នាយករដ្ឋមន្ត្រីប្រកាសថា កម្ពុជាមិនត្រូវការវត្តមានយោធាបរទេសនោះទេ ប៉ុន្តែកម្ពុជាត្រូវការភ្ញៀវទេសចរបរទេសកាន់តែច្រើន ហើយលោកក៏ហាមមិនឱ្យអ្នកវិភាគនិយាយថា ការធ្វើអាកាសយានដ្ឋានអន្តរជាតិខេត្តសៀមរាប-អង្គរ គឺជាការពង្រឹងសមត្ថភាពយោធាចិននៅកម្ពុជានោះដែរ។
ក្នុងឱកាសអញ្ជើញពិនិត្យវឌ្ឍនភាពនៃការសាងសង់ អាកាសយានដ្ឋានអន្តរជាតិសៀមរាប-អង្គរនៅព្រឹកថ្ងៃទី៣ ខែមេសា លោកនាយករដ្ឋមន្ត្រី ហ៊ុន សែន ថ្លែងថា កម្ពុជាត្រូវការតែអ្នកទេសចរបរទេស គឺមិនត្រូវការកងទ័ពបរទេសនោះទេ ហើយកម្ពុជាក៏មិនចង់ឱ្យទឹកដីរបស់ខ្លួនក្លាយជាទីតាំងទ័ពបរទេស ខុសពីរដ្ឋធម្មនុញ្ញនោះឡើយ។
លោកនាយករដ្ឋមន្ត្រី ហ៊ុន សែន បានព្រមានទុកជាមុន ដល់អ្នកវិភាគមួយចំនួនថា កុំឱ្យពួកគេធ្វើការវិភាគ លើការធ្វើប្រើប្រាស់អាកាសយានដ្ឋានអន្តរជាឮតិខេត្តសៀមរាប-អង្គរ ដើម្បីពង្រឹងសមត្ថភាពយោធាកម្ពុជា-ចិន។
លោកព្រមានដូចនេះថា៖ «សង្ឃឹមថាអ្នកធ្វើអត្ថាធិប្បាយ និងអ្នកវិភាគ មិនចាត់ទុកការធ្វើព្រលានយន្តហោះអន្តរជាតិសៀមរាបនេះ ជាផ្នែកមួយនៃការពង្រឹងសមត្ថភាពយោធាចិននៅក្រៅប្រទេស នៅក្នុងប្រទេសកម្ពុជាទេ។ ផ្ញើសារជូនទុកឱ្យហើយ កុំឱ្យវិភាគបែបឆ្គួត។ កម្ពុជាអត់ត្រូវការយោធាបរទេសទេ ត្រូវការទេសចរបរទេសមកឱ្យច្រើន។ ចូលទៅដំណាក់កាលទីមួយ ៧លាន[នាក់] បើថាសមត្ថភាពទទួលផុតលើសពី៧លានហើយ ត្រូវពង្រឹងឡើងទៅដល់១០លាន ១០លានរួចហើយនៅតែមិនទាន់គ្រប់ត្រូវពង្រឹកទៅ២០លាន ដូចការគ្រោងទុក»។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណរ៉ា មានប្រសាសន៍ថា ដើមចមដែលនាំឱ្យលោកនាយករដ្ឋមន្ត្រី ហ៊ុន សែន ព្រមានដល់អ្នកវិភាគទុកជាមុន មិនឱ្យវិភាគថា ការធ្វើអាកាសយានដ្ឋានអន្តរជាតិខេត្តសៀមរាបកម្ពុជា-ចិន ដើម្បីពង្រឹងសមត្ថភាពយោធាចិន ដោយសារកន្លងមកមានមជ្ឈដ្ឋានជាតិនិងអន្តរជាតិមួយចំនួន ធ្លាប់រិះគន់លើគម្រោងអភិវឌ្ឍន៍មួយចំនួននៅកម្ពុជា ដោយរដ្ឋាភិបាលមានទំនោរទៅរកចិនជាដើម។
ទោះជាបែបនេះ លោក សុវណ្ណរ៉ា ផ្តល់ជាអនុសាសន៍ថា រដ្ឋភិបាលត្រូវបើកលំហសេរីភាពក្នុងការបញ្ចេញមតិរបស់គ្រប់ភាគី ជាពិសេសការបង្ហាញទស្សនៈរបស់អ្នកវិភាគ ដើម្បីឱ្យស្របតាមស្មារតីនៃកិច្ចព្រមព្រៀងទីក្រុងប៉ារីស និងស្របតាមរដ្ឋធម្មនុញ្ញកម្ពុជា ។
លោកផ្តល់ជាអនុសាសន៍ថា៖ «ខ្ញុំគិតថា បើរាល់ការអភិវឌ្ឍន៍ដែលមានតម្លាភាព រដ្ឋាភិបាលមិនត្រូវបារម្ភពីការរិះគន់ទេ ពីព្រោះកម្ពុជាជាប្រទេសប្រជាធិបតេយ្យ គួរតែបើកឱ្យគេបានបញ្ចេញទស្សនៈដូចគ្នាទំាងជាតិ និងអន្តរជាតិ» ។
លោកបន្ថែមថា៖ «កម្ពុជាជាប្រទេសប្រកាន់យករបបលទ្ធិប្រជាធិបតេយ្យស្របតាមរដ្ឋធម្មនុញ្ញ និងកិច្ចព្រមព្រៀងទីក្រុងប៉ារីស បើការនិយាយត្រូវបានរឹតត្បិតទេ វាមិនធ្វើឱ្យលទ្ធិប្រជាធិបតេយ្យបើកចំហទូលំទូលាយតាមខ្លឹមសារច្បាប់ទាំងស្រុងទេ»។
អាកាសយានដ្ឋានអន្តរជាតិសៀមរាបអង្គរនេះ ចាប់ផ្តើមដំណើរការសាងសង់នៅថ្ងៃទី១៥ ខែមីនា ឆ្នាំ២០២០ គ្រោងប្រើរយៈពេលសាងសង់សរុបចំនួន ៣៦ខែ ឬ៣ឆ្នាំ ហើយគ្រោងចំណាយទុនវិនិយោគប្រមាណ ៨៨០លានដុល្លារអាមេរិក៕
