មន្ត្រីជំនាញខេត្តកំពង់ឆ្នាំង បានឱ្យដឹងថា ក្រោយប្រតិបត្តិការបង្ក្រាបបទល្មើសនេសាទនៅតំបន់បឹងទន្លេសាបនាប៉ុន្មានថ្ងៃចុងក្រោយនេះ អាជ្ញាធរបានបញ្ជូនជនសង្ស័យ៤នាក់ទៅតុលាការ ពាក់ព័ន្ធសំណុំរឿងប្រព្រឹត្តបទល្មើសនេសាទ និងទទួលទិញត្រីពីជនល្មើសនៅតំបន់បឹងទន្លេសាប។
នាយខណ្ឌរដ្ឋបាលខេត្តកំពង់ឆ្នាំង លោក លី ឡា បានឱ្យដឹងថា ក្នុងយុទ្ធនាការបង្ក្រាបបទល្មើសនេសាទកន្លងមកនេះ អាជ្ញាធរបានបញ្ជូនជនសង្ស័យ៤នាក់ ទៅតុលាការ ក្នុងនោះមានជនជាតិវៀតណាមពីរនាក់ និងពីរនាក់ទៀតជនជាតិខ្មែរ។ លោកថា ក្នុងចំណោមជនសង្ស័យទាំងនោះ មានពីរនាក់ប្រព្រឹត្តបទល្មើសឆក់ និង២នាក់ទៀតជាអ្នកទិញត្រីពីជនល្មើស។
លោក លីឡា មានប្រសាសន៍ថា៖ «នៅកំពង់ឆ្នាំងមានតែរបាំងឆៃអួន ស្បៃមុង និងឧបករណ៍ឆក់ ក្រៅពីហ្នឹងយើងមិនមានទេ អួនអូសយ៉ាំងកាវ ម៉ាញ់យ៉ាំងកាវអីមិនមានទេ។ យើងមានតែប៉ុណ្ណឹង ពិសេសឆក់និងរបាំងប្រជាពលរដ្ឋដែលពួកគាត់ប្រើស្បៃមុងក្រឡាល្អិតហើយនិងសម្រាស់ខ្លះ»។
លោកបន្តថា ក្រោយផ្សព្វផ្សាយយុទ្ធការបង្ក្រាបបទល្មើសនេសាទ មានអ្នកឆក់ត្រីបានប្រគល់ឧបករណ៍ឆក់ទាំងនោះមកខាងអាជ្ញាធរដោយស្ម័គ្រចិត្តចំនួន៤៣១ គ្រឿង ហើយនៅសល់ប៉ុន្មានទៀត ខាងអាជ្ញាធរនៅតែបន្តព្យាយាមឱ្យគាត់ប្រគល់ជូនមកមន្ត្រីជំនាញ។ ប៉ុន្តែប្រសិនបើ ពួកគេមិនព្រមប្រគល់ដោយស្ម័គ្រចិត្តទេនោះ អាជ្ញាធរនឹងអនុវត្តតាមនីតិវិធីច្បាប់។
លោកលីឡា លើកឡើងថា ៖«ជាពិសេសអាជ្ញាធភូមិឃុំនេះឯង បើគាត់បានចូលរួមយ៉ាងសកម្មជាមួយយើង ជួយចង្អុលបង្ហាញពីជនល្មើសសម្រាប់ដើម្បីចាត់ការតាមនីតិវិធីនោះ យើងនឹងងាយបំបាត់នូវឧបករណ៍នេសាទខុសច្បាប់ជាពិសេសឧបករណ៍ឆក់បើសិនជាគាត់ចូលរួម»៕
