អាជ្ញាធរខេត្តជាប់បឹងទន្លេសាបបានចាប់ផ្តើមធ្វើយុទ្ធនាការចុះបង្ក្រាបបទល្មើសនេសាទ ក្រោយមានបទបញ្ជាពីលោកនាយករដ្ឋមន្ត្រី ហ៊ុន សែន។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៣ ខែមីនានេះ បានដាក់បទបញ្ជាផ្ទាល់មាត់ឱ្យកងទ័ព និងកងកម្លាំងនគរបាលចូលរួមជាមួយក្រសួងស្ថាប័នពាក់ព័ន្ធ ចុះបង្ក្រាបបទល្មើសនេសាទខុសច្បាប់នៅលើបឹងទន្លេសាប ក្រោយលោកទទួលបានព័ត៌មានថា បទល្មើសនេសាទនៅបឹងធម្មជាតិមួយនេះ កំពុងកើតឡើងទ្រង់ទ្រាយធំ។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំងលោក ងិន ហ៊ុន ប្រាប់វីអូឌីថា មន្ត្រីជំនាញផ្នែកជលផលបានសហការជាមួយសមត្ថកិច្ចពាក់ព័ន្ធ ចុះធ្វើយុទ្ធនាការបង្ក្រាបបទល្មើសទ្រង់ទ្រាយធំនៅបឹងទន្លេសាប ស្ថិតនៅភូមិសាស្ត្រមួយចំនួននៃខេត្តកំពង់ឆ្នាំងនៅថ្ងៃនេះ។
ប្រធានមន្ទីរកសិកម្មរូបនេះបន្តថា សម្រាប់ប្រតិបត្តិការចុះបង្ក្រាបនៅថ្ងៃនេះ មានគោលដៅនៅស្រុកកំពង់លែង ស្រុកបរិបូណ៍ និងស្រុកជល់គិរី ដោយប្រទះឃើញបទល្មើសនេសាទមួយចំនួន ដូចជា សម្រាស់ត្រី របាំងសាច់អ៊ួនក្រឡាល្អិត និងរបាំងស្បៃមុងក្រឡាល្អិតរាប់រយម៉ែត្រជាដើម។ លោកថា ការចុះបង្ក្រាបបទល្មើសនេសាទនេះ គឺមន្ត្រីជំនាញបានអនុវត្តតាំងពីយូរមកហើយ មិនមែនទើបតែលោកនាយករដ្ឋមន្ត្រី ហ៊ុនសែន មានប្រសាសន៍ពេលនេះទេ។
លោកបន្ថែមថា៖ «និយាយរួមជំនាញក៏ដូចជាកងកម្លាំងនៅតែបន្តចំណាត់ការរហូតពាក់ព័ន្ធនឹងបទល្មើសដែលកើតឡើងនៅក្នុងទឹកដីខេត្តកំពង់ឆ្នាំងយើងនេះ។ កន្លងមកមន្ត្រីជលផលខេត្តក៏បានបង្ក្រាបជាញឹកញាប់ដែរ ហើយក៏បានចាត់ការមនុស្សទៅតុលាការមួយចំនួនដែរ»។
ទន្ទឹមគ្នានេះដែរ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ លោក ប៉ែន វណ្ណរិទ្ធ លើកឡើងថា មន្ត្រីជំនាញជលផលខេត្តកំពង់ធំ តែងតែចុះបង្ក្រាបបទល្មើសនេសាទនៅបឹងទន្លេសាប ស្ថិតក្នុងភូមិសាស្រ្ត ខេត្តកំពង់ធំជារើយៗ និងចាប់បញ្ជូនជនល្មើសទៅតុលាការផងដែរ។
ប្រធានមន្ទីរកសិកម្មរូបនេះឱ្យដឹងថា ការចុះបង្ក្រាបនៅថ្ងៃនេះ គឺមិនបានជួបប្រទះបទល្មើសធំៗដូចជាការអូសអ៊ួនទឹកសាបដែលផ្សំដោយឧបករណ៍ឆក់នោះទេ។
លោកបន្ថែមថា៖ «ការងារហ្នឹងមិនមែនដល់តែមានបទបញ្ជាពីសម្ដេចទើបបានធ្វើទេ គេធ្វើរាល់តែថ្ងៃហ្នឹង ការងារបង្ក្រាបហ្នឹង។ ក្នុងខេត្តកំពង់ធំនេះ បទល្មើសធំៗដូចជាអ៊ួនអូសទឹកសាបរួមផ្សំនឹងឧបករណ៍ឆក់អីហ្នឹង គឺមិនមានប្រើទេក្នុងខេត្តកំពង់ធំនោះ»។
អភិបាលខេត្តពោធិ៍សាត់ លោក ជាវ តាយ ប្រាប់វីអូឌីកាលពីម្សិលមិញថា លោកនឹងគោរពតាមបទបញ្ជារបស់លោកនាយករដ្ឋមន្ត្រី ហ៊ុន សែន។ លោកបានកត់សម្គាល់ថា បទល្មើសនេសាទភាគច្រើនកើតឡើងនៅពេលយប់ ដែលពិបាកក្នុងការបង្ក្រាប។
រដ្ឋមន្ត្រីក្រសួងកសិកម្មរុក្ខាប្រមាញនិងនេសាទលោក វេង សាខុន បានសសេរហ្វេសប៊ុករបស់លោកនៅថ្ងៃនេះថា ក្រោយទទួលបានបទបញ្ជាពីលោកនាយករដ្ឋមន្ត្រី ហ៊ុន សែន គឺក្រសួងកសិកម្មបានដឹកនាំប្រជុំចង្អៀតបន្ទាន់មួយនៅថ្ងៃព្រហស្បតិ៍នេះ ជាមួយអគ្គស្នងការនគរបាលជាតិ លោក នេត សាវឿន អគ្គមេបញ្ញាការកងយោធពលខេមរភូមិន្ទ លោក វង្ស ពិសេន អគ្គមេបញ្ជាការរងនៃកងយោធពលខេមរភូមិន្ទ លោក សៅ សុខា និងអាជ្ញាធរពាក់ព័ន្ធផ្សេងទៀត។ កិច្ចប្រជុំចង្អៀតនេះ គឺដើម្បីប្រមូលធាតុចូលដើម្បីដាក់ចេញនូវវិធានការបន្ទាន់ចំពោះមុខ និងនាពេលអនាគត ក្នុងការបង្ក្រាបបទល្មើសនេសាទនៅបឹងទន្លេសាប។
ប្រធានកម្មវិធីផ្នែកស្រាវជ្រាវ និងតស៊ូមតិនៃសមាគមបណ្ដាញយុវជនកម្ពុជា លោក ហេង គឹមហុង មានប្រសាសន៍ថា ដើម្បីទប់ស្កាត់បទល្មើសនេសាទនៅបឹងទន្លេសាបឱ្យមានប្រសិទ្ធភាព គឺរដ្ឋាភិបាលត្រូវពិនិត្យមើល និងស្រាវជ្រាវឱ្យឃើញពីមូលហេតុដែលបណ្តាលឱ្យបទល្មើសនៅតែបន្តកើតមាន ដោយមិនអាចទប់ស្កាត់បាន និងត្រូវពង្រឹងការអនុវត្តច្បាប់ឱ្យបានតឹងរឹង។
លោក ហេង គឹមហុង បានដាក់ការសង្ស័យថា បទល្មើសនេសាទនៅបឹងទន្លេសាបឈានដល់ទ្រង់ទ្រាយធំនេះអាចជាការធ្វេសប្រហែល និងមានការគិបគិតគ្នាប្រព្រឹត្តអំពើពុករលួយរវាងអាជ្ញាធរពាក់ព័ន្ធ និងជនល្មើស។
លោកបន្ថែមថា៖ «រដ្ឋាភិបាលត្រូវធ្វើការស៊ើបអង្កេតឱ្យបានច្បាស់ជាពិសេសប្រសិទ្ធភាពនៃការអនុវត្តច្បាប់។គួរតែមានការស៊ើបអង្កេតស៊ីជម្រៅថាតើ ប្រភពនៃបទល្មើសទាំងអស់ហ្នឹងមានជាប់ពាក់ព័ន្ធជាមួយអាជ្ញាធរមានសមត្ថកិច្ចដែរ ឬទេ។ ប្រសិនបើអាជ្ញាធរមានសមត្ថកិច្ចជាប់ពាក់ព័ន្ធត្រូវតែមានការទទួលខុសត្រូវ។ មិនថាជាអំពើពុករលួយ ឬការធ្វេសប្រហែសក្នុងការបំពេញមុខងារសាធារណៈទេ។ សុទ្ធសឹងជាការទទួលខុសត្រូវផ្នែកព្រហ្មទណ្ឌ និងរដ្ឋបាល»។
កាលពីថ្ងៃទី៧ ខែមីនា ប្រធានរាជបណ្ឌិត្យសភាកម្ពុជា លោក សុខ ទូច បានចុះស្រាវជ្រាវ និងទប់ស្កាត់បទល្មើសនេសាទនៅបឹងទន្លេសាប ដោយបានរកឃើញបទល្មើសនេសាទទ្រង់ទ្រាយធំនៅលើបឹងទន្លេសាទ ស្ថិតនៅក្នុងខេត្តពោធិ៍សាត់ ដោយជនល្មើសជាជនជាតិវៀតណាមបានប្រើប្រាស់ឧបករណ៍នេសាទខុសច្បាប់ ដូចជា ឆក់ត្រជាក់ (យ៉ាំងកាវ) ឆក់ក្ដៅ ឈិបយន្ត និងឆក់ទូកលឿន ដែលបានបំផ្លាញមច្ឆជាតិទាំងតូចទាំងធំ ទាំងត្រីមានស្រកា និងត្រីអត់ស្រកា ផងដែរ។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៣ មីនា បានអនុញ្ញាតឱ្យកងកម្លាំងយោធា និងកងនគរបាលប្រើប្រាស់ឧទ្ធម្ភាគចក្រផងដែរ នៅក្នុងប្រតិបត្តិការបង្ក្រាបបទល្មើសនេសាទនៅក្នុងបឹងទន្លេសាបទនេះ៕