សមាគមការពារសិទ្ធិមនុស្សអាដហុក ស្នើមន្ត្រីមូលដ្ឋានគោរពសេចក្តីណែនាំរបស់ក្រសួងមហាផ្ទៃ ឱ្យបានពេញលេញ ដើម្បីបញ្ចៀសការិះគន់ថា រដ្ឋាភិបាលរំលោភសិទ្ធិមូលដ្ឋាន ដែលធានាដោយរដ្ឋធម្មនុញ្ញ ខណៈវគ្គវណ្តុះបណ្តាលរបស់សមាគមមួយ នៅខេត្តមណ្ឌលគិរី រងការរំខានពីអាជ្ញាធរនៅតំបន់នោះ។
អ្នកនាំពាក្យសមាគមអាដហុក លោក ស៊ឹង សែនករុណា មានប្រសាសន៍ថា នៅព្រឹកថ្ងៃទី៤ ខែមេសា ឆ្នាំ២០២២នេះ អាដហុកបានបើកវគ្គបណ្តុះបណ្តាលមួយនៅសង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី តែត្រូវបានរំខានដោយនគរបាលនៅក្នុងតំបន់នេះ។ លោកបន្តថា ក្នុងពេលនោះ មន្ត្រីនគរបាល២រូប បានមកសាកសួរព័ត៌មានពីវគ្គបណ្តុះបណ្តាលនេះ ហើយសុំថតរូប ដើម្បីធ្វើសេចក្តីរាយការណ៍ទៅថ្នាក់លើ រួមទាំងសម្អាងថាសមាគមនេះមិនបានជូនដំណឹងទៅអាជ្ញាធរដែនដីឱ្យដឹងជាមុនទៀតផង។
លោកគូសបញ្ជាក់ថា វគ្គបណ្តុះបណ្តាលនេះបានដំណើរការធម្មតា ក្រោយពីមន្ត្រីអាដហុកបានពន្យល់មន្ត្រីមូលដ្ឋាន ពីសេចក្តីណែនាំរបស់ក្រសួងមហាផ្ទៃ ចុះថ្ងៃទី២៧ ខែវិច្ឆិកា ឆ្នាំ២០១៨ ដែលបានណែនាំថា អង្គការដែលបានចុះបញ្ជីត្រឹមត្រូវនៅក្រសួងមហាផ្ទៃ មានសិទ្ធិសេរីភាពពេញលេញក្នុងការធ្វើសកម្មភាព ក្នុងព្រះរាជាណាចក្រកម្ពុជា ស្របតាមច្បាប់ ដោយពុំចាំបាច់ជូនដំណឹងទៅអាជ្ញាធរមូលដ្ឋានជាមុនឡើយ។
លោកថា បញ្ហានេះ អាដហុកស្នើមន្ត្រីមូលដ្ឋានបញ្ឈប់ការរំខាននេះ ដើម្បីបញ្ចៀសការរិះគន់ពី«ការរំលោភទៅលើសេរីភាពមូលដ្ឋានដែលមានចែងក្នុងរដ្ឋធម្មនុញ្ញ និងកតិកាសញ្ញាស្តីពីសិទ្ធិពលរដ្ឋ
និងនយោបាយផងដែរ» ។
វីអូឌី មិនអាចសុំការបញ្ជាក់ពីមន្ត្រីនគរបាលសង្កាត់ស្ពានមានជ័យ បានទេនៅល្ងាចថ្ងៃចន្ទនេះ៕
