សមាគមមីក្រូហិរញ្ញវត្ថុកម្ពុជា បានរៀបចំសិក្ខាសាលាបណ្តុះបណ្តាលប្រធានសាខាថ្នាក់ស្រុក និងខេត្តរបស់គ្រឹះស្ថានមីក្រូហិរញ្ញវត្ថុ និងធនាគារជាសមាជិកទូទាំងប្រទេស ដើម្បីជំរុញពង្រឹងសមត្ថភាពគ្រប់គ្រងសាខាប្រកបដោយប្រសិទ្ធភាព ក្រមសីលធម៌ និងវិជ្ជាជីវៈ។
សេចក្តីប្រកាសព័ត៌មានសមាគមមីក្រូហិរញ្ញវត្ថុកម្ពុជា កាលពីម្សិលមិញ បានឱ្យដឹងថា សិក្ខាសាលាពង្រឹងសមត្ថភាពនិងក្រមសីលធម៌នេះ ត្រូវបានរៀបចំជា ៥តំបន់ ដោយចាប់ផ្តើមពី រាជធានីភ្នំពេញចន្លោះពីថ្ងៃទី២៨ ដល់ថ្ងៃ៣០ ខែមីនា ឆ្នាំ២០២២ និងបន្តទៅ ខេត្តព្រះសីហនុ ខេត្តបាត់ដំបង ខេត្តព្រៃវែង និងខេត្តក្រចេះ នាខែបន្តបន្ទាប់។
វគ្គបណ្តុះបណ្តាលនេះ ធ្វើឡើងក្នុងគោលបំណងធំៗមួយចំនួន ដូចជាពង្រឹងសមត្ថភាពក្នុងក្របខណ្ឌការងាររបស់ប្រធានសាខា។ លើសពីនេះ ផ្តល់ឱកាសដល់ប្រធានសាខា ដើម្បីស្វែងយល់អំពីក្រម និងបទប្បញ្ញត្តិនានាពាក់ព័ន្ធប្រតិបត្តិការហិរញ្ញវត្ថុ និងកិច្ចការពារអតិថិជន ព្រមទាំងផ្តល់ជាការចែករំលែកចំណេះដឹង កត្តាប្រឈម ដំណោះស្រាយ និងការកសាងបណ្តាញទំនាក់ទំនងជាដើម។
ថ្លែងក្នុងពិធីបើកសិក្ខាសាលាតំបន់សម្រាប់រាជធានីភ្នំពេញ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា លោក សុខ វឿន បានលើកឡើងក្នុងសេចក្តីប្រកាសព័ត៌មាននោះថា កន្លងមកសមាគមបានយកចិត្តទុកដាក់ទៅលើការពង្រឹងឧត្តមភាពនៃធនធានមនុស្សដែលជាប្រតិបត្តិករហិរញ្ញវត្ថុតាមរយៈវគ្គបណ្តុះបណ្តាលនានា។ លោកថា វគ្គបណ្តុះបណ្តាលនោះ ដើម្បី លើកកម្ពស់សេវាហិរញ្ញវត្ថុប្រកបដោយការទទួលខុសត្រូវ និងបរិយាប័ន្នតាមវិធាននានា ដូចជាក្រមនិងវិធានផ្ទៃក្នុងនៅក្នុងវិស័យ រួមមានវិធានផ្ដល់ប្រាក់កម្ចី កិច្ច ការពារអតិថិជន និង ការដោះស្រាយបណ្តឹងជាដើម។
លោក សុខ វឿន មានប្រសាសន៍ថា៖ «ពិសេសទៅទៀត សមាគមបានសម្របសម្រួល និងផ្តល់កម្មវិធីនានាដែលជា ការអប់រំផ្នែកហិរញ្ញវត្ថុ ជូនភាគីពាក់ព័ន្ធ ជាចំណែកដើម្បីជ្រោមជ្រែងភាពរឹងមាំនៃវិស័យរបស់យើង»។
អគ្គនាយករងត្រួតពិនិត្យទី១ នៃធនាគារជាតិនៃកម្ពុជា លោក គិត សុវណ្ណារិទ្ធ បានលើកឡើងពីសារៈសំខាន់អំពីសិក្ខាសាលានេះ ក្នុងការពង្រឹងក្រមសីលធម៌ និងសមត្ថភាពសម្រាប់ថ្នាក់ដឹកនាំជួរមុខរបស់គ្រឹះស្ថានហិរញ្ញវត្ថុដែលបាននិងកំពុងផ្តល់សេវា ជាចាំបាច់សម្រាប់ប្រជាជនកម្ពុជា។
លោកបន្ថែមថា៖ «ដើម្បីធានាបាននូវនិរន្តរភាពវិស័យក៏ដូចជាការផ្តល់សេវាប្រកបដោយការទទួលខុសត្រូវប្រធានសាខានីមួយៗត្រូវធានាបានថាសេវារបស់ខ្លួនធ្វើឱ្យអតិថិជនទទួលបានជោគជ័យពិតប្រាកដ»។
សិក្ខាសាលាថ្នាក់តំបន់ត្រូវបានរៀបចំឡើង បន្ទាប់ពីសមាគមមីក្រូហិរញ្ញវត្ថុកម្ពុជា រួមជាមួយសមាគមធនាគារនៅកម្ពុជា និងសហព័ន្ធហិរញ្ញវត្ថុនិងបច្ចេកវិទ្យានៃកម្ពុជា ដាក់ឱ្យប្រើជាផ្លូវការនូវក្រមប្រតិបត្តិវិស័យធនាគារ និងហិរញ្ញវត្ថុកាលពីដើមខែមីនា ឆ្នាំ២០២២៕
