សមាគមសម្ព័ន្ធនិស្សិតបញ្ញវន្តខ្មែរ និងអ្នកស្រលាញ់យុត្តិធម៌ក្នុងសង្គមនានា នឹងនាំគ្នាយកញត្តិដាក់ទៅស្ថានទូតរុស្ស៊ី (Russia)ប្រចាំនៅកម្ពុជា ដើម្បីស្នើឱ្យប្រទេសមហាអំណាចមួយនេះបញ្ឈប់ការឈ្លានពានទៅលើប្រទេសអ៊ុយក្រែន(Ukraine)ជាបន្ទាន់ ហើយចាប់ផ្តើមស្ដារឡើងវិញនូវលំនឹងស្ថេរភាពនយោបាយ និងសន្តិភាពសកលលោក។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ ប្រាប់វីអូឌីនៅថ្ងៃចន្ទនេះថា សង្គមស៊ីវិល សកម្មជនបរិស្ថាន និងសកម្មជនសង្គមនានា ប្រចាំនៅកម្ពុជា មានក្តីអាណិតអាសូរដល់ប្រជាជនអ៊ុយក្រែន ដែលកំពុងស្ថិតក្នុងភ្នក់ភ្លើងសង្គ្រាមជាមួយរុស្ស៊ី។
ករណីនេះ ប្រធានសមាគមរូបនោះ អះអាងថា ក្រុមការងារនិស្សិតបញ្ញវន្តខ្មែរ បានសហការគ្នា ដើម្បីយកញត្តិដាក់ជូនទៅស្ថានទូតរុស្ស៊ី នៅព្រឹកថ្ងៃទី៥ ខែមេសា ដើម្បីស្នើទៅប្រទេសនេះ បញ្ឈប់ការឈ្លានពានទៅលើប្រទេសអ៊ុយក្រែន ហើយស្ដារឡើងវិញនូវលំនឹងស្ថេរភាពនយោបាយ និងសន្តិភាពសកល ។
លោកមានប្រសាសន៍ថា៖ «ក្នុងនាមយើងជាសង្គមស៊ីវិលនៅកម្ពុជា ក្នុងនាមយើងជាប្រទេសដែលធ្លាប់ឆ្អែតឆ្អន់ជាមួយនឹងសង្គ្រាម យើងពិតជាមិនចង់ឃើញប្រទេសណាមួយនៅលើសកលលោកស្ថិតនៅក្នុងភ្នក់ភ្លើងដូចកម្ពុជាដែលធ្លាប់ឆ្លងកាត់ទេ»។
លោកបន្ថែមថា៖ «ដូច្នេះចង់មិនចង់ ការធ្វើរបស់យើង គឺជាការធ្វើផ្សព្វផ្សាយនៃក្តីស្រលាញ់ ហើយចង់បង្ហាញថា ពួកយើងស្អប់ខ្ពើមសង្គ្រាម។ ដូច្នេះយើងគួរតែរស់នៅក្នុងក្តីស្រឡាញ់ ហើយកសាងសេចក្តីសុខរវាងប្រទេស និងប្រទេស ដែលធានាដល់សន្តិភាពយូរអង្វែងរបស់ពិភពលោកទាំងមូលដែរ»។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ មានប្រសាសន៍បន្តថា អ្នកដែលយកញត្តិដាក់នៅស្ថានទូតរ៉ុស្ស៊ី គ្រោងមានមនុស្សចំនួន១៥នាក់ ក្នុងចំណោមនោះមានព្រះសង្ឃ៥អង្គនាក់ផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា កន្លងមករដ្ឋាភិបាលកម្ពុជានៅក្នុងកិច្ចប្រជុំរបស់អង្គការសហប្រជាជាតិ ក៏ធ្លាប់ស្នើទៅរុស្ស៊ី ឱ្យគោរព និងអនុវត្តតាមធម្មនុញ្ញរបស់អង្គការសហប្រជាជាតិ ដើម្បីកុំឱ្យមានការឈ្លានពានពីប្រទេសមួយទៅលើប្រទេសមួយ ទៀតដែលធ្វើឱ្យប៉ះពាល់ដល់ជីវភាពរបស់ប្រជាពលរដ្ឋទូទៅនៅលើសកលលោក។
ករណីនេះ លោក សុខ ឥសាន បញ្ជាក់ថា ទោះបីជាក្រុមការងារនិស្សិតបញ្ញវន្តខ្មែរសកម្មជនសិទ្ធិមនុស្សយកញត្តិដាក់ជូនទៅស្ថានទូតរុស្ស៊ី ដើម្បីស្នើបញ្ឈប់ការឈ្លានពានទៅលើប្រទេសអ៊ុយក្រែនក្តី ប៉ុន្តែលោកថា ទំនងជារុស្ស៊ី មិនធ្វើតាមសំណើររបស់ពួកគេនោះទេ ពីព្រោះកន្លងមកមានប្រទេសមហាអំណាចមួយចំនួនជួយអន្តរាគមន៍ដើម្បីបញ្ចប់សង្គ្រាមប្រទេសទាំង២ ក៏រុស្ស៊ីមិនធ្វើតាមដែរ។
លោកមានប្រសាសន៍ថា៖ «បើតាមយោបល់ខ្ញុំ គ្មាននរណាគេយកចិត្តទុកដាក់ស្តាប់ជាមួយគាត់ទេ ពីព្រោះបណ្តាប្រទេសលើពិភពលោកគេបង្គាប់ឱ្យរុស្ស៊ី ឱ្យរុស្ស៊ីធ្វើតាមគាត់ គេមិនធ្វើតាមផង ចុះទំរាំគាត់ជាក្រុមនិស្សិតតូចមួយ ហើយនៅក្នុងប្រទេសតូចមួយដូចកម្ពុជា ជាដើម តើរុស្ស៊ីយកចិត្តទុកដាក់ ពិចារណាដែរឬអត់ ដូចអត់មានទេ»។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ការយកញត្តិដាក់នៅស្ថានទូតរុស្ស៊ីនៅព្រឹកស្អែកនោះ គ្រាន់តែជាសិទ្ធិនិងទស្សនៈរបស់ពួកគាត់ ដែលមិនចង់ឃើញប្រទេសទាំង២ មានសង្គ្រាម នាំឱ្យប៉ះពាល់ដល់ប្រជាពលរដ្ឋនៅទូទាំងពិភាពលោក ។
លោកមានប្រសាសន៍ថា៖« ខ្ញុំឃើញនៅតាមបណ្តាប្រទេសផ្សេងៗនៅលើពិភពលោកដែរ ខ្ញុំឃើញគេធ្វើបាតុកម្ម ដាក់ញាត្តិនៅស្ថានទូតរុស្ស៊ីប្រឆាំងនឹងការធ្វើសង្គ្រាមឈ្លាពានប្រទេសអ៊ុយក្រែន អញ្ចឹងវាអត់មានទាស់ខុសអ្វីទេ វាគ្រាន់តែជាដំណើរ ការយល់ឃើញសង្គ្រាមវាធ្វើឱ្យប៉ះពាល់ដល់ប្រជាពលរដ្ឋនៅទូទាំងពិភពលោកនោះ»។
រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែន កាលពីដើមខែកុម្ភៈ ពោលគឺបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀ ពូទីន ដែលបានធ្វើឱ្យបណ្តាប្រទេសមួយចំនួន រួមនឹងសហភាពអឺរ៉ុបបានសម្រេចដាក់ទណ្ឌកម្មជាបន្តបន្ទាប់លើរុស្ស៊ី។
សហភាពអឺរ៉ុប កាលពីពេលថ្មីៗនេះ ក៏បានអនុម័តជាផ្លូវការនូវការដាក់ទណ្ឌកម្មថ្មីមួយចំនួនបន្ថែមទៀត លើរុស្ស៊ីទាក់ទងនឹងការឈ្លានពានអ៊ុយក្រែន ដោយក្នុងនោះរួមមានការហាមឃាត់ការវិនិយោគក្នុងវិស័យថាមពលរបស់រុស្ស៊ី ការនាំចេញទំនិញប្រណីត និងការនាំចូលផលិតផលដែកពីរុស្ស៊ីជាដើម៕