លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះបានបញ្ជាឱ្យរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ពន្លឿនការដោះស្រាយវិសមភាពប្រាក់សោធននិវត្តន៍របស់មន្ត្រីរាជការដែលមានប្រាក់ចូលនិវត្តន៍ទាបៗឱ្យកើនឡើងនៅឆ្នាំ២០២២នេះ។
ការលើកឡើងរបស់លោកនាយករដ្ឋមន្ត្រី បានធ្វើឡើងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវស្ពានអាកាស និងផ្លូវក្រោមដីចោមចៅ រាជធានីភ្នំពេញ នៅព្រឹកថ្ងៃទី៣១ ខែមីនា ឆ្នាំ២០២២។
ប្រមុខរដ្ឋាភិបាលកម្ពុជាបានថ្លែងថា យន្តការនេះគឺដើម្បីជួយលើកស្ទួយជីវភាពរបស់មន្ត្រីរាជការចាស់ៗ ដែលបានចូលនិវត្តន៍មុន ហើយមានប្រាក់សោធននិវត្តន៍ទាប ឱ្យកើនឡើងស្មើ ឬ ជិតស្មើជាមួយមន្ត្រីរាជការទើបចូលនិវត្តន៍ក្រោយៗដែលមានប្រាក់ខែគោលខ្ពស់ៗ។
ការប្រកាសរបស់លោក ហ៊ុន សែន នេះ បន្ទាប់ពីលោកបានថ្លែងដោយមោទនភាពនៅថ្ងៃនេះថា កម្ពុជាបានប្រមូលប្រាក់ពន្ធបានជាង ១២០០លានដុល្លារនៅក្នុងរយៈពេល៣ខែដើមឆ្នាំ២០២២នេះ។
បន្ថែមលើនេះ លោកក៏បានថ្លែងដោយអំនួតផងដែរ ពីការធ្វើអាជីវកម្មរ៉ែមាសបានជាង ២តោន (២ ២៧៥គីឡូក្រាម) ក្នុងរយៈពេល៩ខែ។ បើតាមលោកនាយករដ្ឋមន្ត្រី អាជីវកម្មរ៉ែមាសនេះ បានមកជំនួសក្តីរំពឹងទុករបស់កម្ពុជា ក្នុងការទាញយកចំណូលពីអាជីវកម្មរ៉ែប្រេង ដែលបានបាត់បង់ទៅ៕
