ក្រុមគ្រួសារអ្នកសារព័ត៌មានអនឡានម្នាក់(Online Media)នៅខេត្តកោះកុង អំពាវនាវសុំកិច្ចអន្តរាគមន៍ ពីរដ្ឋមន្រ្តីក្រសួងការពារជាតិ និងភាគីពាក់ព័ន្ធ ឱ្យដោះលែងស្វាមីរបស់ខ្លួន ចេញពីពន្ធនាគារ ក្រោយតុលាការបានផ្តន្ទាទោសដាក់ពន្ធនាគារអ្នកសារព័ត៌មានរូបនេះ ពីបទ ញុះញង់ឱ្យមានការរើសអើង ដែលជាប់ទាក់ទិនវិវាទដីនៅម្តុំឧទ្យានជាតិ ស្រុកបូទុមសាគរ។
អ្នកស្រី អ៊ូច វ៉ាន់ថន ដែលត្រូវជាភរិយាលោក យួន ឈីវ ចាងហ្វាងកាសែតអនឡាញប្រចាំខេត្តកោះកុង ប្រាប់វីអូឌីនៅថ្ងៃសុក្រនេះថា ពេលនេះអ្នកស្រីពិតជាត្រូវការស្វាមី ដើម្បីមើលថែក្រុមគ្រួសារ ដោយសារគាត់ជាបុគ្គលដ៏សំខាន់ក្នុងការរកចំណូលផ្តត់ផ្គង់ក្នុងគ្រួសារ។ ស្ថិតក្នុងវ័យប្រមាណ ៤០ឆ្នាំ អ្នកស្រី វ៉ាន់ថន បញ្ជាក់ថា ស្វាមីរបស់ខ្លួន ពិតជាមិនបានប្រព្រឹត្តិបទល្មើស ដូចអ្វីដែលរដ្ឋបាលខេត្តកោះកុង និងតុលាការចោទនោះទេ។
អ្នកស្រីបន្តថា៖ «សុំគាត់ជួយដោះលែងគាត់[ប្តី] គាត់មានកូនតូចតាច អត់មានពីណារកស៊ីចិញ្ចឹម។ រាល់ថ្ងៃនេះ កូនខ្ញុំឈឺទាំង២នាក់ ទើបតែយកមកពីពេទ្យហ្នឹង»។
លោក យួន ឈីវ ជាចាងហ្វាងគេហទំព័រអនឡាញឈ្មោះ«កោះកុងព័ត៌មានទាន់ហេតុការណ៍» ប្រចាំនៅខេត្តកោះកុង ត្រូវបានសមត្ថកិច្ចចាប់ខ្លួនកាលពីចុងខែកញ្ញា ឆ្នាំ២០២១។ ការចាប់ខ្លួននេះ ធ្វើឡើងក្រោយពីមានប្រតិកម្មរបស់លោក ទៀ បាញ់ រដ្ឋមន្រ្តីក្រសួងការពារជាតិ ហើយក៏ជាការអនុវត្ត នៅបន្ទាប់ពីមានបណ្តឹងរបស់លោក សុខ សុទ្ធី អភិបាលរងខេត្តកោះកុង ប្រឆាំងចាងហ្វាងគេហទំព័ររូបនេះដែរ។
មូលហេតុដែលនាំឱ្យលោក យួន ឈីវ ត្រូវតុលាការខេត្តកោះកុង ផ្តាន្ទាទោសដាក់ពន្ធនាគារ ១ឆ្នាំពីបទ «ញុះញង់ឱ្យប្រព្រឹត្តិបទឧក្រិដ្ឋជាអាទិ៍»នេះ ក្រោយពីលោកបានរិះគន់នៅលើបណ្តាញសង្គមហ្វេសប៊ុកដោយចំហរ ពីសកម្មភាពបំផ្លាញផ្ទះសម្បែងនិងដំណាំប្រជាពលរដ្ឋប្រមាណ ១១០គ្រួសារ នៅឃុំថ្មស ស្រុកបូទុមសាគរ ពីសំណាក់រដ្ឋបាលខេត្តកោះកុង ដែលលោកអះអាងថា ដឹកនាំដោយលោក សុខ សុទ្ធី ហើយសាររិះគន់នោះ ក៏មានជាប់ពាក់ព័ន្ធនឹងលោក ទៀ បាញ់ រដ្ឋមន្រ្តីក្រសួងការពារជាតិផងដែរ។
នៅថ្ងៃសុក្រនេះដែរ វីអូឌី ក៏បានទទួលញត្តិដែលមានស្នាមមេដៃប្រជាពលរដ្ឋចំនួន ៦៥នាក់ មកពីឃុំថ្មស ស្រុកបូទុមសាគរ ដែលស្នើដល់លោក ទៀ បាញ់ ជួយអន្តរាគមន៍ទៅតុលាការខេត្ត ឱ្យមានការដោះលែង លោក យួន ឈីវ ផងដែរ។
គិតមកដល់ពេលនេះ លោក ឈីវ ត្រូវបានឃុំខ្លួនប្រមាណ ៧ខែមកហើយ ក្រោយការចាប់ខ្លួន ។ ជាមួយគ្នានោះ តុលាការខេត្តកោះកុង បានយកសំណុំរឿងនេះទៅជំនុំជម្រះភ្លាមៗដែរ ក្រោយពីលោក ទៀ បាញ់ ចេញបញ្ជាឱ្យចាប់ខ្លួន ដោយសារអ្នកកាសែតរូបនេះ រិះគន់ថា អាជ្ញាធរខេត្ត មិនបានអនុវត្តអនុក្រឹត្យលេខ៣០ របស់លោកនាយករដ្ឋមន្រ្តី ដែលចេញកាលពីខែមីនា ឆ្នាំ២០២១។
អនុក្រឹត្យនេះ កំណត់ឱ្យអាជ្ញាធរគ្រប់គ្រងដីរដ្ឋថ្នាក់ខេត្ត ត្រូវកាត់ឆ្វៀលដីទំហំជិត ១២ម៉ឺនហិកតា ពីឧទ្យាជាតិបុទុមសាគរ ផ្តល់ជូនពលរដ្ឋអាស្រ័យផល។
វីអូឌី មិនអាចសុំការបញ្ជាក់ពីរដ្ឋមន្រ្តីក្រសួងការពារជាតិ លោក ទៀ បាញ់ បានទេ នៅថ្ងៃសុក្រនេះ។
ចំណែក អភិបាលរងខេត្តកោះកុង លោក សុខ សុទ្ធី ដែលរងការចោទប្រកាន់ បានបំភ្លឺយ៉ាងខ្លីថា រឿងនេះ មានតែខាងតុលាការទេ ជាអ្នកមានសិទ្ធិក្នុងការសម្រេច។ លោកបន្ថែមថា ចំពោះរដ្ឋបាលខេត្ត មិនមានជាប់ពាក់ព័ន្ធណាមួយទៀតនោះឡើយ។
លោកបន្តថា៖ «ខ្ញុំអត់ដឹងដែរ។ រឿងនេះទាល់តែខាងតុលាការ។ សួរទៅតុលាការ ព្រោះខាងរដ្ឋបាលខេត្តម៉េចមានសិទ្ធិសម្រេច ក្រៅពីខាងតុលាការ»។
មេធាវីការពារសិទ្ធិឱ្យលោក យួន ឈីវ គឺលោក ហេង គង់ បញ្ជាក់ថា ក្រោយតុលាការខេត្តកោះកុង ផ្តន្ទាទោសកូនក្តីរបស់លោកដាក់ពន្ធនាគារនោះ លោកបានរៀបចំបណ្តឹងឧទ្ធរណ៍បន្តទៀត ប្រឆាំងសាលក្រមនេះ។ បើតាមលោកមេធាវី ហេង គង់ សាលាឧទ្ធរណ៍ខេត្តកោះកុង បានកំណត់លើកយកបណ្តឹងសារទុក្ខនេះ មកជំនុំជម្រះនៅថ្ងៃទី២៤ ខែមេសា ឆ្នាំ២០២២ខាងមុខនេះ។
ទោះជាយ៉ាងណា លោកនៅមិនទាន់អាចធ្វើសេចក្តីសន្និដ្ឋានបានថា សំណុំរឿងនេះមានភាពត្រឹមត្រូវកម្រិតណានៅឡើយទេ។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ណុប វី យល់ឃើញថា ការសម្រេចឱ្យអ្នកសារព័ត៌មានរូបនេះ ត្រូវមានទោស ជាការឆ្លុះបញ្ចាំងឱ្យពីការធ្លាក់ចុះ នៃសិទ្ធិបញ្ចេញមតិ កាន់តែធ្ងន់ធ្ងរនៅកម្ពុជា។ ក្រៅពីនេះ លោកថា បើពិនិត្យទៅលើមូលដ្ឋានច្បាប់ អ្នកសារព័ត៌មានរូបនេះ រឹតតែមិនត្រូវបានការពារដោយច្បាប់ ស្តីពីរបបសារព័ត៌មានថែមទៀត។
លោកបន្តថា៖ «មានសម្តេច ទៀ បាញ់ នៅក្នុងហ្នឹងណា ដូចយើងដឹងហើយថា ដោយតែគាត់បានរាយការណ៍ព័ត៌មានបានប៉ះដល់លោក ហើយដោយសារគាត់មានឥទ្ធិពលដោយសារយើងឃើញថាក្នុងរយៈពេលតែមួយថ្ងៃតុលាការសម្រេចឱ្យគាត់មានទោសជាប់ពន្ធនាគារតែម្តង នេះជាចំណុចសំខាន់ទី១។ ហើយចំណុចសំខាន់ទី២ ច្បាប់ដែលពាក់ព័ន្ធនឹងអ្នកសារព័ត៌មាន គឺមិនត្រូវយកមកប្រើប្រាស់ទាល់តែសោះដោយប្រព័ន្ធតុលាការ »។
អ្នកសម្របសម្រួលអង្គការលីកាដូប្រចាំខេត្តកោះកុង លោក ហួរ អ៊ីន ដែលឃ្លាំមើលសំណុំរឿងនេះ ចាត់ទុកការសម្រេចផ្តន្ទាទោសប្រឆាំងលោក យួន ឈីវ នេះថាមិនសមហេតុផលទាល់តែសោះ ហើយបើពិនិត្យលើអង្គហេតុ ក៏រកមិនឃើញពីធាតុផ្សំនៃបទល្មើសនោះដែរ។
មួយវិញទៀត លោកថា ការផ្សាយព័ត៌មានរបស់លោក យួន ឈីវ គឺផ្អែកលើហេតុការណ៍ ដែលបានកើតឡើងជាក់ស្តែង ដែលឆ្លុះបញ្ចាំងពីការអនុវត្តវិធានការរដ្ឋបាលរបស់កម្លាំងចម្រុះដោយពិតប្រាកដ នៅថ្ងៃកើតហេតុនោះ៕
