មន្ត្រីជាន់ខ្ពស់នៃអគ្គស្នងការដ្ឋាននគរបាលជាតិកាលពីថ្ងៃអង្គារម្សិលមិញ បានបង្ហាញការគាំទ្រចំពោះផែនការរបស់អាជ្ញាធរថៃក្នុងការបញ្ជូនមន្ត្រី និងនាវាកងទ័ពជើងទឹកមកកាន់ប្រទេសកម្ពុជា ដើម្បីប្រមូលជនជាតិថៃប្រមាណ ៣ ០០០នាក់ចេញពីទីតាំងដែលបម្រើការនៅក្រុមប្រតិបត្តិការឆបោកតាមប្រព័ន្ធអនឡាញនានានៅកម្ពុជា ឱ្យត្រឡប់ទៅប្រទេសថៃវិញ។
ជំនួយការអគ្គស្នងការនគរបាលជាតិថៃ លោក សុរាជិត ហាក់ផន (Surachate Hakparn) បានឱ្យដឹងកាលពីថ្ងៃអាទិត្យថា អាជ្ញាធររបស់ខ្លួននឹងធ្វើដំណើរមកកាន់ប្រទេសកម្ពុជានៅថ្ងៃទី២ ខែមេសា ខាងមុខនេះដើម្បីជួយសង្រ្គោះ និងបញ្ជូនជនជាតិថៃចន្លោះពី ២ ៨០០ ទៅ ៣ ០០០នាក់ ចេញពីទីតាំងប្រតិបត្តិអំពើឆបោកខុសច្បាប់នៅកម្ពុជា។ នេះបើតាមការចុះផ្សាយរបស់សារព័ត៌មាន Bangkok Post។
សារព័ត៌មានដដែលនេះបានបន្តថា លោក សុរាជិត ហាក់ផន នឹងដឹកនាំនគរបាលជាន់ខ្ពស់មួយក្រុមទៅកាន់ទីក្រុងភ្នំពេញ និងទីប្រជុំប្រជនផ្សេងទៀត ខណៈដែលកងទ័ពជើងទឹកថៃនឹងរៀបចំនាវាមួយគ្រឿងដើម្បីជួយបញ្ជូនប្រជាពលរដ្ឋរបស់ខ្លួនត្រឡប់ទៅកាន់ប្រទេសថៃវិញ។
ជំនួយការអគ្គស្នងការនគរបាលជាតិថៃរូបនេះបន្ថែមថា ជនជាតិថៃនានានឹងត្រូវជួយសង្រ្គោះចេញពីទីតាំងនៃប្រតិបត្តិការឆបោកខុសច្បាប់ទាំងឡាយ ដែលត្រូវបានរកឃើញក្នុងរយៈពេលប៉ុន្មានថ្ងៃមកនេះ ហើយពួកគេទាំងអស់នោះក៏នឹងត្រូវសាកសួរបន្ថែមទៀតក្នុងប្រទេសថៃ ដើម្បីសម្រេចថាតើពួកគេនឹងត្រូវរងនូវវិធានការផ្លូវច្បាប់ ឬយ៉ាងណា។
ទាក់ទិនករណីនេះ អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមឃឿន បានថ្លែងប្រាប់វីអូឌីកាលពីថ្ងៃអង្គារថា គិតមកដល់ពេលនេះ លោកនៅមិនទាន់ទទួលបានលិខិតផ្លូវការណាមួយពីសមភាគីថៃនោះទេ។ ទោះជាយ៉ាងណា លោកថា អាជ្ញាធរកម្ពុជានឹងសហការក្នុងកិច្ចការងារនេះ ប្រសិនបើសមត្ថកិច្ចថៃ ទំនាក់ទំនងមកកាន់កម្ពុជា។
អ្នកនាំពាក្យរូបនេះបន្តថា ប្រសិនបើអាជ្ញាធរថៃមកកាន់កម្ពុជា ពួកគេនឹងអាចចូលរួមក្នុងការដោះស្រាយបញ្ហាមួយចំណែកធំទាក់ទងសិទ្ធិមនុស្ស និងសិទ្ធិការងារផងដែរ។
លោកថា៖ «យើងត្រូវតែសហការ ពីព្រោះយើងគឺជាប្រទេសជិតខាងជាមួយគ្នា ហើយក៏ជាសមាជិកនៃនគរបាលអាស៊ានដូចគ្នាផងដែរ។ ទី២ បទល្មើសនេះ គឺជាឧក្រិដ្ឋកម្មមួយនៅក្នុងប្រធានបទដែលត្រូវការកិច្ចសហប្រតិបត្តិការ ដូចជាការជួញដូរមនុស្ស ការបង្ខាំងមនុស្ស និងការឆ្លងដែនខុសច្បាប់ជាដើម។ ទាំងអស់នេះ គឺជាវិស័យដែលតម្រូវឱ្យមានកិច្ចសហប្រតិបត្តិការ»។
គួរបញ្ជាក់ថា ជនបរទេសមកពីប្រទេសចិន ថៃ ឥណ្ឌូណេស៊ី និងប្រទេសដទៃទៀតបានលើកឡើងថា ពួកគេត្រូវបានឃុំខ្លួន ជំរិតទារប្រាក់ និងពេលខ្លះត្រូវបានចាប់ពង្រត់ ព្រមទាំងធ្វើទារុណកម្មនៅក្នុងប្រទេសកម្ពុជា ដើម្បីឱ្យធ្វើការអនឡាញ ដែលភាគច្រើនគឺជាការបោកប្រាស់តាមប្រព័ន្ធអនឡាញនៅក្នុងប្រទេសផ្សេងៗ។
ទាក់ទិននឹងសំណួរ ថាតើមានជនជាតិថៃសរុបចំនួនប៉ុន្មាននាក់ដែលធ្វើការក្នុងឧស្សាហកម្មឆបោកតាមប្រព័ន្ធអនឡាញនោះ លោក ឆាយ គឹមឃឿន បានឆ្លើយតបថា រូបលោកមិនអាចផ្តល់ចម្លើយជាក់លាក់បាននោះទេ ដោយលោកថា អាជ្ញាធរថៃប្រហែលដឹងលម្អិតពីករណីនេះច្រើនជាង ដោយសារតែពួកគេបានទទួលព័ត៌មានពីពលរដ្ឋរបស់ពួកគេដោយផ្ទាល់។
យោងតាមប្រតិបត្តិការជួយសង្គ្រោះនានាកាលពីពេលកន្លងមក លោកបានបញ្ជាក់ថា ជនជាតិថៃភាគច្រើនក្នុងប្រតិបត្តិការឆបោកទាំងនេះបានឆ្លងដែនចូលមកដោយខុសច្បាប់។ ដូច្នេះអាជ្ញាធរកម្ពុជាមិនអាចគ្រប់គ្រង ឬតាមដានពួកគេបាននោះទេ។
លោក ឆាយ គឹមឃឿន បន្ថែមថា ជនជាតិថៃដែលត្រូវបានសង្គ្រោះទាំងឡាយនឹងត្រូវបានពិនិត្យថាតើពួកគេចូលមកក្នុងប្រទេសតាមរបៀបណា ខណៈអ្នកដែលឆ្លងចូលមកដោយខុសច្បាប់អាចនឹងត្រូវបានបណ្តេញចេញពីកម្ពុជា។
លោកបន្តថា ជាការចាំបាច់ដើម្បីធ្វើការសិក្សា និងស្វែងរកថាតើពួកគេបានប្រព្រឹត្តបទឧក្រិដ្ឋដែរឬទេ?។ យ៉ាងណា លោកអះអាងថា ប្រព័ន្ធផ្សព្វផ្សាយមួយចំនួនបានបំផ្លើសព័ត៌មានអំពីការឃុំខ្លួន និងជំរិតទារប្រាក់នៅកម្ពុជា។
លោកថា៖ «ដូច្នេះ យើងត្រូវតែពិនិត្យមើលថាតើនរណាជាជនរងគ្រោះពិតប្រាកដ»។
ដោយដកស្រង់ចេញពីប្រភពមិនបញ្ចេញឈ្មោះមួយក្នុងការិយាល័យអន្តោប្រវេសន៍របស់ប្រទេសថៃ សារព័ត៌មាន Bangkok Post បានរាយការណ៍ថា ជនជាតិថៃមួយចំនួនធ្វើការឱ្យថៅកែជាជនជាតិចិន ដែលក្នុងចំណោមពួកគេនោះ មានមួយចំនួនមានទំនាក់ទំនងជាមួយមន្ត្រីជាន់ខ្ពស់កម្ពុជា។
ជាមួយគ្នានេះ វីអូឌីក៏បានសម្ភាសន៍ និងរកឃើញថា អ្នកដែលត្រូវបានសង្គ្រោះភាគច្រើនក៏មានចេញពីទីតាំងប្រតិបត្តិការឆបោកដែលមានទំនាក់ទំនងជាមួយអ្នកជំនួញដ៏មានឥទ្ធិពល និងឥស្សរជននយោបាយកម្ពុជា មួយចំនួន រួមមាន សមាជិកព្រឹទ្ធសភានៃគណបក្សប្រជាជនកម្ពុជា លោក កុក អាន ស្ថាបនិកក្រុមហ៊ុន ផាយផេ ភីអេលស៊ី (Pi Pay) ម្ចាស់ក្លឹបបាល់ទាត់ធំមួយនៅកម្ពុជា លោក ឬទ្ធី សំណាង និងឧកញ៉ា ទ្រី ភាព ដែលជាប់ក្នុងបញ្ជីខ្មៅរបស់សហរដ្ឋអាមេរិកជាដើម៕
បកប្រែ និងសម្រួលដោយ លោក ភុន ច័ន្ទឧសភា ចេញពីអត្ថបទដើមជាភាសាអង់គ្លេស៖https://vodenglish.news/3000-thais-to-be-repatriated-from-cambodian-scam-compounds-thai-police/