នាយករដ្ឋមន្ត្រីកម្ពុជា បានប្រកាសជាថ្មីទៀតថា លោកនៅតែបន្ដឈរជាបេក្ខភាពនាយករដ្ឋមន្ត្រី សម្រាប់ការបោះឆ្នោតឆ្នាំ២០២៣ ហើយកូនប្រុសច្បងរបស់លោកគឺ លោក ហ៊ុន ម៉ាណែត នៅតែជាបេក្ខជនបន្ដវេនដែលត្រូវបម្រុងទុកនាពេលអនាគតដដែល។
ថ្លែងក្នុងឱកាសដាក់សម្ពោធឱ្យប្រើប្រាស់ស្ពានអាកាស និងផ្លូវក្រោមដីចោមចៅ រាជធានីភ្នំពេញ នៅថ្ងៃទី៣១ ខែមីនា ឆ្នាំ២០២២ លោក ហ៊ុន សែន អះអាងថា បេក្ខភាពនាយរដ្ឋមន្ត្រីអាណត្តិក្រោយនោះ គឺនៅតែជាលោកដដែល គ្មានអ្វីប្រែប្រួលនោះទេ។
លោក ហ៊ុន សែន បានបញ្ជាក់យ៉ាងដូច្នេះថា ៖«ឥឡូវនេះ គណបក្សប្រជាជនកម្ពុជា ជាគណបក្សមានសញ្ញាទេវតា អញ្ចឹងទេសូមបន្តបោះឆ្នោត ហើយខ្ញុំនៅបន្ដ។ ខ្ញុំសូមបញ្ជាក់ថា បេក្ខជននាយករដ្ឋមន្ត្រីក្នុងការបោះឆ្នោត ២០២៣ គឺ ហ៊ុន សែន ដដែល ហើយ ហ៊ុន ម៉ាណែតជាបេក្ខជនបន្ដវេន»។
ប្រធានគណបក្សប្រជាជនកម្ពុជារូបនេះបន្តថា ការត្រៀមបេក្ខភាពបម្រុងទុក គឺជារឿងធម្មតារបស់គណបក្សនយោបាយនីមួយៗ ហើយបក្សនីមួយៗជាអ្នកដាក់ការសម្រេចចិត្តរបស់បក្ស ហើយការជ្រើសរើសបេក្ខជនបម្រុងទុករបស់បក្សត្រូវតែរៀបចំទុកមុន ដើម្បីកុំឱ្យមានវិបត្តិផ្សេងៗកើតឡើង។
នេះមិនមែនជាលើកទី១ទេ ដែលលោកនាយរដ្ឋមន្ត្រី ប្រកាសឈរជាបេក្ខភាពនាយករដ្ឋមន្ត្រីនៅអាណត្តិបន្ទាប់នោះ។ កន្លងមក លោក ហ៊ុន សែន ធ្លាប់អះអាងថា លោកនឹងកាន់តំណែងមួយនេះរហូតដល់ពេលលោកឈប់ចង់ធ្វើ បើទោះពីជាបច្ចុប្បន្នលោកមានវ័យ៧០ឆ្នាំទៅហើយក្តី។
លោក ហ៊ុន សែន ត្រូវបានវៀតណាមលើកបន្តុបឱ្យធ្វើជានាយករដ្ឋមន្ត្រីកាលពីឆ្នាំ១៩៨៥ ក្រោយពេលនាយករដ្ឋមន្ត្រីពីររូប រួមមានលោក ប៉ែន សុវណ្ណ និង លោក ចាន់ ស៊ី ដែលត្រូវបានវៀតណាមលើកបន្តុបឱ្យគ្រប់គ្រងកម្ពុជា បន្ទាប់ពីផ្តួលរំលំរបបខ្មែរក្រហមនៅដើមឆ្នាំ១៩៧៩ នោះ ត្រូវបានចាប់ខ្លួនដាក់ពន្ធនាគារ និងម្នាក់ទៀតស្លាប់យ៉ាងអាថ៌កំបាំង។
អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ធ្លាប់ចេញរបាយការណ៍មួយដោយលើកឡើងថា ការគ្រប់គ្រងរបស់លោក ហ៊ុន សែន ជិត៤ទសវត្សមកនេះ មានស្ទើរគ្រប់រស់ជាតិ ទាំងការរំលោភសិទ្ធិមនុស្ស ការសម្លាប់មនុស្សក្រៅច្បាប់ អំពើទារុណកម្ម ការចាប់ឃុំខ្លួនតាមអំពើចិត្ត ការរារាំងសេរីភាពជួបជុំ និងការប្រមូលផ្តុំ ជាដើម។
បន្ថែមលើរបាយការណ៍នោះ កាលពីថ្ងៃទី២២ តុលា ២០២០ អង្គការអន្តរជាតិដដែលនេះក៏បានចេញសេចក្តីថ្លែងការណ៍មួយទៀត ដោយលើកឡើងថា កម្ពុជាកាន់តែក្លាយទៅជារបបផ្ដាច់ការ និងការដឹកនាំដោយឯកបក្ស ដោយសារតែមានការជួយគាំទ្រពីក្រុមពួកឧត្ដមសេនីយ៍ក្នុងជួរកងកម្លាំងសន្តិសុខ ដែលជាអ្នកទទួលខុសត្រូវចំពោះការរំលោភសិទ្ធិមនុស្សធ្ងន់ធ្ងរ និងជាប្រព័ន្ធ៕
