យុវជននិងគ្រូពេទ្យស្ម័គ្រចិត្តកម្ពុជា បន្តប្តេជ្ញាចិត្តចូលរួមយុទ្ធនាការប្រយុទ្ធប្រឆាំងនឹងជំងឺកូវីដ-១៩ បើទោះបីជាស្ថានភាពការឆ្លងរីករាលដាលនៃជំងឺនេះបានធូស្រាលបន្តិចក្តី។
អ្នកគ្រូពេទ្យស្ម័គ្រចិត្តកញ្ញា សុទិន ណាតាសា ប្រាប់វីអូឌីថា កញ្ញាសប្បាយចិត្តនិងប្តេជ្ញាចិត្តចូលរួមប្រយុទ្ធប្រឆាំងជំងឺកូវីដ-១៩ ដើម្បីពលរដ្ឋខ្មែរជៀសឆ្ងាយពីការឆ្លងរីករាយដាលជំងឺនេះដល់សហគមន៍ម្តងទៀត។ កញ្ញាបន្តថា ដោយក្តីស្រឡាញ់ និងពេញចិត្តបម្រើពលរដ្ឋទើបកញ្ញាស្ម័គ្រចិត្តចូលរួមយុទ្ធនាការប្រយុទ្ធប្រឆាំងជំងឺកូវីដ-១៩នេះ។
កញ្ញាណាតាសាថា៖ «ដោយទឹកចិត្តស្រឡាញ់ ក្នុងខណៈពេលដែលជាតិរបស់យើងត្រូវការយើង ប្រជាជនរបស់យើង ពលរដ្ឋរបស់យើងត្រូវការយើង ក្នុងនាមយើងជាគ្រូពេទ្យ ក្នុងនាមយើងជាអ្នកថែទាំ ជួយសង្រ្គោះជីវិតរបស់គេ ចឹងយើងមិនអាចមើលរំលងពីបញ្ហានេះបានទេ អ៊ីចឹងយើងត្រូវតែចូលរួម»។
កញ្ញា សុទិន ណាតាសា ជាគ្រូពេទ្យស្ម័គ្រចិត្តនៅមណ្ឌលប្រយុទ្ធប្រឆាំងកូវីដ-១៩ នៅពហុកីឡាដ្ឋានជាតិអូឡាំពិក និយាយថា វាជារឿងល្អសម្រាប់គ្រូពេទ្យស្ម័គ្រចិត្តដូចក្រុមកញ្ញា ដែលអាចទទួលបានបទពិសោធន៍ថ្មីក្នុងការចូលរួមចំណែកប្រយុទ្ធប្រឆាំងជំងឺកូវីដ-១៩ ជាពិសេសមានការលើកទឹកចិត្តពីគ្រួសារផង ទើបក្រុមកញ្ញាស៊ូបេ្តជ្ញាចិត្តចូលរួមប្រយុទ្ធប្រឆាំងជំងឺនេះទាល់តែចប់។
កញ្ញាថា៖ «ទី១ ទឹកចិត្តចង់ជួយ ហើយមានការគាំទ្រពីគ្រួសារ មិត្តភក្តិអ្នករួមជំនាញជាមួយគ្នាផង ចេះសាមគ្គីកម្លាំងតែមួយ ជំរុញតស៊ូជាមួយគ្នាដើម្បីចង់ឱ្យប្រទេសរបស់យើងហ្នឹង អាចជៀសផុសពីជំងឺឆ្លង [កូវីដ-១៩] អាចឱ្យជីវភាពពលរដ្ឋយើងមកជាធម្មតាវិញទាំងអស់គ្នា កុំឱ្យដូចឥឡូវហ្នឹង គឺកូវីដ-១៩នឹងឆ្លងទៅឆ្លងមកអត់បាត់សោះ»។
ស្រដៀងគ្នានេះដែរ គ្រូពេទ្យស្ម័គ្រចិត្តម្នាក់ទៀត កញ្ញា ណាង ផល្លា បានឱ្យដឹងថាកញ្ញាបានចូលរួមធ្វើជាគ្រូពេទ្យស្ម័គ្រចិត្តនេះមួយឆ្នាំជាងមកហើយ ពោលគឺចាប់តាំងពីមានការផ្ទុះឡើងនៃកូវីដ-១៩ ក្នុងសហគមន៍មកម៉្លេះ។
កញ្ញាបន្តថា ដោយឃើញស្ថានភាពប្រទេសជួបវិបត្តិជំងឺកូវីដ-១៩ បែបនេះ កញ្ញានិងគ្រូពេទ្យស្ម័គ្រចិត្ដដទៃទៀតមិនឈឱបដៃមើលនោះទេ។
កញ្ញាថា៖ «ចំពោះការណ៍ដែលហ៊ានសម្រេចចិត្តធ្វើការងារទាំងអស់ហ្នឹង ទី១ គឺទាក់ទងទៅនឹងមហិច្ឆតាមានន័យថា នៅពេលដែលប្រទេសជាតិយើងកំពុងតែមានអាសន្ន ប្រសិនបើយើងអត់ទៅចូលរួមជួយទៀត តើបានអ្នកណាអ្នកជួយ! ហើយទី២ ពួកខ្ញុំមានការភ័យបារម្ភ ហើយក៏អាណិតអាសូរទៅដល់អ្នកជំងឺផ្សេងៗដែលគាត់បានឆ្លងជំងឺកូវីដ-១៩ ហើយគាត់អត់បានមើលថែឱ្យបានដិតដល់ ទើបពួកខ្ញុំសម្រេចចិត្តចូលរួមក្នុងការប្រយុទ្ធប្រឆាំងជំងឺហ្នឹង»។
កញ្ញា ណាង ផល្លា គ្រូពេទ្យបញ្ចប់ការសិក្សានៅសាលាបច្ចេកទេសថែទាំវេជ្ជសាស្រ្តអំពាវនាវដល់សាធារណជនឱ្យមានការប្រុងប្រយ័ត្ន និងចូលរួមការពារតាមការណែនាំរបស់ក្រសួងសុខាភិបាលដើម្បីទប់ស្កាត់ការឆ្លងរីករាលដាលទាំងអស់គ្នា។
កញ្ញានិយាយថា៖ «ខ្ញុំមានតែការផ្តាំផ្ញើទៅដល់ប្រជាជនទូទាំងប្រទេសរបស់យើង គឺត្រូវតែអនុវត្ត «៣កុំ និង៣ការពារ» ហើយព្យាយាមថែទាំសុខភាពខ្លួនឯងដើម្បីជៀសវាងពីជំងឺកូវីដ-១៩ ហើយក៏ជួយកាត់បន្ថយនៃការឆ្លងរីករាលដាលផងដែរ»។
យោងតាមការលើកឡើងក្នុងអត្ថបទរបស់លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលថា ស្រ្តីជាច្រើននាក់បានចូលបម្រើការងារនៅក្នុងវិស័យសុខាភិបាល ដើម្បីចូលរួមចំណែកលើកស្ទួយការការពារ និងថែទាំសុខភាពប្រជាជនទូទៅ ព្រមទាំងជួយដល់ការសម្រាលកូនដោយសុវត្ថិភាព និងមានសុខភាពល្អ ដែលជាចំណែកមួយមិនអាចខ្វះបានក្នុងការបង្កើតនូវកម្លាំងធនធានមនុស្សសម្រាប់ការអភិវឌ្ឍន៍សេដ្ឋកិច្ច និងប្រទេសជាតិ។
ក្នុងអត្ថបទនោះអ្នកស្រីបានសរសេរបញ្ជាក់ថា៖ «ក្នុងយុគសម័យយុទ្ធនាការប្រឆាំងនឹងជំងឺកូវីដ-១៩ ស្រ្តីដែលជាគ្រូពេទ្យ «មានដូចជាបណ្ឌិតសុខភាពសាធារណៈ គ្រូពេទ្យឯកទេស វេជ្ជបណ្ឌិត ឆ្មប និងគិលានុបដ្ឋាក-យិកា ជាដើម» និងអ្នកជំនាញពាក់ព័ន្ធផ្សេងៗទៀត បានចូលរួមចំណែកយ៉ាងសកម្មក្នុងការជួយផ្តល់សេវាអប់រំសុខភាព ការពារថែទាំ ពិនិត្យ ព្យាបាលជំងឺកូវីដ-១៩ទាំងអស់គ្នា»។
ជំងឺកូវីដ-១៩បានឆ្លងចូលប្រទេសកម្ពុជាដំបូង នៅចុងខែមករា ឆ្នាំ២០២០ តាមរយៈភ្ញៀវទេសចរណ៍ជនជាតិចិនដែលមកលេងនៅខេត្តព្រះសីហនុ។ គិតត្រឹមថ្ងៃទី៣០ ខែមីនា នេះ កម្ពុជាមានអ្នកឆ្លងជំងឺកូវីដ-១៩ចំនួន ១៣៥ ៥៨៥នាក់ ស្លាប់៣ ០៥៤នាក់ និងជាសះស្បើយចំនួន ១៣១ ៥៩៨នាក់។ ចំណែកករណីនាំចូលពីក្រៅប្រទេសវិញមានចំនួនសរុប ២១ ២០៨នាក់៕
អត្ថបទដោយ សុត បាន