឺជាពេលដែលយើងត្រូវធ្វើសកម្មភាពឆ្ពោះទៅកសាងសង្គម និងភពផែនដីមួយប្រកបដោយនិរន្តរភាពសម្រាប់គ្រប់គ្នា»។
នាយកអង្គការ WWF លោក សេង ទៀក បានលើកឡើងថា ធនធានធម្មជាតិ ព្រមទាំងប្រព័ន្ធអេកូឡូស៊ី ផ្ដល់នូវមូលដ្ឋានគ្រឹះសម្រាប់ទ្រទ្រង់ដល់ការរស់នៅរបស់មនុស្ស សត្វ និងជីវចម្រុះគ្រប់ប្រភេទ ខណៈវាក៏ជាធាតុដ៏ចាំបាច់សម្រាប់ការអភិវឌ្ឍសេដ្ឋកិច្ចប្រកបដោយចីរភាពផងដែរ។
លោកថា៖ «ការថែរក្សាការពារធនធានធម្មជាតិ និងភពផែនដីដែលជាផ្ទះរួមរបស់យើង គឺជាកាតព្វកិច្ចរបស់យើងទាំងអស់គ្នា។ រួមគ្នា យើងអាចកសាងអនាគតមួយដែលមនុស្ស និងធម្មជាតិ អាចរស់នៅបានដោយសុខដុមរមនាជាមួយគ្នា»។
ឯកអគ្គរាជទូតអូស្ត្រាលីប្រចាំនៅកម្ពុជា លោក Pablo Kang បានលើកឡើងដែរថា ទិវាមួយម៉ោងសម្រាប់ភពផែនដី បានឆ្លុះបញ្ចាំងឱ្យឃើញពីលទ្ធផលដែលពលរដ្ឋទូទាំងពិភពលោកទទួលបាន ចេញពីភាពរួបរួមសាមគ្គីគ្នា ដែលវាបានផ្ដល់នូវក្ដីសង្ឃឹមក្នុងការរៀបចំអនាគតដ៏ប្រសើរមួយសម្រាប់មនុស្សជំនាន់ក្រោយៗទៀត។
លោកថា៖ «យើងអាចចូលរួមធ្វើឱ្យមានការផ្លាស់ប្ដូរជាវិជ្ជមានចំពោះវិបត្តិអាកាសធាតុ តាមរយៈការកាត់បន្ថយការប្រើប្រាស់ថាមពល និងបន្តប្រកាន់ខ្ជាប់នូវសកម្មភាពមេត្រីភាពបរិស្ថានងាយៗ ក្នុងការរស់នៅប្រចាំថ្ងៃរបស់យើង គឺអនាគតបែបនេះហើយដែលយើងគ្រប់គ្នាត្រូវចូលរួមកសាងរួមគ្នា»។
លោក Pablo Kang បន្តថា ផលវិបាកនៃការប្រែប្រួលអាកាសធាតុ និងការបាត់បង់ធនធានធម្មជាតិ កំពុងជះឥទ្ធិពលដល់ជីវិតមនុស្ស ក៏ដូចជាដល់ការរស់នៅនៃសត្វ និងជីវចម្រុះគ្រប់ប្រភេទនៅលើភពផែនដី។ លោកថា និរន្តរភាពបានកំពុងក្លាយជាធាតុដ៏សំខាន់ចាំបាច់នៃស្តង់ដារប្រតិបត្តិការអាជីវកម្ម សម្រាប់វិស័យឯកជន ដូចជា ម្ចាស់ក្រុមហ៊ុន សហគ្រិន បុគ្គលិក និងអតិថិជនគ្រប់រូប ដូច្នេះ និរន្តរភាពជាប្រធានបទដែលកំពុងមានសារៈសំខាន់សម្រាប់មនុស្សគ្រប់គ្នា។
ទិវាមួយម៉ោងសម្រាប់ភពផែនដីនេះ ជាយុទ្ធនាការបរិស្ថានធំមួយនៅលើពិភពលោកដែលបានចាប់បដិសន្ធិឡើងដោយការរួមកម្លាំងពីប្រជាជនជុំវិញសកលលោក។
ការបិទភ្លើងមួយម៉ោង នាម៉ោង៨និង៣០នាទីយប់ នៅថ្ងៃសៅរ៍ចុងក្រោយនៃខែមីនា បានក្លាយជាសកម្មភាពនិមិត្តរូបសកលមួយចាប់តាំងពីព្រឹត្តិការណ៍ប្រចាំឆ្នាំ២០២២។ ទិវានេះបានចាប់ផ្ដើមឡើងនៅក្នុងឆ្នាំ២០០៧ នៅទីក្រុងស៊ីដនី ប្រទេសអូស្រ្តាលី ដែលពេលនោះ ទិវានេះត្រូវបានធ្វើឡើងដើម្បីផ្សព្វផ្សាយអំពីផលប៉ះពាល់នៃការប្រើប្រាស់ភ្លើងអគ្គិសនីទៅលើបរិស្ថាន។
តាមរយៈការបិទភ្លើងមួយម៉ោងនេះ ប្រជាជននៅលើពិភពលោកបង្ហាញឆន្ទៈនិងចូលរួមចំណែកលើកកម្ពស់ការយល់ដឹងជាសកល ជំរុញការផ្លាស់ប្តូរឥរិយាបថជាវិជ្ជមានក្នុងការប្រើប្រាស់ថាមពលអគ្គិសនី ដើម្បីរួមចំណែកកាត់បន្ថយផលប៉ះពាល់ពីការឡើងកម្ដៅផែនដី៕