ប្រធានាធិបតីបារាំងលោក Emmanuel Macron នៅថ្ងៃអង្គារម្សិលមិញបានថ្លែងទៅកាន់សមភាគីរុស្ស៊ី លោក វ្លាឌីមៀរ ពូទីន ថាការដែលប្រទេសរបស់លោកតម្រូវឱ្យអ្នកបញ្ជាទិញឧស្ម័នមកពីបណ្ដាប្រទេសលោកខាងលិច បង់ប្រាក់ជារូបិយប័ណ្ណរូប (Ruble) គឺមិនអាចទៅរួចនោះទេ។ នេះបើតាមការឱ្យដឹងពីមន្ត្រីមួយរូបនៃការិយាល័យប្រធានាធិបតីបារាំង ដែលបានថ្លែងប្រាប់អ្នកសារព័ត៌មាន។
ទីភ្នាក់ងារសារព័ត៌មាន Reuters បានស្រង់ការលើកឡើរបស់មន្ត្រីរូបនេះយកមកចុះផ្សាយថា៖ «ប្រទេសបារាំងប្រឆាំងដាច់ខាតនឹងការបង់ប្រាក់ [ទិញឧស្ម័ន] ជារូបិយប័ណ្ណរូប»។
ប្រភពដដែលបន្ថែមថា នៅក្នុងជំនួបតាមរយៈទូរស័ព្ទជាមួយលោក ពូទីន លោកប្រធានាធិបតី Emmanuel Macron ក៏បានធ្វើការបញ្ជាក់សារជាថ្មីអំពីការត្រៀមខ្លួនរបស់លោក ក្នុងការអនុវត្តបេសកកម្មជួយសង្គ្រោះមនុស្សធម៌នៅទីក្រុង Mariupol របស់អ៊ុយក្រែនផងដែរ។
ទោះជាយ៉ាងណា ប្រធានាធិបតីបារាំងរូបនេះ ពុំបានបញ្ជាក់លម្អិតពីលក្ខខណ្ឌក្នុងការអនុវត្តសកម្មភាពនេះនៅឡើយទេ។
គួរបញ្ជាក់ថា ប្រទេសរុស្ស៊ី នៅថ្ងៃអង្គារដដែលនេះ ក៏បានសន្យាក្នុងការកាត់បន្ថយប្រតិបត្តិការយោធានៅជុំវិញទីក្រុងកៀវ (Kyiv) និងតំបន់ភាគខាងជើងក្នុងប្រទេសអ៊ុយក្រែនផងដែរ ខណៈដែលពួកគេចាត់ទុកសកម្មភាពនេះថា ជាជំហានមួយក្នុងការកសាងទំនុកចិត្តឆ្ពោះទៅរកការចរចាបញ្ចប់សង្គ្រាម។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចលនាទ័ពរបស់ខ្លួនចូលមកឈ្លានពានតំបន់ជាច្រើននៃប្រទេសក្បែរខាងមួយនេះ។
ទាក់ទិននឹងករណីនេះ បណ្ដាប្រទេសលោកខាងលិច ក៏បានសម្រេចដាក់ទណ្ឌកម្មជាបន្តបន្ទាប់លើរុស្ស៊ី ដែលក្នុងនោះក៏បានធ្វើឱ្យមានការធ្លាក់តម្លៃនៃរូបិយប័ណ្ណរូប (Ruble) ផងដែរ៕
