ពលរដ្ឋមួយចំនួនដែលចាក់វ៉ាក់សាំងការពារជំងឺកូវីដ-១៩ ដូសជំរុញរួចបានលើកឡើងថា ទោះបីជាចាក់វ៉ាក់សាំងគ្រប់ចំនួន ៤ ដូស ក៏មិនអាចទប់ស្កាត់ការឆ្លងជំងឺកូវីដ-១៩ បានដែរ ប៉ុន្តែវាបានជួយការពារអាយុជីវិត និងការធ្លាក់ខ្លួនឈឺធ្ងន់ធ្ងរ។
កំពុងសិក្សានៅសកលវិទ្យាល័យមួយក្នុងរាជធានីភ្នំពេញកញ្ញា រ៉ា ជឺយ៉ាង បានប្រាប់សារព័ត៌មានវីអូឌីថា កញ្ញាបានចាក់វ៉ាក់សាំងបាន ៣ ដូសហើយ ដែលដូសទី៣ នេះ ទើបនឹងចាក់នាពេលថ្មីៗ ដូច្នោះ កញ្ញាមិនហ៊ានទៅចាក់ដូសទី៤ទៀតឡើយ។
មួយវិញទៀត កញ្ញាថា បន្ទាប់ពីចាក់វ៉ាក់សាំងហើយ សុខភាពរបស់ខ្លួនហាក់ទន់ខ្សោយជាងមុន ករណីនេះ ទើបមិនទាន់ហ៊ានសម្រេចចិត្តទៅចាក់វ៉ាក់សាំងដូសទី៤។
និស្សិតរូបនេះបន្តថា ទោះបីជាបានចាក់វ៉ាក់សាំងចំនួន៣ដូសហើយក៏ដោយ តែកញ្ញានៅព្រួយបារម្ភ ដោយសារអ្នកចាក់រួចហើយក៏ឆ្លងដែរ ប៉ុន្តែគ្រាន់តែពេលឈឺនោះ វាមិនធ្ងន់ធ្ងរដូចអ្នកមិនបានចាក់តែប៉ុណ្ណោះ។
កញ្ញានិយាយថា៖«តាមពិតទៅ បើទោះបីជាចាក់វាក់សាំង «ដូសទី៣» ហើយ ឬមិនទាន់ហើយ ខ្ញុំគិតថា នៅតែមានការប្រុងប្រយ័ត្ន ព្រោះជំងឺនេះវាមើលមិនឃើញ ជាពិសេសសុខភាពខ្ញុំខ្សោយផង ចាក់ដូសទី៣ហើយ នៅមានការភ័យខ្លាចឆ្លង»។
កញ្ញា រ៉ា ជឺយ៉ាង បន្តថា អ្នកដែលចាក់វាក់សាំងគ្រប់ដូសហើយ អាចនឹងឆ្លង ប្រសិនបើជាពួកគាត់មិនបានអនុវត្តតាមវិធានសុខាភិបាល «៣កុំ ៣ការពារ» នោះ។
កញ្ញាថា៖ «យើងជាពលរដ្ឋល្អត្រូវធ្វើអ្វីទៅតាមការណែនាំរបស់ក្រសួងសុខាភិបាល ឬមន្រ្តីសុខាភិបាលដែលគេណែនាំដូចជាឱ្យលាងដៃនិងសាប៊ូ ឬលាងដៃជាមួយនិងអាល់កុល ពាក់ម៉ាស់ ហើយពិនិត្យកម្តៅខ្លួនឯង ឬមួយក៏ធ្វើតេស្ត «Rapid Test» តេស្តរហ័ស ថែទាំសុខភាពខ្លួនឯង រក្សាគម្លាតគ្នាដើម្បីការពារសុវត្តិភាព ហើយយើងត្រូវសហការគ្នាជៀសវាងការឆ្លងកូវីដម្តងទៀត»។
ចំណែកយុវតី ម៉េង មរកត ដែលបានឆ្លងជំងឺកូវីដ-១៩ បានលើកឡើងថា កញ្ញាមិនទាន់ទៅចាក់វាក់សាំងដូសជំរុញ «ទី៣» ដោយសារ គ្រូពេទ្យបានណែនាំកញ្ញា អំឡុងពេលឆ្លងនោះថា ក្នុងរយៈពេល៦ខែ ទើបអាចចាក់វ៉ាក់សាំងដូសជំរុញបាន។
យុវតីវ័យ ១៩ ឆ្នាំរូបនេះថា ទោះបីជាការចាក់វ៉ាក់សាំងហើយនៅតែឆ្លងក៏ពិតមែន ប៉ុន្តែវាបានជួយកាត់បន្ថយការប្រឈមមុខនឹងគ្រោះថ្នាក់ដល់ជីវិត ហើយថា ការមិនចាក់នេះ ក៏ជះឥទ្ធិពលដល់ការរស់នៅប្រចាំថ្ងៃ និងសង្គមជាតិផងដែរ។
យុវតីវ័យថា៖ «ខ្ញុំធ្លាប់ឆ្លងកូវីដ-១៩ កាលនោះបានចាក់វ៉ាក់សាំងដូសទី២ដែរ តែខ្ញុំធ្វើចត្តាឡីស័កនៅផ្ទះ ពេលជាមានលោកគ្រូពេទ្យប្រាប់ថា មិនទាន់អនុញ្ញាតឱ្យចាក់វ៉ាក់សាំងដូសទី៣ទេ ទុករយៈពេល៦ខែ តាំងពីហ្នឹងមកខ្ញុំការពារ (៣កុំ ៣ការពារ) រហូត ដូច្នេះខ្ញុំមិនទាន់បានចាក់ដូសទី៣ទេ»។
ពលរដ្ឋម្នាក់ទៀត ដែលធ្លាប់ឆ្លងជំងឺកូវីដ-១៩ លោក ណឹម មនោ បានរៀបរាប់ថា នៅពេលដែលធ្វើតេស្តហើយវិជ្ជមាន រូបលោកមានការព្រួយបារម្ភ និងភ័យខ្លាច ខណៈពេលឆ្លងនោះ មានអាការៈឈឺសាច់ដុំ ក្តៅខ្លួនខ្លាំង ឈឺសន្លាក់ដៃជើងពិបាកនឹងទ្រាំ ដោយថា ពេលឆ្លងជំងឺនេះ វាធ្វើទុក្ខឱ្យអស់កម្លាំង និងពិបាកធ្វើការងារ។
លោក ណឹម មនោ បន្តថា រូបលោកទើបនឹងសម្រេចចិត្តចាក់វ៉ាក់សាំងដូសជំរុញទី៣ កាលពីថ្ងៃទី២៣ ខែមករា ឆ្នាំ២០២២ ដោយមានគម្លាតរយៈពេលប្រហែល៨ខែ។
លោកថា៖ «ខ្ញុំសុខភាពរាងខ្សោយសព្វថ្ងៃ កង្វះអាហារ ឈឺច្រើន ហើយអាចប៉ះពាល់ដល់ការងារពេលយើងចាក់ហើយត្រូវសម្រាក ប៉ុន្តែមិនមែនខ្ញុំមិនចង់ចាក់នោះទេ គង់តែចាក់ទេ ព្រោះខ្លាចកូវីដ-១៩ដែរ»។
ចំណែកលោក ផែ សុខខេង ដែលបានចាក់វាក់សាំងដូសទី៤ រួចហើយវិញ បានបញ្ចេញទស្សនៈថា មូលហេតុដែលនាំឱ្យគាត់សម្រេចចិត្តចាក់វ៉ាក់សាំងដូសទី៣ និងដូសទី៤ គឺដើម្បីចូលរួមប្រយុទ្ធប្រឆាំងជំងឺកូវីដ-១៩ ខណៈជំងឺនេះកំពុងឆ្លងរីករាលដាលទូទាំងពិភពលលោក។
ពលរដ្ឋរូបនេះយល់ថា ការចាក់វ៉ាក់សាំងដូសជំរុញនេះ វាជួយកាត់បន្ថយហានិភ័យខ្លាំងជាងអ្នកដែលមិនទៅចាក់វ៉ាក់សាំងដូសទី៣ និងដូសទី៤ ដោយសារតែពួកគាត់មិនមានអង់ទីគ័រគ្រប់គ្រាន់នៅក្នុងខ្លួនដើម្បីប្រឆាំងនឹងជំងឺនេះ។
លោកថា៖ «សម្រាប់ការយល់ឃើញរបស់ខ្ញុំ ប្រសិនបើពលរដ្ឋបានចាក់វ៉ាក់សាំងគ្រប់ដូសវាអាចផ្ដល់ផលវិជ្ជមាន ទី១.ជួយបង្កើតអង់ទីគ័រនៅក្នុងខ្លួនការពារទប់ស្កាត់នៃជំងឺកូវីដ-១៩ ហើយទី២. ធ្វើឱ្យយើងមានភាពស៊ាំទៅនិងជំងឺ។ ចំណែកផលអវិជ្ជមានវិញពេលចាក់ហើយវាចុករោយដៃជើង ក្ដៅ ឈឺក្បាល ឈឺសន្លាក់ ងងុយគេងអ៊ីចឹងដែរ»។
លោក ផែ សុខខេង អំពាវនាវនិងលើកទឹកចិត្តដល់ពលរដ្ឋផ្សេងៗទៀត ដែលមិនទាន់ទៅចាក់វ៉ាក់សាំងដូសទី៣ និងដូសទី៤ គួរតែទៅចាក់ ដើម្បីសុវត្តិភាពខ្លួនឯង គ្រួសារ និងសង្គមជាតិទាំងមូល ហើយការទៅចាក់វ៉ាក់សាំងនេះ វាក៏ជាចូលរួមចំណែកទប់ស្កាត់ការរីករាលដាលនៃជំងឺកូវីដ-១៩ដែរ។
ពាក់ព័ន្ធទៅនឹងបញ្ហានេះ វីអូឌី មិនអាចសុំការបកស្រាយពីប្រធាននាយកដ្ឋានប្រយុទ្ធប្រឆាំងនឹងជំងឺឆ្លងនៃក្រសួងសុខាភិបាលលោក លី សុវណ្ណ និងអគ្គនាយកបច្ចេកទេសនៃក្រសួងសុខាភិបាលលោក ហុក គឹមចេង បាននោះទេ ដោយទូរស័ទ្ធចូលជាច្រើនដង ប៉ុន្តែគ្មានអ្នកលើក។
នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត មានប្រសាសន៍ថា ក្រសួងសុខាភិបាលនិងមន្រ្តីពាក់ព័ន្ធគួរតែណែនាំដល់ពលរដ្ឋឱ្យយល់ដឹងឱ្យកាន់តែច្បាស់អំពីបញ្ហាមួយចំនួន ទាក់ទងនឹងប្រសិទ្ធភាពនៃវ៉ាក់សាំង ដើម្បីជួយបញ្ជៀសហានិភ័យ និងធ្វើឱ្យពលរដ្ឋកាត់បន្ថយការភ័យខ្លាចដែរ។
លោកបន្តថា ចំពោះវ៉ាក់សាំងកំពុងចាក់បច្ចុប្បន្ននេះ ត្រូវបានទទួលស្គាល់ពីអង្គការសុខភាពពិភពលោកហើយ ដូច្នេះវាមិនប៉ះពាល់អ្វីខ្លាំងនោះទេ។
លោកថា៖ «ប្រសិនជា បើមិនមានការពន្យល់ ឬក៏អប់រំដល់ប្រជាពលរដ្ឋឱ្យបានយល់ដឹងអំពីផលប្រយោជន៍នៃគុណភាពវ៉ាក់សាំងទេ ហើយគាត់មិនចាក់ អាហ្នឹងវានៅតែរងផលប៉ះពាល់ដែរ អ៊ីចឹងសំខាន់បំផុត គឺត្រូវការអប់រំ និងមានការផ្សព្វផ្សាយបន្ថែមឱ្យប្រជាពលរដ្ឋយល់បានច្បាស់ ហើយពលរដ្ឋកុំមានការភ័យខ្លាចអំពីវ៉ាក់សាំងអី»។
កាលពីដើមខែមករា ឆ្នាំ២០២២ ប្រមុខរដ្ឋាភិបាលកម្ពុជា លោក ហ៊ុន សែន បានសម្រេចឲ្យអាជ្ញាធរសុខាភិបាលចាប់ផ្តើមផ្តល់វ៉ាក់សាំងបង្ការជំងឺកូវីដ-១៩ ដូសទី៤ ដល់ក្រុមជួរមុខប្រមាណ ៧០ម៉ឺននាក់ ដែលប្រឈមនឹងហានិភ័យ។
គិតត្រឹមថ្ងៃទី២៩ ខែមីនា ឆ្នាំ២០២២នេះ ការចាក់វ៉ាក់សាំងការពារជំងឺកូវីដ-១៩ នៅទូទាំងប្រទេសសរុប ១៤ ៨១៩ ៥៧៩ នាក់ស្មើនឹង ៩២,៦២% ធៀបនឹង ១៦លាននាក់។ ចំណែកការចាក់វ៉ាក់សាំងដូសទី៤ គិតត្រឹមថ្ងៃទី២៩ ខែមីនា សម្រេចបានត្រឹមតែ ១ ១៦ ១២៣នាក់ប៉ុណ្ណោះ៕
អត្ថបទដោយ សុតបាន
