ប្រជាពលរដ្ឋមួយចំនួននៅក្នុងខេត្តកំពង់ស្ពឺ មិនសូវជាមានការខ្វល់ខ្វាយនឹងជំងឺឆ្លងកូវីដ-១៩ ខ្លាំងដូចមុនទៀតនោះទេ ដោយសារ ស្ថានភាពឆ្លងជំងឺនេះ ហាក់ហាក់ធូស្រាលជាងមុន។
យុវសិស្សរៀននៅអនុវិទ្យាល័យព្រៃកន្ទោច ខេត្តកំពង់ស្ពឺ លោក យឿន សុខចិន្តា បានលើកឡើងថា បើតាមការសង្កេតរបស់ខ្លួន បច្ចុប្បន្ននេះ ជំងឺកូវីដ-១៩ ហាក់បានថមថយចុះ និងពុំសូវមានអ្នកភ័យខ្លាច ឬបារម្ភទៀតឡើយ ពីព្រោះតែដោយសារបច្ចុប្បន្ននេះ មិនសូវមានអ្នកឆ្លងនៅតាមសហគមន៍។ យុវសិស្សរូបនេះបន្តថា បច្ចុប្បន្នមានតែជំងឺគ្រុនផ្ដាសាយធម្មតា ដែលគេអាចព្យាបាលជាសះស្បើយបានក្នុងរយៈពេលមួយសប្តាហ៍ និងនៅតែតាមផ្ទះរៀងៗខ្លួនបាន។
យុវសិស្ស យឿន សុខចិន្តា បានបន្តថា៖ «តែទោះបីជាជំងឺឆ្លងមួយនេះ ស្ងប់ស្ងាត់យ៉ាងណាក៏ដោយក៏យើងត្រូវតែការពារ និងប្រុងប្រយ័ត្នជានិច្ចចំពោះជំងឺឆ្លងកាចសាហាវមួយនេះ»។
ចំណែកលោក ហឿង ចាន់ធីញ អាយុ ៤៣ឆ្នាំ មានតួនាទីជាមេបញ្ជាការភូមិភាគ៣ ក្រុងច្បារមន ខេត្តកំពង់ស្ពឺ បានប្រាប់ពលរដ្ឋអ្នកសារព័ត៌មាន ccim ថា អ្នកខ្លះគាត់មិនបានគិតឱ្យបានជ្រៅជ្រះ ឃើញករណីឆ្លងធូស្រាល មិនសូវការពារនិងព្រួយបារម្ភចំពោះបញ្ហាជំងឺឆ្លងនេះឡើយ។ តែលោកថា បញ្ហាទាំងអស់នេះហើយ ដែលប្រជាពលរដ្ឋមិនអាចមើលស្រាលវាបានទេ។
លោកបានបន្តថា៖ «ចាក់ថ្នាំការពារហើយក៏ដោយក៏នៅតែឆ្លងហ្នឹង ប៉ុន្តែវាមិនអាចប៉ះពាល់ដល់អាយុជីវិត ហើយម្យ៉ាងទៀតថ្នាក់ដឹកនាំនៅក្រុងច្បារមនយើង ពួកគាត់យកចិត្តទុកដាក់ណាស់ ចំពោះបញ្ហាជំងឺឆ្លងមួយនេះ ចំពោះអ្នកដែលឆ្លងធ្ងន់ធ្ងរសុទ្ធតែជាអ្នកអត់បានចាក់ថ្នាំការពារទាំងអស់ តែទោះបីយ៉ាងណាក្តី យើងត្រូវតែនាំគ្នាបង្កើនការប្រុងប្រយ័ត្នជានិច្ច នៃជំងឺឆ្លងកូវីដ-១៩»។
អាជីវករលក់ដូរនៅក្រុងច្បារមន ខេត្តកំពង់ស្ពឺម្នាក់ អ្នកស្រី អៀក សុខសើរ អាយុ ៣៩ឆ្នាំ បានលើកឡើងថា អ្នកស្រីនៅតែមានការព្រួយបារម្ភពីការឆ្លងជំងឺកូវីដ-១៩នេះ ខណៈមានអ្នកខ្លះគេមិនសូវព្រួយបារម្ភនោះទេ ដោយសារស្ថានភាពហាក់ស្ងប់ស្ងាត់ជាងមុន។
អ្នកស្រីបានបន្តថា៖ «បើទោះជាយ៉ាងណាក្តី សូមបងប្អូនជួយការពារទាំងអស់គ្នា ដើម្បីកុំឲ្យជំងឺឆ្លងទាំងនេះ វារីករាលដាលតទៅទៀត»។
លោកនាយករដ្ឋមន្ត្រី ហ៊ុន សែន នៅថ្ងៃទី៣១ ខែមីនានេះ បានណែនាំឱ្យប្រជាពលរដ្ឋទាំងអស់ដែលជួបជុំគ្នានៅក្នុងពិធីបុណ្យចូលឆ្នាំថ្មីប្រពៃណីជាតិខាងមុខនេះ ត្រូវបន្តអនុវត្តន៍វិធានសុខាភិបាល ជាពិសេសវិធានការ «៣កុំ និង៣ការពារ» ដើម្បីជៀសផុតពីការចម្លងជំងឺកូវីដ-១៩ ទាំងអស់គ្នា។
លោកថា៖ «ការសប្បាយខ្ញុំនៅតែរំលឹក សប្បាយចុះឆ្នាំនេះ ខ្ញុំដឹងថា នៅភ្នំពេញក្តី នៅសៀមរាបក្តី នៅគ្រប់កន្លែងត្រៀមនឹងដើរលេងហើយ ខ្ញុំក៏ត្រៀមដើរលេងដែរ […] ប៉ុន្តែអ្វីដែលខ្ញុំត្រៀមឱ្យបន្តយកចិត្តទុកដាក់ ទី១.ត្រូវបន្តខិតខំអនុវត្តនូវវិធានការសុខាភិបាល ជាពិសេសអា ៣កុំ ៣ការពាររបស់យើង ដែលយើងកំពុងធ្វើទាំងអស់គ្នា ជោគជ័យនៃការគ្រប់គ្រងកូវីដនៅកម្ពុជា មិនមែនបានមកពី តួអង្គហ៊ុនសែនតែម្នាក់ឯងនោះទេ»។
ប្រធានសហគមន៍សម្ព័ន្ធកសិករកម្ពុជា លោក ញ៉ិល ភាព បានមានប្រសាសន៍ថា ការភ័យខ្លាចទៅលើជំងឺឆ្លងកាចសាហាវកូវីដ-១៩នេះ មិនមែនពួកគាត់មិនខ្វល់ខ្វាយទេ ប៉ុន្តែអ្វីដែលពួកគាត់ជួបប្រទះដែលកំពុងលំបាកក្នុងជីវភាពរស់នៅជាងជំងឺកូវីដ-១៩ទៀតនោះ គឺការរងគ្រោះ ដោយសារការរំលោភយកដីធ្លី ដូចជា ការរំលោភយកដីសហគមន៍ពីសំណាក់ក្រុមហ៊ុនលីយ៉ុងផាត់ ក៏ដូចជា ពីសំណាក់ក្រុមទាហាន (ង.៧០) ដែលរំលោភដីព្រៃសហគមន៍ ធ្វើជាសម្បត្តិផ្ទាល់ខ្លួនជាដើម។
លោកបានបន្តថា៖ «ជំងឺកូវីដ-១៩ នេះមិនមែនពួកគាត់មិនខ្លាចមិនព្រួយបារម្ភនោះទេ គាត់ខ្លាច ខ្លាចស្លាប់ដូចតែគ្នា ប៉ុន្តែដែលបញ្ហាប្រឈមចំពោះមុខ គឺការបាត់បង់ដីធ្លីជាងការរីករាលដាលជំងឺកូវីដ-១៩។ ពួកគាត់នៅតែខ្លាច»។
យ៉ាងណាក្តី ដើម្បីទប់ស្កាត់ការឆ្លងជំងឺកូវីដ១៩ បំប្លែងខ្លួនថ្មី ប្រភេទអូមីក្រុង នៅក្នុងខេត្តនេះ កាលពីព្រឹកថ្ងៃទី២២ ខែមីនា ឆ្នាំ២០២២ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល រួមជាមួយអភិបាលខេត្តកំពង់ស្ពឺលោក វ៉ី សំណាង បានបើកយុទ្ធនាការជាតិផ្សព្វផ្សាយដល់ប្រជាពលរដ្ឋក្រោមប្រធានបទ «វីរុសកូវីដ-១៩ បំប្លែងថ្មីអូមីក្រុងឆ្លងលឿនខ្លាំងជាងមុន អាចបង្កឱ្យមានហានិភ័យធ្ងន់ធ្ងរ ដល់អ្នក និងគ្រួសារអ្នក»។
គិតត្រឹមថ្ងៃទី៣១ ខែមីនា ឆ្នាំ២០២២នេះ ចំនួនអ្នកឆ្លងជំងឺកូវីដ-១៩នៅកម្ពុជាបានធ្លាក់ចុះជាបន្តបន្ទាប់។ យោងតាមសេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃនេះ មានអ្នកឆ្លងជំងឺកូវីដ-១៩ចំនួន ៤០ ប៉ុណ្ណោះ ខណៈចំនួនអ្នកស្លាប់មិនមានឡើយក្នុងរយៈពេលជាងមួយសប្តាហ៍បន្តបន្ទាប់មកនេះ៕
អត្ថបទដោយលោក ចាន់ ឌឿន ពលរដ្ឋអ្នកសារព័ត៌មានខេត្តកំពង់ស្ពឺ