តារាចម្រៀងអាយ៉ៃជើងចាស់ លោក ព្រហ្ម ម៉ាញ មិនបានស្លាប់ដូចព័ត៌មានប្រតិដ្ឋដែលបានគេចែករំលែកតៗគ្នា នៅក្នុងបណ្ដាញសង្គមឡើយ ខណៈលោកកំពុងទទួលការព្យាបាលជំងឺលើសឈាម នៅឯមន្ទីពេទ្យមួយ ស្ថិតនៅក្បែរស្ពានអាកាសពេទ្យលោកសង្ឃ រាជធានីភ្នំពេញ។
ក្មួយប្រុសរបស់លោក ព្រហ្ម ម៉ាញ គឺលោក ខេង រតនា (ហៅនាយព្រែក) បានប្រាប់ វីអូឌី នារសៀលថ្ងៃទី២៥ ខែមីនានេះថា ពេលនេះសុខភាពរបស់លោក ព្រហ្ម ម៉ាញ បានធូស្រាលច្រើនហើយ លោកអាចនិយាយបាននិងពិសាអាហារបាន ពោលគឺចាំតែថ្ងៃចេញពីមន្ទីរពេទ្យតែប៉ុណ្ណោះ មិនមានអ្វីជាការបារម្ភឡើយ។
ជុំវិញព័ត៌មានក្លែងក្លាយនេះ លោក រតនា បានឱ្យដឹងថា អុំប្រុសរបស់លោកនិងក្រុមគ្រួសារមិនបានប្រកាន់យកទោសពៃចំពោះព័ត៌មានមិនពិត ដែលត្រូវបានផ្សព្វផ្សាយនិងចែករំលែកលើបណ្ដាញសង្គមនោះទេ ពីព្រោះលោកជាមនុស្សរបស់មហាជន។
លោក ខេង រតនា មានប្រសាសន៍ថា៖ «គាត់ជាសិល្បៈមហាជន អ៊ីចឹងគាត់មិនប្រកាន់ខឹងដូចអ្នកខ្លះគាត់សរសេរព័ត៌មានថាឱ្យចាប់អ្នកស៊ែរ (Share) ចាប់អ្នកដែលបំផុសព័ត៌មាន គឺគាត់មិនមានបំណងអីបែបនោះទេ ព្រោះគាត់ជាសិល្បៈមហាជន គាត់តែងមានការលើកលែង»។
នាយព្រែកបន្ថែមថា៖ «យើងមិនមានចាត់វិធានការតាមច្បាប់អ្វីទេគ្រាន់តែថា អុំគាត់សុំឱ្យកែសម្រួល ហើយអ្នកស៊ែរ (Share) ហើយសូមមេត្តាលុបវិញទៅ គឺចប់ហើយអត់អីទេ»។
លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) បានលើកឡើងថាសារព័ត៌មានពិតជាមានសារៈសំខាន់ណាស់ចំពោះការសម្រេចចិត្តរបស់យើងផ្ទាល់ក៏ដូចជាសង្គមជាតិទាំងមូលផងដែរ។
លោក ណុប វី មានប្រសាសន៍ថា៖ «ប្រជាពលរដ្ឋយើងដែលទទួលព័ត៌មានក្លែងក្លាយវាដូចជាគាត់ហូបឱសថក្លែងក្លាយ ចឹងមានន័យថា វានឹងប៉ះពាល់ដល់សុខភាពពួកគាត់ ដោយឡែកបើយើងទទួលបានព័ត៌មានក្លែងក្លាយ វានឹងប៉ះពាល់ដល់ការសម្រេចចិត្តរបស់យើង»។
លោកថា ក្នុងបរិបទយុគ្គសម័យឌីជីថលបច្ចុប្បន្ននេះ ការធ្វើការចែករំលែកព័ត៌មានក្លែងក្លាយគឺមានច្រើន ហើយការផលិតព័ត៌មានក្លែងក្លាយក៏មានច្រើនដែរ ដោយសារតែកត្តានៃចំណេះដឹងបច្ចេកវិទ្យាឌីជីថលរបស់ប្រជាពលរដ្ឋនៅមានកម្រិត។
លោក ណុប វី បន្តថា៖ «ព័ត៌មាននៅលើបណ្ដាញសង្គមមិនមែនសុទ្ធតែជាព័ត៌មានពិតទេ ដូចនេះគប្បីប្រជាពលរដ្ឋយើងគាត់មានការប្រយ័ត្នប្រយែងនៅក្នុងការចែករំលែក ឬក៏នៅក្នុងការប្រើប្រាស់ព័ត៌មានដែលគាត់បានឃើញនៅក្នុងប្រព័ន្ធឌីជីថល ដើម្បីធានានូវសុវត្ថិភាពរបស់ខ្លួនគាត់ផ្ទាល់ផង ហើយដើម្បីការពារផលប្រយោជន៍សង្គមជាតិយើងផង»។
យ៉ាងណាមិញ លោកក៏បានលើកឡើងពីផលប៉ះពាល់ថា ទោះបីជាយើងមិនមែនជាអ្នកផលិតព័ត៌មានផ្ទាល់ក៏ដោយ ន្តែប្រសិនបើយើងចែករំលែកព័ត៌មានមិនពិតយើងក៏អាចមានទោសផងដែរ។
អ្នកនាំពាក្យក្រសួងព័ត៌មាន លោក មាស សុភ័ណ្ឌ បានលើកឡើងថា ក្នុងសម័យឌីជីថលនេះប្រជាពលរដ្ឋមានឱកាសក្នុងការទទួលបានព័ត៌មានពីគ្រប់មធ្យោបាយហើយកាន់តែសម្បូរបែប។ ប៉ុន្តែទន្ទឹមនឹងនោះ វាមានការលេចឡើងនៅការចែករំលែក ការផ្សព្វផ្សាយព័ត៌មានមិនពិត ឬព័ត៌មានក្លែងក្លាយដែលបានជះឥទ្ធិពលយ៉ាងខ្លាំងដល់សង្គមជាតិ។
លោក មាស សុភ័ណ្ឌ មានប្រសាសន៍ថា៖ «ព័ត៌មានក្លែងក្លាយពិតជាជះឥទ្ធិពលដល់ការរស់នៅរបស់ប្រជាពលរដ្ឋក្នុងសង្គម វាប៉ះពាល់ដល់សណ្ដាប់ធ្នាប់ សន្តិសុខ បង្កឱ្យមានភាពចលាចលដល់សង្គម ហើយប៉ះពាល់ទៅដល់ កិត្តិយស សេចក្ដីថ្លៃថ្នូរ របស់បុគ្គលឯកជនជាដើម»។
លោក ព្រហ្ម ម៉ាញ វីរៈសិល្បៈករផ្នែកចំរៀងអាយ៉ៃ ត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យ ថ្ងៃទី១៩ ខែមីនា ដោយសារជំងឺលើសឈាម។ គួរបញ្ជាក់ផងដែរថា នេះមិនមែនជាលើកទី១ទេ ដែលមានការលេចឡើងនូវព័ត៌មានមិនពិតបែបនេះ ប្រមាណជាង១០ឆ្នាំមុនក៏ធ្លាប់មានព័ត៌មានថា លោក ព្រហ្ម ម៉ាញ តារាចម្រៀងអាយ៉ៃជើងចាស់ វ័យ៧២ឆ្នាំរូបនេះ បានទទួលមរណៈភាពនៅសហរដ្ឋអាមេរិកដោយសារជំងឺមេរោគអេដស៍ផងដែរ៕
