អាណាព្យាបាលមួយចំនួននៅឃុំបឹងខ្យាង ស្រុកកណ្ដាលស្ទឹង ខេត្តកណ្ដាល មិនហ៊ាននាំយកកូនតូចទៅចាក់វ៉ាក់សាំងការពារជំងឺកូវីដ-១៩ តាមការណែនាំរបស់ក្រសួងសុខាភិបាលនោះទេ ព្រោះពួកគាត់នៅតែបារម្ភថា នឹងមានផលប៉ះពាល់ទៅដល់សុខភាព។
អ្នកស្រី សួង ចិន្ដា អាយុ៣២ឆ្នាំ រស់នៅភូមិកំពង់តាឡុង ឃុំបឹងខ្យាង បានលើកឡើងថា អ្នកស្រីបារម្ភថា ការចាក់វ៉ាក់សាំងអាចបណ្ដាលឱ្យកូនរបស់គាត់ឈឺ ដូចជា ក្ដៅខ្លួន ក្អក ផ្ដាសាយ ហើយអាចឈានទៅដល់នាំយកទៅពេទ្យទៀតផង។ អ្នកស្រីថា មកដល់ពេលនេះ អ្នកស្រីមិនទាន់បានយកកូនប្រុសរបស់អ្នកស្រីដែលមានអាយុ៤ឆ្នាំទៅចាក់វ៉ាក់សាំងនៅឡើយទេ។
អ្នកស្រី ចិន្ដា ថ្លែងថា៖ «ខ្ញុំមានការបារម្ភជាខ្លាំងថា ក្រោយពីចាក់វ៉ាក់សាំងហើយ អាចធ្វើឱ្យកូនក្ដៅខ្លួន ឬក៍អាចឈានទៅដល់យកទៅមន្ទីរពេទ្យ ទើបខ្ញុំមិនទាន់បានយកកូនប្រុសទៅចាក់វ៉ាក់សាំង»។
ផ្ទុយពីស្ត្រីខាងលើ ស្ត្រីវ័យ២៦ឆ្នាំម្នាក់ ឈ្មោះ គុំ ម៉ារី រស់នៅភូមិបឹងខ្យាង ឃុំបឹងខ្យាងដែរនោះ បានឱ្យដឹងថា គាត់បានសម្រេចចិត្តនាំកូនស្រីដែលមានអាយុ៤ឆ្នាំទៅចាក់វ៉ាក់សាំងការពារជំងឺកូវីដ-១៩ កាលពីថ្ងៃទី២៤ ខែកុម្ភៈ ឆ្នាំ២០២២ កន្លងទៅនេះ។
អ្នកស្រីបន្តថា ពេលគាត់បានឮក្រសួងសុខាភិបាលប្រកាសអំពីការចាក់វ៉ាក់សាំងសម្រាប់ក្មេងៗដែលមានអាយុចាប់ពី៣ឆ្នាំរហូតដល់៥ឆ្នាំ គាត់បានធ្វើតាមការណែនាំរបស់ក្រសួងតែម្ដង។
អ្នកស្រីថ្លែងថា៖ «ការចាក់វ៉ាក់សាំងនេះអាចការពារជំងឺកូវីដ-១៩បានខ្លះ បើទោះបីជាវាមិនអាចការពារបាន១០០%ក៏ដោយ ក៏វាអាចការពារបានខ្លះដែរ»។
ចំណែកអ្នកស្រី រ៉ា សុខខឿន រស់នៅភូមិប្រឡាយ ឃុំបឹងខ្យាង បានលើកឡើងថា បើទោះបីជាកូនរបស់គាត់បានចាក់វ៉ាក់សាំងហើយក៏ដោយ ក៏អ្នកស្រីនៅតែមានការបារម្ភចំពោះសុខភាពកូនស្រីរបស់គាត់ដដែល។
ស្ត្រីមកពីខេត្តកណ្ដាលរូបនេះ បានថ្លែងថា៖ «ជំងឺកូវីដនេះអាចនៅតែបន្ដឆ្លងដដែល ជាពិសេសពេលកូនទៅសាលារៀន អាចឆ្លងពីមិត្ដភក្ដិ»។
អ្នកស្រីបន្ដថា គាត់នឹងព្យាយាមអនុវត្ដទៅតាមការណែនាំរបស់ក្រសួងសុខាភិបាល។
យ៉ាងណាក៏ដោយ លោកវេជ្ជបណ្ឌិត គាម ពិសិដ្ឋិ អ្នកនាំពាក្យមន្ទីរសុខាភិបាលខេត្តកណ្ដាល ចាត់ទុកការលើកឡើងរបស់ប្រជាពលរដ្ឋបែបនេះ ថាមិនត្រឹមត្រូវនោះទេ។ លោកថា មានតែការចាក់វ៉ាក់សាំងទេ ដែលអាចជួយការពារជំងឺកូវីដ-១៩បាន។
លោកថា៖ «សុំកុំឱ្យអាណាព្យាបាលទាំងអស់មានការយល់ច្រឡំថា ការចាក់វ៉ាក់សាំងអាចឱ្យកូនៗរបស់ពួកគាត់ទៅជាឈឺ ឬក៏ក្ដៅខ្លួនរហូតយកទៅពេទ្យ ឬក៏អាចឱ្យបាត់បង់ជីវិតដោយសារការចាក់វ៉ាក់សាំង គឺមិនដូច្នោះឡើយ»។
លោកវេជ្ជបណ្ឌិត គាម ពិសិដ្ឋិ ពន្យល់ថា ក្រោយពីចាក់វ៉ាក់សាំង កុមារអាចអាការក្ដៅខ្លួនតិចតួច ដែលនេះគ្រាន់តែជាប្រតិកម្មរបស់ថ្នាំតែប៉ុណ្ណោះ។
លោកបន្ថែមថា៖ «សុំឱ្យអាណាព្យាបាលទាំងអស់មេត្ដាយកកូនៗដែលមានអាយុចាប់ពី៣ឆ្នាំរហូតដល់៥ឆ្នាំទៅចាក់វ៉ាក់សាំងឱ្យបានគ្រប់គ្នា តាមសេចក្ដីប្រកាសរបស់ក្រសួងសុខាភិបាល»។
គិតត្រឹមថ្ងៃទី២៣ ខែមីនា ឆ្នាំ២០២២នេះ ការចាក់វ៉ាក់សាំងលើកុមារអាយុ៣ឆ្នាំទៅដល់ក្រោម៥ឆ្នាំ ដូសទី១ មានចំនួនសរុប៣៧៣ ០៦៤នាក់ និងដូសទី២ មានចំនួនសរុប២៧៣ ១៨៦នាក់។
គួររម្លឹកជូនថា កាលពីថ្ងៃទី១៧ ខែកុម្ភៈ ឆ្នាំ២០២២ លោកនាយករដ្ឋមន្ត្រី ហ៊ុន សែន បានចេញសេចក្ដីសម្រេចមួយ ដោយអនុញ្ញាតឱ្យកុមារដែលមានអាយុចាប់ពី៣ឆ្នាំទៅដល់៥ឆ្នាំ អាចចាក់វ៉ាក់សាំងការពារជំងឺកូវីដ-១៩ បន្ទាប់ពីយុទ្ធនាការចាក់វ៉ាក់សាំងការពារជំងឺកូវីដ-១៩ ដល់កុមារដែលមានអាយុចាប់ពី៦ឆ្នាំដល់១១ឆ្នាំរួចមក៕
អត្ថបទដោយលោក ឃាង សុខមាន ពលរដ្ឋសារព័ត៌មានប្រចាំខេត្តកណ្ដាល
