រដ្ឋាភិបាលកម្ពុជាថ្លែងថា សំបុត្រយន្តហោះឡើងថ្លៃ ដោយសារតែបញ្ហាវិបត្តិធំៗចំនួនពីរនៅលើសកលលោក ហើយពួកគេកំពុងតែដាក់ទណ្ឌកម្មសេដ្ឋកិច្ចគ្នាទៅវិញទៅមក។
ក្នុងឱកាសអញ្ជើញពិនិត្យវឌ្ឍនភាពនៃការសាងសង់ អាកាសយានដ្ឋានអន្តរសៀមរាបនៅព្រឹកថ្ងៃអាទិត្យនេះ លោកនាយករដ្ឋមន្ត្រី ហ៊ុន សែន ថ្លែងថា បញ្ហាវិបត្តិកូវីដ-១៩ និងបញ្ហាសង្គ្រាមរវាងប្រទេសរុស្ស៊ី និងប្រទេសអ៊ុយក្រែន ធ្វើឱ្យពួកគេដាក់ទណ្ឌកម្មគ្នាទៅវិញទៅមក ដែលនាំឱ្យតម្លៃប្រេងឡើងថ្លៃលើពិភពលោក ហើយក៏ធ្វើឱ្យសំបុត្រយន្តហោះឡើងថ្លៃផងដែរ ។
លោកថ្លែងដូចនេះថា៖ «ឥឡូវវាច្បាស់ហើយ សំបុត្រយន្តហោះវាឡើងថ្លៃ ឡើងថ្លៃពីរបែប ឡើងថ្លៃទី១ ដោយសារតែយន្តហោះ គេឱ្យរក្សាគម្លាត យន្តហោះមួយគ្រឿងធ្លាប់តែជិះបាន ២០០នាក់-៣០០នាក់ ឥឡូវគេឱ្យជិះតែ ១០០នាក់។ អញ្ចឹងតម្លៃវាឡើងហើយ។ ឯមួយទៀត គេកំពុងវាយគ្នា[សង្គ្រាមរុស្ស៊ីនិងអ៊ុយក្រែន] គេកំពុងដាក់ទណ្ឌកម្មគ្នាទៅវិញទៅមក។ អញ្ចឹងបង្កើតបញ្ហាតម្លៃប្រេងឡើងថ្លៃពេញពិភពលោក ធ្វើឱ្យសំបុត្រយន្តហោះឡើងថ្លៃ»។
លោកនាយករដ្ឋមន្ត្រី ហ៊ុន សែន ថ្លែងបន្តថា បើនៅប្រទេសស្រីលង្កា កំពុងស្ថិតនៅក្នុងការប្រកាសអាសន្ន ដោយសារតែប្រេងឡើងថ្លៃ វិបត្តិសេដ្ឋកិច្ចពិភពលោកធ្វើឱ្យមានចលាចល ហើយប្រទេសនេះក៏បានដាក់ប្រទេសរបស់ខ្លួនក្នុងគ្រាមានអាសន្នផងដែរ ខណៈកម្ពុជាមិនអាចដាក់ប្រទេសក្នុងគ្រាមានអាសន្នដូចប្រទេស ស្រីលង្កានោះទេ។
កាលពីថ្ងៃទី១៧ ខែមីនា លោក ហ៊ុន សែន ក៏បានផ្ញើសារទៅកាន់ពលរដ្ឋ ដោយស្នើកុំឱ្យជេរលោករឿងសាំងឡើងថ្លៃនៅកម្ពុជា ដោយលោកសម្អាងថា វាជាបញ្ហាសកលបណ្ដាលមកពីសង្គ្រាមរវាងរុស្ស៊ី និងអ៊ុយក្រែន។
យ៉ាងនេះក្តី សហភាពសហជីពកម្ពុជា បាននិយាយក្នុងសេចក្ដីថ្លែងការណ៍មួយកាលពីថ្ងៃទី១៦ ខែមីនាដោយថា ការហក់ឡើងនូវតម្លៃប្រេងឥន្ធនៈនាប៉ុន្មានខែចុងក្រោយនេះ បានបង្កផលប៉ះពាល់ដល់ពលរដ្ឋមួយចំនួន ពិសេសអ្នកមានចំណូលទាប ដូចជា កម្មករ អាជីវករ កសិករ មន្ត្រីរាជការ រួមទាំងអ្នកប្រកបមុខរបរសេដ្ឋកិច្ចក្រៅប្រព័ន្ធថែមទៀតផង៕
សេចក្ដីថ្លែងការណ៍បានអះអាងថា បញ្ហានេះ រដ្ឋាភិបាលមិនទាន់មានវិធានការ ដើម្បីដោះស្រាយនៅឡើយទេ៕
