ក្រុមយុវជនការពារធនធានធម្មជាតិនៅកម្ពុជាបានឱ្យដឹងថា អាជ្ញាធរមូលដ្ឋានមួយចំនួននៅតែបន្តយាយី និងធ្វើទុក្ខបុកម្នេញលើយុវជនស្រលាញ់បរិស្ថាន ព្រមទាំងប្រជាសហគមន៍ មិនឱ្យពួកគេមានសេរីភាពពេញលេញដើម្បីចុះការពារព្រៃឈើនោះទេ ដែលជាផ្នែកមួយធ្វើឱ្យបទល្មើសធនធានធម្មជាតិមួយនេះបន្តកើតមាន។
ក្នុងកិច្ចសន្ទនាយុវជននៃការចូលរួមរបស់យុវជន ស្តីពីចីរភាពធនធានធម្មជាតិនៅកម្ពុជា នៅថ្ងៃអាទិត្យនេះ ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា លោក ហេង គឹមហុង បានថ្លែងថា ក្រុមយុវជនមកពីមហាវិទ្យាល័យនានា អតីតយុវជនវ័យឆ្លាតនៅក្នុងសហគមន៍ និងយុវជនការពារបរិស្ថាន ប្រមាណ៣០នាក់ បាននាំគ្នាប្រជុំពិគ្រោះយោបល់ជុំវិញប្រធានបទការពារធនធានធម្មជាតិនៅកម្ពុជា។
លោក គឹមហុង បញ្ជាក់ថា នៅក្នុងកិច្ចសន្ទនានោះ ក្រុមយុវជនទាំងបានរកឃើញថា អាជ្ញាធរមូលដ្ឋានមួយចំនួននៅតែប្រព្រឹត្តអំពើពុករលួយ និងបន្តរឹតត្បិតសេរីភាពយុវជន ការរារាំងប្រជាសហគមន៍ មិនឱ្យចូលរួម និងការពារព្រៃឈើ ជាពិសេសនៅតំបន់ព្រៃឡង់ជាដើម។ ករណីនេះធ្វើឱ្យបទល្មើសព្រៃឈើនៅតំបន់អភិរក្សមួយនេះនៅតែបន្តកើតមានដដែល។
លោកមានប្រសាសន៍ថា៖ «ការរឹតត្បិតសិទ្ធិសេរីភាពសហគមន៍មូលដ្ឋាន និងការចូលរួម ហើយក្នុងហ្នឹងក៏មានការជជែកពីអំពើពុករលួយ ដែលជាផ្នែកមួយដែលធ្វើឱ្យបាត់បង់ធនធានធម្មជាតិជាបន្តបន្ទាប់»។
លោកបន្ថែមថា៖ «បើសិទ្ធិសេរីភាពយើងត្រូវបានរឹតត្បិតការចូលរួមយើងអត់បានពេញដៃពេញជើង វាធ្វើឱ្យព័ត៌មានអត់ទទួលបានគ្រប់ជ្រុងជ្រោយដែរ វាកាន់តែធ្វើឱ្យធនធានធម្មជាតិកាន់តែបាត់បង់ ហើយបទល្មើសព្រៃឈើនៅតែបន្តកើតមានឡើង»។
ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា លោក ហេង គឹមហុង ថ្លែងបន្តថា ក្រោយពីក្រុមយុវជនធ្វើកិច្ចសន្ទនារួច គឺពួកគេនឹងពាំនាំនូវទុក្ខកង្វល់ និងបញ្ហាប្រឈមរបស់យុវជន រួមទាំងប្រជាសហគមន៍ ប្រាប់ទៅថ្នាក់ដឹកនាំក្រសួងបរិស្ថានឱ្យជួយរកដំនោះស្រាយជូនពួកគេ ខណៈពួកគេនឹងជួបថ្នាក់ដឹកនៃក្រសួងនៅដើមខែមេសាខាងមុខនេះ។
វីអូឌី មិនអាចសុំការបំភ្លឺពីអ្នកនាំពាក្យក្រសួងបរិស្ថាន លោកនេត ភក្រ្តា បានទេនៅរសៀលថ្ងៃអាទិត្យនេះ ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត សង្កេតឃើញថា បទល្មើសព្រៃឈនៅតែបន្តកើតមាន ដោយសារអាជ្ញាធរថ្នាក់ជាតិ និងថ្នាកក្រោមជាតិមួយចំនួន រារាំងយុវជន និងប្រជាសហគមន៍ការពារព្រៃឈើ មិនឱ្យចុះល្បាតនៅតំបន់ដែលជនល្មើសកាប់បំផ្លាញ។
លោក វណ្ណ សុផាត ផ្តល់ជាអនុសាសន៍ថា ដើម្បីទប់ស្កាត់បទល្មើសព្រៃឈើបានប្រសិទ្ធភាព លុះត្រាតែរដ្ឋាភិបាលបញ្ជាទៅក្រសួងបរិស្ថាន និងក្រសួងកសិកម្ម ត្រូវពង្រឹងការអនុវត្តច្បាប់ឱ្យបានតឹងរ៉ឹងលើជនល្មើសឱ្យមានតម្លាភាព និងមិនប្រកាន់បក្ខពួក ដូចជាការបង្ក្រាបបទល្មើសព្រៃលិចទឹក និងបទល្មើសតាមបឹងទន្លេសាបកន្លងមកនេះជាដើម។
លោកផ្តល់ជាអនុសាសន៍ថា៖ «ខ្ញុំចង់ឱ្យប្រមុខរាជរដ្ឋាភិបាលចាត់វិធានការ ការពារព្រៃទូទាំងប្រទេស ដូចការចាត់វិធានការធនធានជលផល និងការរំលោភដីព្រៃលិចទឹកជុំវិញបឹងទន្លេសាបដែរ ព្រោះកន្លងមកមានការសាទរពីប្រជាពលរដ្ឋ ។ អញ្ចឹងយើងសង្ឃឹមថា ទៅមុខទៀតរាជរដ្ឋាភិបាលនឹងចាត់វិធានការទៅលើបទល្មើសព្រៃឈើទាំងអស់ហ្នឹង ដើម្បីរក្សាព្រៃនិងធនធានធម្មជាតិនេះបានគង់វង្ស»។
បើតាមរបាយការណ៍របស់អង្គការលើកលែងទោសអន្តរជាតិ (Amnesty International) ចេញផ្សាយកាលពីថ្ងៃទី២៨ ខែមករា ឆ្នាំ២០២២ បានបង្ហាញថា ក្នុងឆ្នាំ២០២១ ព្រៃឈើលើផ្ទៃដីកម្ពុជាជាង៦ ០០០ហិកតាបានរងនូវការកាប់បំផ្លាញនៅតំបន់ការពារព្រៃឡង់ និងព្រៃព្រះរការ ដោយមានការទទួលសំណូក និងការប្រព្រឹត្តអំពើពុករលួយរបស់អាជ្ញាធរពាក់ព័ន្ធ។
កាលពីថ្ងៃទី១៧ ខែមិថុនា ឆ្នាំ២០២១ ស្ថានទូតសហរដ្ឋអាមេរិកប្រចាំកម្ពុជា បានផ្ដាច់ជំនួយពីរដ្ឋាភិបាលកម្ពុជា លើគម្រោង «ព្រៃឡង់បៃតង» ឆ្លើយតបនឹងវិធានការរបស់រដ្ឋាភិបាលដែលបិទខ្ទប់សំឡេងនិងសកម្មភាពសកម្មជនការពារព្រៃឈើ មិនឱ្យចូលល្បាតបទល្មើសនៅតំបន់ព្រៃឡង់ ហើយព្រៃឈើក្នុងតំបន់ការពារមួយនេះនៅបន្តរងការកាប់បំផ្លាញ៕