សមាគមសម្ព័ន្ធនិស្សិតបញ្ញវន្តខ្មែរ និងសកម្មជនបរិស្ថានបង្ហាញការខកចិត្តដែលស្ថានទូតរុស្ស៊ីប្រចាំកម្ពុជាមិនទទួលយកញត្តិ ដែលទាមទារឱ្យប្រទេសរុស្ស៊ីបញ្ឈប់ការឈ្លានពានលើប្រទេសអ៊ុយក្រែន ដើម្បីស្ដារឡើងវិញនូវលំនឹងស្ថេរភាពនយោបាយ និងសន្តិភាពសកលលោក។
សមាគមសម្ព័ន្ធនិស្សិតបញ្ញវន្តខ្មែរ និងអ្នកស្រលាញ់យុត្តិធម៌ក្នុងសង្គមនានា នៅព្រឹកថ្ងៃ៥ ខែមេសា ឆ្នាំ២០២២នេះ បាននាំគ្នាយកញត្តិដាក់ទៅស្ថានទូតរុស្ស៊ី(Russia)ប្រចាំនៅកម្ពុជា ដើម្បីស្នើឱ្យប្រទេសមហាអំណាចមួយនេះ បញ្ឈប់ការឈ្លានពានទៅលើប្រទេសអ៊ុយក្រែន(Ukraine)ជាបន្ទាន់។
ថ្លែងមុខស្ថានទូតរុស្ស៊ីនៅរាជធានីភ្នំពេញនៅព្រឹកថ្ងៃអង្គារនេះ សកម្មជនបរិស្ថាន លោក ថុន រដ្ឋា បានសម្ដែងការខកចិត្តចំពោះស្ថានទូតរុស្ស៊ីដែលមិនទទួលញត្តិពួកគាត់ ប៉ុន្តែលោកបង្ហាញការជឿជាក់ថា ប្រព័ន្ធផ្សព្វផ្សាយនឹងនាំសារពួកគាត់ទៅដល់ប្រធានាធិបតីរុស្សីលោកពូទីន ឱ្យបានដឹងថា យុវជនខ្មែរក៏មិននៅស្ងៀមដែរ ក្នុងការទាមទារឱ្យប្រទេសរស្ស៊ីបញ្ឈប់ការឈ្លានពាន និងវិលមករកការចរចាជាមួយប្រទេសអ៊ុយក្រែនវិញ។
លោកថា៖ «ខកចិត្តខ្លាំងដែល តាមពិតគាត់ត្រូវតែទទួល ទោះបីជាគាត់មិនចង់ទទួល ឬមិនមើលក៏ដោយ គាត់សម្រេចិត្តបែបណា ក៏យើងមិនរំលោភលើការសម្រេចចិត្តរបស់គាត់ដែរ ប៉ុន្តែអ្វីដែលសំខាន់យើងចង់ប្រាប់ពីក្ដីកង្វល់របស់យើង ថាប្រជាជនខ្មែរមិនចង់បានសង្គ្រាមទេ»។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ បានឱ្យដឹងថា ស្ថានទូតរុស្ស៊ីមិនបានទទួលញត្តិនោះទេ ប៉ុន្តែលោកចង់ឃើញប្រទេសរុស្សីបញ្ចប់ការធ្វើសង្រ្គាមទៅលើប្រទេសអ៊ុយក្រែន ពីព្រោះសង្គ្រាមនាំឱ្យប្រជាពលរដ្ឋស្លូតត្រង់ស្លាប់ បន្សល់ទុកស្រ្តីមេម៉ាយ និងក្មេងកំព្រាជាដើម។
លោកថា៖ «ក្នុងនាមយើងជាមនុស្សជាតិដូចគ្នា ក្នុងនាមយើងជាប្រជាជាតិកម្ពុជា ជាប្រទេសដែលយើងធ្លាប់ឆ្លងកាត់សង្គ្រាមឆ្អែតឆ្អន់ហើយ ដែលជារឿងឈឺចាប់ ដែលប្រជាជាតិកម្ពុជាមិនចង់ឃើញប្រទេសណាមួយលើសកលលោកស្ថិតក្នុងភ្នក់ភ្លើងនៃសង្គ្រាមដែរ»។
ចំណែក សកម្មជនបរិស្ថានមួយរូបទៀត កញ្ញា ភួន កែវរស្មី ថ្លែងថា អ្នកដែលស្អប់ខ្ពើមរឿងអយុត្តិធម៌សង្គមតែងតែមានការឈឺឆ្អាល និងស្អប់ការរឹតត្បិតសេរីភាពដែលផ្ទុយពីច្បាប់ ។ ករណីនេះ កញ្ញា បានលើកទឹកចិត្តស្រ្តី និងក្មេងស្រី ព្រមទាំងពលរដ្ឋអ៊ុយក្រែនទាំងមូល ត្រូវមានភាពរឹងមាំ ហើយតស៊ូបន្ថែមទៀត ដោយថាពួកគេនឹងទទួលបានសន្តិភាពនាពេលឆាប់ៗខាងមុខមិនខាន។
ចំណែកសកម្មជនបរិស្ថាន លោក លី ចាន់ដារ៉ាវុធ លើកឡើងថា ការដាក់ញត្តិនេះដើម្បីបង្ហាញការសាមគ្គីភាពជាមួយប្រទេសអ៊ុយក្រែនដែលកំពុងរងការបំផ្លិចបំផ្លាញ ហើយរុស្ស៊ីដាក់ទ័ពទៅលើប្រទេសមួយនេះ គឺជារឿងមិនត្រឹមត្រូវ ខុសច្បាប់អន្តរជាតិ។ មិនត្រឹមតែប៉ុណ្ណោះលោកថា អាចបង្កឱ្យមានអស្ថេរភាពនៅលើពិភពលោកផងដែរ។
អ្នកនាំពាក្យគណបក្សកាន់អំណាច លោក សុខ ឥសាន កាលពីម្សិលមិញលើកឡើងថា ទោះបីជាក្រុមនិស្សិតបញ្ញវន្តខ្មែរ សកម្មជនសិទ្ធិមនុស្សយកញត្តិដាក់ជូនទៅស្ថានទូតរុស្ស៊ី ដើម្បីស្នើបញ្ឈប់ការឈ្លានពានទៅលើប្រទេសអ៊ុយក្រែនក្តី ប៉ុន្តែលោកថា ទំនងជារុស្ស៊ី មិនធ្វើតាមសំណើររបស់ពួកគេនោះទេ។ លោកបន្តថា កន្លងមកមានប្រទេសមហាអំណាចមួយចំនួនជួយអន្តរាគមន៍ដើម្បីបញ្ចប់សង្គ្រាមប្រទេសទាំង២ ប៉ុន្តែរុស្ស៊ីមិនធ្វើតាមឡើយ។
លោកមានប្រសាសន៍ថា៖ «បើតាមយោបល់ខ្ញុំ គ្មាននរណាគេយកចិត្តទុកដាក់ស្តាប់ជាមួយគាត់ទេ ពីព្រោះបណ្តាប្រទេសលើពិភពលោកគេបង្គាប់ឱ្យរុស្ស៊ី ឱ្យរុស្ស៊ីធ្វើតាមគាត់ គេមិនធ្វើតាមផង ចុះទំរាំគាត់ជាក្រុមនិស្សិតតូចមួយ ហើយនៅក្នុងប្រទេសតូចមួយដូចកម្ពុជា ជាដើម តើរុស្ស៊ីយកចិត្តទុកដាក់ ពិចារណាដែរឬអត់ ដូចអត់មានទេ»។
មន្ត្រីស៊ើបអង្កេតជាន់ខ្ពស់ សមាគមអាដហុក លោក ស៊ឹង សែនករុណា មានប្រសាសន៍ថា ដើមចមដែលនាំឱ្យស្ថានទូតរុស្ស៊ី មិនទទួលយកញត្តិរបស់ក្រុមសកម្មជនសិទ្ធិមនុស្សនិងបរិស្ថាន ដោយសារតែរុស្ស៊ីមិនមានឆន្ទៈក្នុងការដោះស្រាយ ឬបញ្ចប់សង្គ្រាមនៅអ៊ុយក្រែននោះទេ ។
លោកមានប្រសាសន៍ថា៖ «ស្ថានទូតរុស្ស៊ីមិនទទួលយកញត្តិរបស់ខាងក្រុមអង្គការសង្គមស៊ីវិល ឬក៏ខាងយុវជនដែលត្រូវដាក់ញត្តិទៅខាងស្ថានទូត វាជាការបង្ហាញនូវឥរិយាបទមួយមិនល្អទេ ហើយខណៈដែលពិភពលោកគេរិះគន់ និងថ្កោលទោសយ៉ាងខ្លាំងចំពោះទង្វើឈ្លានពានរបស់រុស្ស៊ី ទៅលើប្រទេសអ៊ុយក្រែន»។
លោកបន្ថែមថា៖ «ហើយនៅពេលនេះស្ថានទូតរុស្ស៊ីក៏បានបង្ហាញនូវឥរិយាបទ[មិនទទួលយកញត្តិពីក្រុមយុវជន]បែបនេះទៅទៀត វារិតតែធ្វើឱ្យសាធារណជន ប្រជាពលរដ្ឋ ឬក៏សហគមន៍អន្តរជាតិកាន់តែដឹងច្បាស់ហើយថា ទូតរុស្ស៊ីគ្មានចេតនាណាមួយក្នុងការធ្វើឱ្យស្ថានភាពល្អប្រសើររវាងសង្គ្រាមរុស្ស៊ី និងអ៊ុយក្រែននោះទេ»។
រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែន កាលពីដើមខែកុម្ភៈ ពោលគឺបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀ ពូទីន ដែលបានធ្វើឱ្យបណ្តាប្រទេសមួយចំនួន រួមនឹងសហភាពអឺរ៉ុបបានសម្រេចដាក់ទណ្ឌកម្មជាបន្តបន្ទាប់លើរុស្ស៊ី៕