យោងតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កម្ពុជារកចំណូលបានជាង ៧៧លានដុល្លារអាមេរិក ពីការនាំចេញជ័រនិងឈើកៅស៊ូ ក្នុងរយៈពេលពីរខែដើមឆ្នាំនេះ។
សារព័ត៌មានវៀតណាមផ្លឹស(vietnamplus) ដែលចេញផ្សាយកាលពីសប្តាហ៍មុនបានឱ្យដឹងតាមរយៈរបាយការណ៍របស់អគ្គនាយកដ្ឋានកៅស៊ូ (GDR) នៃក្រសួងកសិកម្ម រុក្ខាប្រមាញ់ និងនេសាទ ថា ប្រាក់ចំណូលសរុបពីការនាំចេញឈើកៅស៊ូ និងជ័រកៅស៊ូឈានដល់ ៧៧.២៣ លានដុល្លារអាមេរិក គិតត្រឹមខែកុម្ភៈ។
បើគិតពីបរិមាណនាំចេញ គិតត្រឹមខែកុម្ភៈ កម្ពុជាបាននាំចេញកៅស៊ូចំនួន ៤៨ ៥០៩ តោន កើនឡើង ២ ៥៣៦ តោន ស្មើនឹង ៦ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ តម្លៃលក់កៅស៊ូជាមធ្យមគឺ ១ ៥៨៥ ដុល្លារក្នុងមួយតោនគិតត្រឹមខែកុម្ភៈ ធ្លាក់ចុះ 0,1 ភាគរយធៀបនឹងតួលេខកាលពីឆ្នាំមុន។
ប្រភពដដែលបន្តថា កាលពីឆ្នាំមុន កម្ពុជារកចំណូលបានជាង ៦១១ លានដុល្លារពីការនាំចេញកៅស៊ូ និងឈើកៅស៊ូ ដោយបាននាំចេញជ័រកៅស៊ូចំនួន ៣៦៦ ៣០០តោន និងឈើកៅស៊ូចំនួន ៤៥៤ ម៉ែត្រគូប៕