លោក ហ៊ុន សែន កែតម្រូវការអត្ថាធិប្បាយរបស់លោក សុខ ទូច ជុំវិញជំហរការបរទេសប្រឆាំងរុស្ស៊ី

លោកនាយករដ្ឋមន្ត្រី ហ៊ុន សែន អញ្ជើញជាអធិបតីសម្ពោធដាក់ឱ្យប្រើប្រាស់អគារមជ្ឈមណ្ឌលត្រចៀក ច្រមុះ បំពង់ក នៃមនី្ទរពេទ្យព្រះអង្គឌួងនៅថ្ងៃទី១៨ ខែមីនា ឆ្នាំ២០២២ (ហ្វេសប៊ុក៖ លោកនាយករដ្ឋមន្ត្រី )

លោក​នា​យករ​ដ្ឋម​​ន្ត្រី ​​ហ៊ុន​ សែន ច្រានចោលការលើកឡើងរបស់​​​​ប្រធាន​រា​ជប​ណ្ឌិត្យស​ភា​​ក​​ម្ពុជា​ ដែលថា ក​​ម្ពុជាបោះ​ឆ្នោត​​​​ប្រឆាំ​ងការឈ្លាន​ពានរបស់​រុស្ស៊ីទៅ​​​លើប្រទេសអ៊ុ​​​យ​​ក្រែន​ ដោ​យ​សារ​កម្ពុ​ជាមិ​នទា​ន់មាន​លទ្ធភា​ព​​ទប់ទល់​ការឈ្លាន​ពីបរទេស ដោយ​​លោកនាយករដ្ឋមន្ត្រី​ថា ការអត្ថាធិប្បាយនោះ មិ​​​ន​​តំ​ណា​​ងឱ្យ​នយោ​បា​​យកា​របរទេសកម្ពុជានោះ​ទេ។

ប្រ​តិក​ម្មរ​បស់លោក ហ៊ុន​ សែន នេះបា​នកើតឡើង​ ​ក្រោយ​ពី​ប្រធាន​រា​ជប​ណ្ឌិត្យស​ភា​​ក​​ម្ពុជា​ លោកបណ្ឌិត​​ សុខ​ ទូច​ ថ្លែងក្នុងបទបង្ហាញ​មួយ នៅ​រាជបណ្ឌិត្យសភា ក្នុងរាជធានីភ្នំពេញ កាលពីថ្ងៃសៅរ៍ ក្រោមប្រធានបទ «នយោបាយការបរទេសកម្ពុជា នាពេលបច្ចុប្បន្ន»។

​​

ក្នុងបទបង្ហាញនោះ លោក សុ​ខ ទូច បាន​​លើក​ឡើងថា​ បើ​កម្ពុ​ជាគាំទ្រ​ការឈ្លានពានរបស់​​រុស្ស៊ី​ ទៅលើប្រទេសអ៊ុយក្រែននោះ ថា​​តើ​​នឹងមានប្រទេសណាជួយកម្ពុជា ​បើសិន​មា​​ន​​​អ្នកញុះញង់វៀតណាម​ឱ្យ​​វាយលុក​ចូល​កម្ពុជា។ លោក​គូ​​ស​​​​បញ្ជាក់ថា បើសិនមានការ​លុកលុយពីប្រទេសដទៃ​ គឺ​​កម្ពុជាខ្វះលទ្ធភាព​ទប់​ទល់​​ចំនួន​ ៤ចំណុច បើ​ធៀបទៅនឹងប្រទេសជិតខាង។

លោកថា៖ «អាណា​​ញុះ ខ្ញុំដឹង​ ពួ​កហ្នឹង ញុះពូ​កែណា​ស់ ឱ្យ​វៀត​ណា​មម​កវាយមក ទប់​ជា​ប់ដែ​រអត់​? អ​ត់ជាប់​​ទេ​​។ គេ​មា​ន​​៤​ដែលយើងអត់មាន ដឹង​ទេ? នាវា​​មុជទឹកយើងមានទេ? អត់។ មិច​[យន្ត​ហោះចម្បាំ​ង​] យើង​មាន​ទេ អត់។ ទី៣ យើងមានកាតព្វ​កិច្ច​​ចូល​​បម្រើក​ងទ័ព​ទេ?​អត់។ ថៃ​មាន​ទា​ហាន​ឈុត​ខ្មៅ វៀ​​​តណាម​មាន​។​​ ខ្មែ​រ​យើ​ង សុំទោស​សម្តេច​ពិជ័យ​សេនា​[ទៀ​ បា​ញ់] ផ្កាយ​ច្រើន​តែ​យួ​រតែ​ក្បា​ល​ពោះ​​យួ​​រ​​មិ​ន​រួច​ផង​»។​

ប៉ុ​ន្តែ ក្នុ​ងពិធីស​ម្ពោធដាក់ឱ្យប្រើប្រា​ស់​​អ​គារព្យាបាលជំងឺ​ត្រចៀក ច្រមុះ បំពង់​ក នៃមនី្ទរ​ពេទ្យ​ព្រះអង្គ​​ឌួង នា​ព្រឹក​ថ្ងៃចន្ទ​នេះ លោកនាយករដ្ឋមន្ត្រី ហ៊ុន សែន បានច្រានចោលការអត្ថាធិប្បាយនេះ។

លោក ហ៊ុន សែន ថ្លែងថា ​អ្នកដែលមា​នសិ​ទ្ធិនិ​យាយជាផ្លូវការបាន សម្រាប់​ន​យោបា​យកា​រប​រទេសដែល​តំ​ណាង​ឱ្យកម្ពុជា គឺ​មា​នតែអង្គ​ព្រះមហាក្សត្រ ​នាយករដ្ឋម​ន្ត្រី ​និង​ក្រសួងការបទេ​សកម្ពុជា​ប៉ុណ្ណោះ។ លោកថ្លែងទាំងមិនបញ្ចេញឈ្មោះថា កា​​រលើក​ហេតុ​ផល៤យ៉ា​ងនោះ អា​ចធ្វើ​ឱ្យមា​នការ​យល់​​ច្រ​ឡំពីជំហររប​ស់កម្ពុជា ហើយថាបើមា​​នកា​រឈ្លានពានណាមួយកើតឡើងមែន​ កម្ពុជា​អនុវត្ត​នយោបាយការប​រទេស​ផ្អែ​​ក​លើធ​ម្មនុ​ញ្ញអ​ង្គការស​ហប្រជា​ជាតិ ​ដោយមិនអនុវត្តនយោបាយការបទេស​ផ្អែកលើ​​កម្លាំងនោះទេ។

លោ​កថា៖ «ការអត្ថាធិប្បាយថា ក​ម្ពុជាមិនទាន់បានតៀមខ្លួនដោយសារតែខ្លួនខ្វះនាវាមុជទឹក ខ្វះយន្តហោះ​មិច ខ្វះកាតព្វកិច្ចយោធាកងទ័ព​​សម្បូ​រដោយ​ឧត្តមសេនីយ​ក្បាលពោះធំ អ៊ីចឹងបានន័យថា ជំហរបែ​ប​នេះ​​គឺ​ត្រៀមខ្លួន​ផ្លាស់​ប្តូរ​នូវ​គំនិត​ពី​ការបោះឆ្នោតប្រឆាំង ទៅជាការបោះឆ្នោតគាំទ្រមែនទេ សុំអ្នកធ្វើអត្ថាធិប្បាយ​ទាំងឡាយ​ឱ្យមានការប្រុងប្រយ័ត្នជាមួយនឹងការធ្វើអត្ថាធិប្បាយបែបនេះ»។

កម្ពុជា កាលពីថ្ងៃទី២ ខែមីនា បានបោះឆ្នោតនៅឯកិច្ចប្រជុំមហាសន្និបាតអង្គការសហប្រជាជាតិ ប្រឆាំ​ង​​ការឈ្លានពានរបស់រុស្ស៊ីលើប្រទេសអ៊ុយក្រែន។

សេចក្ដីថ្លែងការណ៍របស់ក្រសួងការបរទេសកម្ពុជា នៅថ្ងៃទី៣ ខែមីនា បានគូសបញ្ជាក់ថា កម្ពុជាមិនត្រឹ​មតែជាប្រទេសដែលបោះឆ្នោតគាំទ្រការ​ថ្កោលទោស​នេះទេ ប៉ុន្តែ​កម្ពុជា​ក៏បា​ន​សម្រេច​​ចិត្ត​ចូល​រួម​ជាមួយ​ប្រទេ​​ស​​​​​ស​​ហ​ស្ថាបនិកនៃសេចក្ដីសម្រេចចិត្ត នៃកិច្ចប្រជុំពិសេសបន្ទាន់​របស់មហាសន្និបាតអង្គការសហប្រ​ជា​ជា​តិ ស្ដីពីស្ថាន​ការណ៍នៅក្នុងប្រទេសអ៊ុយក្រែននេះថែមទៀត៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered